Mak Sutan Sinaro nan ambo hormati,
Ambo kiro antaro pangulu jo datuak ado saketek perbedaan, nan pangulu ko iyo alah jaleh adolah datuak, sadangkan datuak indak sadonyo nan manjadi pangulu. Dalam tiok suku di nagari, datuak pucuak di masing-masing suku disabuik adolah pangulu, dimano adolah datuak nan paratamo sakali ado, Ni dalam suku mantun. Kudian, suku nan ko samakin bakambang anak kamanakannyo, nan manjadi babarapo kaum. Dalam satiok kaum nan ko dipimpinlah masiang-masiang datuak nan ko nan marupokan balahan dari suku usali tadi. Disiko ado saketek perbedaan dalam panamoan disatiok daerah di ranah minang, dimano datuak di kaum nan ko ado juo disabuik pangulu andiko (luhak nan tigo), pusako batanam (Piaman Laweh), mamak bainduak (Pasaman), mamak kaum (Alahan Panjang) dan lain sabagainyo. Pado limbago adat nagari nan ko, disatiok suku nan ado niniak mamak nan ko disabuik "urang nan ampek jinih", mulai dari pangulu, malin, manti hinggo ka dubalang. Salain itu ado pulo nan disabuik "urang jinih nan ampek", yaitu imam, khatib, bilal, qhadi. Khusus pado qhadi ko kini alah diambiak perannyo oleh pemerintah daerah dengan maangkek lansuang PNS nan ditugaskan pado masing-masing katua KUA nan ado di masing-masing kecamatan. Urang nan ampek jinih sarato urang jinih nan ampek ko, warih nan bajawek dari mamak ka kamanakan nan disabuik garih matrilineal. Mangko dek itu satiok mamak di ranah minang diharuskan maajakan tatanan adat kapado kamanakannyo. Fenomena nan tajadi kini, antaro niniak mamak nan ado dalam struktur limbago adat nagari banyak nan indak saling mengenal antaro satu jo nan lainnyo, sahinggo ado komunikasi nan taputuih untuak mampasamokan apo nan harus dimusyawarahkan untuak kemaslahatan masyarakat di nagari. Salain itu, pado 3 lareh nan ado di ranah minang, baiak Koto Piliang, Bodi Caniago, ataupun pisang sikalek-kalek utan pisang timbatu nan bagatah ado kecenderungan untuak mausahokan warih nan bajawek kapado kamanakan nan dibawah daguak, nan takadang indak memiliki komptensi nan layak manaruihkan amanah dari mamak nan sabalunnyo. Hal ikolah nan umumnyo manjadikan faktor utama tatanan masyarakat adat minangkabau nan ado di nagari-nagari nan ko kurang bafungsi. Ambo kiro di palanta nan ko cukuik banyak angku,mamak, sarato dunsanak nan manjadi niniak mamak dalam limbago adat di nagarinyo, mungkin ado pandapek lain nan bisa manukuak sarato mambilai pado nan kurang sarato nan senjang apo nan ambo sampaikan. Pabilo ado kato nan indak pado tampeknyo, mohon pulo dibari maaf. wasalam AZ/lk/34th/caniago Kubang, sadang di kampuang babako ka Canduang Koto Laweh, Agam ________________________________ Dari: Sutan Sinaro <stsin...@yahoo.com> Kepada: rantaunet <rantaunet@googlegroups.com> Dikirim: Senin, 6 Agustus 2012 23:21 Judul: [R@ntau-Net] Mari kito mangaji (28) Assalaamu'alaikum. w.w. Dunsanak kasadonyo nan Insya Allah dimuliakan Allah swt. Mari kito sambuang baliak kaji kito. Kapatang sampai di siko, Dalam Islam ado khilafat, di Minangkabau ado pangulu. Duo hal ko akan batarak tacin saliang bakuhantam kalau indak dicari dima tajalinnyo. Dek karano Pangulu dalam sejarah Dt. Perpatiah jo Dt. Katumanggungan tamasuak rajo Adytiawarman adolah pemimpin nan indak diangkek jo musyrawarah dan mufakat. Tantu sajo iko bakuhantam jo Sarak. Nak tajalin kaduonyo ko, kito ambiak pangulu manjadi punco, sudah tu jo musyawarah mufakat kito tuju khilafat nan dimukasuik dek Sarak. Baa caronyo, ... takah iko. Pangulu nan ado di tiok kaum, tiok suku nan biasonyo ba-jamuan dan dipiliah manuruik kaum atau suku masiang-masiang. Nak rancak jalan jadinyo urusan batagak pangulu ko iyo disandakan ka Sarak. Tantu sajo banyak saraik jadi pangulu dari nan taralah. Misalnyo Islam, baumua 40 tahun ka ateh, pendidikan minimal, akhlak, bijak, shaleh, berwibawa dan sebagainyo. Tiok suku mungkin ado sekian kaum dan tiok kaum ado