“Batambah maha ameh kini, Wo!” Sorak Udin Kuriak sasudah malipek surek kaba ‘Singgalang’.
“Dek ambo, ameh maha ndak masalah. Nan rumik tu, kalau minyak manih, gulo sarato kaparaluan pokok lainnyo sato pulo maha. Kalau minyak manih maha, tapaso Udin mambayia ciek goreang labiah saribu. Lai ka talok?” Baleh Uwo. “Kok lah maha Uwo manjua goreang, bialah ambo indak makan goreang bagai. Kok maha pulo gulo, bialah kopi paik se minum,” kecek Udin indak namuah kalah. Baitulah ota urang di lapau Uwo Pulin pagi kapatang. Ota bamulo dari Udin nan mambaco barita surek kaba ‘Singgalang’. Dalam surek kaba tu ado barita harago ameh nan lah sampai tujuah ratuih ribu saameh. “Kalau lah sabanyak itu harago ameh, jualah nan ado di lamari tu, Din!” Kato Angah Piyan. “Dima pulo ambo manyimpan ameh, Ngah? Nan ka iyo-iyo se lah. Ijankan untuak pambali ameh salamo ko, untuak makan se lah payah ko ha,” jawek Udin. “Ikolah bantuaknyo nagari awak. Nan kaparaluan sahari-hari dek awak, haragonyo naiak bantuak roket Amerika. Itu mah, lah mamakiak urang kasadonyo. Bayangkanlah, harago minyak manih naiak, gulo naiak, tapuang naiak, bahan bangunan labiah parah lai. Bisuak-bisuak ko ambo yakin, jariang, patai, langkueh, daun kunik, daun salam sato pulo naiak,” kecek Tacin. “Mamakiak bana ka langik nan ka tujuah, nan lah naiak indak ka turun gai doh, Cin!” Sorak Kari Garejoh dari suduik. Tambah lamo ota di lapau tu batambah angek. Maklum, dalam babarapo hari ko, surek kaba ‘Singgalang’ nan langganan urang tu mambaritakan masalah naiaknyo harago kaparaluan iduik manusia. “Iyo juo kato urang tuo-tuo awak saisuak. Lamak galak di nan kayo. Urang bansaik tambah marasai. Lai bana punyo pitih duo puluah ribu, tapi indak baarago dibao ka pasa. Dulu, dibao pitih saribu limo ratuih, bisa mambali ikan asin, minyak manih sarato Ajinomoto,” kato Angah baliak. “Kok nan lamo dikana juo Ngah, jatuah ka dalam aia mato. Ciek lai, nan lamo tu indak ka pernah babaliak dan indak ka bisa awak rasoan lai kini. Karano, maso lalu tu adolah sejarah. Presiden maso itu se kini lah sekarat di rumah sakik,” kecek Kari Garejoh pulo. “Takana dek ambo, baa kok pamarentah indak bisa maatasi naiaknyo harago kaparaluan iduik tu yo?” Bisiak Mak Pono. “Pamarentah indak itu karajonyo doh, Mak!” Potong Kari. “Jadi, apo se karajo pamarentah tu?” “Banyak! Umpamonyo mamikiakan baa bisa nagari ko rancak jo bangunan-bangunan rancak pulo, baa nagari ko bisa dipuji negara lain, baa bisa duduak taruih di pamarentahan, baa supayo proyek banyak. Karano samakin banyak proyek, tantu banyak pulo ujuang-ujuangnyo,” jawek Kari. “Jadi, baa jo nasib urang-urang bansaik bantuak awak ko?” Mak Pono batanyo taruih. “Awak ko adolah warga negara nomor tujuah baleh, jadi indak paralu bana dipikiakan. Karano itu, mamakiak bana ka langik nan katujuah supayo pamarentah bisa manurunkan harago barang-barang tu, indak ka didanga bagai doh. Karano itu, rancak awak anok se. Tarimo se lah nasib surang-surang,” jawek Kari sambia malengah. Espe.St.Soeleman http://www.hariansinggalang.co.id/palanta.html No virus found in this outgoing message. Checked by AVG Free Edition. Version: 7.5.516 / Virus Database: 269.19.5/1228 - Release Date: 16/01/2008 9:01 --~--~---------~--~----~------------~-------~--~----~ =============================================================== Website: http://www.rantaunet.org =============================================================== UNTUK SELALU DIPERHATIKAN: - Selalu mematuhi Peraturan Palanta RantauNet lihat di http://groups.google.com/group/RantauNet/web/peraturan-palanta-rantaunet - Hapus footer dan bagian yang tidak perlu, jika melakukan reply. - Posting email besar dari >200KB akan di banned, sampai yang bersangkutan menyampaikan komitmen akan mematuhi Tata Tertib yang berlaku. - Email attachment, DILARANG! Tawarkan kepada yang berminat dan kirim melalui jalur pribadi. =============================================================== Berhenti, kirim email kosong ke: [EMAIL PROTECTED] Webmail Mailing List dan Konfigurasi teima email, lihat di: http://groups.google.com/group/RantauNet/subscribe Dengan terlebih dahulu mendaftarkan email anda pada Google Account di https://www.google.com/accounts/NewAccount -~----------~----~----~----~------~----~------~--~---
