"Sipiciak daun sipiciak Kaduo daun jilatang Nan cadiak lah mangguliciak Nan bansaik juo mambayia utang"
Baitu bunyi pantun Kari Garejoh nan sadang mambaliak-baliak surek kaba 'Singgalang' di lapau Uwo Pulin pagi kapatang. Pantun saroman itu tantulah indak sumbarang kalua se dari muncuangnyo. Bak kato urang tuo-tuo juo, indak ado asok, kalau indak ado api. Aratinyo, pastilah ado nan agak aneh taraso dek Kari, makonyo inyo bapantun bantuak itu. Salidik punyo salidik, tanyato pantun tu bamulo dari barita surek kaba nan sadang inyo baco. Judulnyo 'Dana Beasiswa Dipotong'. Nan paliang mambuek Kari maraso indak sanang adolah, dana beasiswa nan dipotong tu adolah untuak anak-anak urang bansaik. "Lah lamo pulo ambo indak mandanga pantun bantuak itu. Sia nan mangguliciak dan siapo pulo nan mambayia utang, Kari?" Tanyo Tan Baro. "Bantuak ikolah watak urang-urang hebat di nagari awak, Tan. Lah jaleh beasiswa untuak sikola anak-anak urang bansaik, dipotong juo lai. Harusnyo, urang-urang hebat tu manambah, tapi malah manandeh se karajonyo. Bacolah dek Tan Baro barita ko ha!" Jawek Kari sambia maagiahan surek kaba nan sadang dibaconyo ka Tan Baro. Indak mananti lamo-lamo, Tan Baro lansuang se maambiak surek kaba tu dan mambaconyo. Kato demi kato, kalimat demi kalimat diparatikan bana elok-elok dek Tan Baro. Sudah tu, nampak anak mudo tu manggeleang-geleang ketek. "Baa nyo?" Tanyo Kari. "Iko indak di kapalo makan kutu lai doh, tapi lah ka kaki. Mustinyo pajabaik manambah pitih untuak anak-anak urang bansaik tu, bukan manyunaiknyo," baleh Tan Baro. Udin Kuriak, Angah Piyan sarato Uncu Labai nampak tapana se mandanga Kari jo Tan Baro maota. Agak heran urang batigo tu mancaliak. Baa ka indak? Mulonyo tadi Kari bapantun, sudah tu kini kalua pulo istilah makan kutu sampai ka kaki. Nan satau inyo, makan kutu biasonyo di kapalo. "Sarius bana Tan Baro jo Kari nampak dek ambo. Apo masalahnyo tu?" Tanyo Angah Piyan indak saba nio tau. "Kan ikolah, Ngah. Pajabaik atau urang santiang di nagari awak banyak juo nan indak punyo raso ibo. Lah jaleh pitih beasiswa untuak anak-anak urang miskin masih dipotong juo. Lah jaleh bantuak pinjaik, nyo rawik juo lai," Kari Garejoh nan manjawek. "Oooo....itu! Lah biaso tu mah. Utak satangah pajabaik di nagari awak ko baisi pitih dan proyek. Saumpamo utak urang-urang tu dibalah pakai kapak maja, mungkin pitih se nan kalua. Kalau lah dipanuahi dek pitih sarato angko-angko proyek, hati nurani urang pasti tatutuik. Karano, satiok nan ka digarik diukua jo labo galeh. Jadi, batua apo nan manjadi pantun Kari tadi tu mah. Nan cadiak-cadiak bisa mangguliciak, nan bodoh juo mambayia utang. Iko sasuai jo papatah urang tuo-tuo juo, nan lalok makan nan jago, nan cadiak makan nan bodoh, nan kayo makan nan bansaik," kecek Angah Piyan mananggapi apo nan dikatokan kawannyo tadi. "Nan sarupo tu jadi kayu api di narako beko mah," semba Uncu Labai. "Maa pulo takana itu dek nyo? Kan ado prinsipnyo bahaso nan kini adolah kini, untuak bisuak, bisuak pulo dietong," baleh Kari Garejoh. Espe St.Soeleman http://www.hariansinggalang.co.id/palanta.html --~--~---------~--~----~------------~-------~--~----~ =============================================================== Website: http://www.rantaunet.org =============================================================== UNTUK SELALU DIPERHATIKAN: - Hapus footer dan bagian yang tidak perlu, jika melakukan reply. - Posting email besar dari >200KB akan di banned, sampai yang bersangkutan menyampaikan komitmen akan mematuhi Tata Tertib yang berlaku. - Email attachment, DILARANG! Tawarkan kepada yang berminat dan kirim melalui jalur pribadi. =============================================================== Berhenti, kirim email kosong ke: [EMAIL PROTECTED] Webmail Mailing List dan Konfigurasi teima email, lihat di: http://groups.google.com/group/RantauNet/subscribe Dengan terlebih dahulu mendaftarkan email anda pada Google Account di https://www.google.com/accounts/NewAccount =============================================================== -~----------~----~----~----~------~----~------~--~---