pangulu. Dan pemilihan pangulu ko indak buliah lai dibatehi jo saraik-saraik lamo takah, inyo datang kudian, atau inyo malakok sajo walaupun sasuku. Baa dek bitu ?, dek karano kriteria nan takah itu mailangkan kesempatan mandapek pangulu nan cakap, bijak dan sebagainyo sasuai jo kriteria nan dimukasuik. Aratinyo dalam satu kaum sia sajo buliah jadi pangulu salamo saraik-saraiknyo lai dipenuhinyo. Nah dari tiok-tiok kaum ko beko dipakai caro musyawarah mufakat untuk dibaok ka dalam majlis syuro nan dibuek di kerapatan adat nan labiah gadang. Dari tiok-tiok kaum ko diutuslah pangulu-pangulu nan cakap untuak duduak di kerapatan sebagai jelmaan dari majlis syuro ko. Dari dan oleh Kerapatan atau majlis syuro ko lah dipiliah sia nan ka jadi pemimpin di Minangkabau cq. Gubernur Sumatera Barat. Jo lilahi ta'ala, basarah diri ka Allah swt. Insya Allah pemimpin nan dipiliah sacaro musyawarah mufakat dalam majlis syuro atau kerapatan ko adolah nan paliang santiang nan diredhai dek Allah swt. dan Insya Allah akan manjadi pemimpin nan 'adil. Tapi dunsanak, Sabinjek paragraph diateh alun bisa salasai lai do dunsanak, rancak kito bicarakan di kesempatan nan lain, supayo jaleh baa duduak pakaronyo dan dapek hasil nan labiah mantap nan beko bisa pulo dibaok ka Konvensi atau Kongres Adaik Minangkabau, supayo jan tabangkalai pulo kaji kito. Kini ko kito taruihkan mangaji dulu. ... Apo nan kito kaji lai Sutan ?... Eh, kaji awak alun abih lai tu, dari jalan nan luruih lah maleba sampai ka pemimpin, rancak kito janguak baliak dasar kasadonyo. Baa dasarnyo ?. Dunsanak, 'aqidah di dado indak buliah sumbiang saketek juo, walaupun iman naiak dan turun. Aa nan indak buliah sumbiang tu ?. Keyakinan awak bahaso duo sumber nan ditinggakan dek Nabi saw nan kalau awak bapacik ka kaduonyo awak salamaik, yakni Qur-an dan sunnah. Kok ndak yakin jo iko dunsanak, sumbiang namonyo 'aqidah tu. Dek malam Nuzul Qur-an lah manjalang, mari kito bahas pulo baa mu'jizat terbesar sepanjang zaman ko diturunkan. Dunsanak kasadonyo, indak rahasio umum lai, dan lah acok bana dikacekkan ka awak, bahaso awak labiah banyak mambaco koran daripado mambaco Qur-an. Itu baru dari segi baconyo, alun pemahaman dan pengamalannyo. Batua ndak ?. Awak sibuk mancari ilmu, ideologi, undang-undang dan mambuek undang-undang sendiri, dan malupokan al-Qur-an. Mancari ideologi dan mamakai ideologi nan jaleh- jaleh ndak sasuai dengan fitrah awak sebagai manusia ciptaan Allah. Anehnyo .. awak mangaku sebagai ciptaan Allah, tapi awak ndak amuah mamakai atau mengamalkan, ndak amuah mamahami, bahkan mambacopun awak maleh, padahal itu tuntunan nan juo diturunkan dek Allah untuk ma-atur kehidupan ciptaannyo di dunia ko supaya salamaik sampai ka akhiraik nantik. Sahinggo awak ndak mangarati ndak paham bahkan ndak tahu bahaso ayat demi ayat itu adalah kalimat-kalimat nan berbobot dan bernilai tinggi untuk kehidupan ko. Kalau awak amuah maliek, baa bana bobotnyo ayat-ayat nan lah diturunkan semenjak 15 abad nan lalu itu, apakah dari segi kepresisian, ketepatan, keakuratan, ketelitian, atau pun dari segi kepastian, kabaranian dan … ujungnyo kayakinan, pasti akan ditemui. Hanyo sajo di awak-awak ko, iko nan kurang, mambacopun maleh. .. Sutan .. agiahlah contoh gak ciek … Baiak, awak ndak usah repot di urusan kepresisian, ketepatan, keakuratan, ketelitian, awak ambiak sajo urusan keberanian. Ilustrasinyo takah iko. Sia-sia nan pernah manjadi dosen mambaco kato pengantar di tugas akhir atau skrispi mahasiswa, ataupun urang nan suko mambaco buku, satiok mabaco kata pengantar dari penulis lah dapek dipastikan ado tulisan nan berbunyi, … I realize that this paper, this report, this scription, this book, is far of perfection and still has lot of defects, and certainly needs lot of critics, suggestions and supports to reach the perfection. …Aa tu Sutan, bahaso gareseh peseh ko agak kurang paham kami… Mukasuiknyo dunsanak, “Saya menyadari bahwa makalah,laporan, skripsi, buku ini jauh dari kesempurnaan dan memiliki banyak kekurangan, yang tentu saja membutuhkan kritik, saran dan dukungan untuk mencapai kasempurnaan yang dimaksud." Kalimaik-kalimaik ko biaso tatulih dalam dalam tugas akhir mahasiswa, makalah- makalah, bahkan sampai buku dek pengarang dan ilmuwan terkenalpun biaso manulih takah itu. Aratinyo bana ko sanak aaa… Indak barani, titik. Ndak barani menyatakan bahaso this is absolutely true and no doubt. Ini adalah mutlak benar dan tidak ada keraguan. Jaleh kan ?. Nah, kalau awak amuah mambaco … ndak usah jauh-jauh, Al-Qur-an surek 2 ayat 2 sasudah Alif lam Miim (ko ayat 1), dengan barani mangatokan. “Dzalikal kitaaabu laa raibaafiihi …hudal lil muttaqiiin”. This is the book, that there is no doubt in that,… the clue, the direction, the map,.. for those people … for those conscious of Allah. Ini adalah kitab yang tidak ada keraguan padanya (artinyo, sadonyo bana, ndak salah, pasti, akurat dst), .. petunjuk bagi orang-orang yang bertaqwa. Nah,… cubo cari buku di dunia nan barani menyatakan hal itu selain dari Al-Qur-an. Ndak ka ado do… kalau ado pula nan mancubo-cubo manulih takah itu lah dapat dipastikan didalamnyo pasti banyak terdapat pertentangan (contradiction), ketidak sesuaian (discrepancy) dan sebagainyo, samantaro Qur-an sendiri menyatakan dalam dirinyo ndak ado discrepancy ataupun contradiction, sebab kalau ado tantu hancua alam ko. Saudara (brother) Yusha Evan, nan dulunyo penginjil katiko partamo mambaco Qur-an bakaruik kaniangnyo, “really (iyo sabananyo ko ?)….” Keceknyo dalam hati. Sabab inyo urang nan menemukan banyak contradiction atau discrepancy satiok buku suci agamo ma sajo nan dibaconyo katiko mancari kebenaran, kecuali Qur-an. Iko sajo lah cukuik mambueknyo masuak Islam. Kok lai mangarati bahaso Inggirih, bisa sanak caliak caritonyo di link berikut. http://www.youtube.com/watch?v=nEfBvlSh1dw Bagi awak dunsanak, dari siko sajo sabananyo awak seharusnyo lah mangarati baralah ka gadangnyo bobot dan ketinggian Al-Qur-an. Sangat di sayangkan awak masih mancari- cari buku lain ataupun paham lain atau ideologi lain dalam manuntun awak untuak iduik di dunia ko. Ironis sekali. Akibatnyo awak ndak amuah mengikuti dan mengamalkan apa nan lah ditunjukkan dek Allah swt. melalui al-Qur-an. Peringatan turunnyo Al-Qur-an diliek hanyo sebagai peringatan sajo, tanpa amuah mamahaminyo. Ndak amuah tunduk dan patuah ka hukum- hukum Al-Qur-an, dan awak lah pulo ikuik tapanjaro dek kesalahan Soekarno (Presiden pertama RI-red), nan ndak amuah mamakai Al-Qur-an sebagai landasan undang-undang dengan mengutus Kasman Singodimejo untuak meloby para alim ulama manarimo penghapusan 7 kata dalam Pancasila katiko sidang BPUPKI dengan alasan untuak samantaro agar diakui kemerdekaan dek internasional, padahal setelah itu Soekarno mambubarkan Dewan Konstituante nan hampir merampungkan konsep negara dengan panduan Al-Qur-an dengan alasan terlalu lamo basidang sampai 5 tahun, sabananyo inyo takuik kekuasaannyo tergugat. Dan labiah disayangkan lai sampai hari ko awak pun ndak amuah berjuang bahkan ndak tapikia agar negara ko malatakkan Al-Qur-an di ateh UUD. Jan jan isuak kanai pulo awak dek doso kolektif hanyo akibat ketakutan Soekarno Indonesia bagian timur melepaskan diri. Dan iko lah acok bana awak sabuik dalam mangaji ko. Inok ranuangan se lah. Kito taruihkan. Mari awak liek baa bobot dan ketinggian Al-Qur-an ko dari satu ayat nan bagi ambo sangat menggetarkan hati jo jantuang, .... Aaaa tapi dek lah panjang pulo, barisuak kito sambuang dunsanak.. Kito tulih baliak. (Bersambung) Billahil hidayah watr taufiq Wassalam St. Sinaro -- -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://forum.rantaunet.org/showthread.php?tid=1 - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/