Maa Angku Mantari Sutan sarato Rang Lapau nan Basamo, Walaupun talambek masuak ka Lapau, nan ota kito japuikan juo.
Kok ka Sisawah iyo alun tajalang di ambo lai. Bahkan ambo ingin pai ka sinan manjalang kawan lamo ambo Angku Sari Ali, Urang Sisawah Asli, tapi manuruik Angku Ahmad Syafii Maarif, Rang Tambang, Sumpu Kudus, dalam satu komunikasi sms jo ambo, Angku Sari Ali lah lamo maningga. Kok disampaikan Tuhan nanti, kito pai ka Sisawah mancaliak Guo tu. Bukik-bukik rimbo perbatasan antaro Sumatera Barat jo Riau lah ambo rancah, dari Ampalu Halaban, (Limopuluah Koto)di Utara, lalu ka Bukik Gabuih, muncul di Unggan, Silantai, Sumpu, Tambang, Mangganti, Silukah, Pinang, Durian Gadang, lapeh manyubarang ka Paru, Tapuih, Sungai Batuang ka Pintu Batu. Lasuah, aman paratian manampuah rimbo gadang tu. Taraso bakanti awak jo Margasatwa panghunyi Rimbo Gadang tu, aman paratian, dakek kito jo Ilahi Rabbi ... Kabanyo kini lah dibuek urang pulo Jambatan Gantuang di sabalah hilia Durian Gadang malinteh Batang Kuantan ka arah Silukah, sudah tu dibuek pulo jalan oto (dahulu jalan Kudo Baban) taruih ka Sumpu jo Unggan. Ambo indak tahu kalau mukasuik jalan tu ado nan tasuruak pulo dek loggers, palateh hutan, paangkuik kayu-kayu rancak nan tasimpan di Rimbo Sumpu tu... Kawatir ambo kalau pamandangan alah tarang, kayu-kayu rimbo-rimbo kasayangn ambo dahulu alah ditabang. Wakatu ambo bajalan dari Pakanbaru - Lipek Kain - Loge, sampai ka Muara Lembu ampek tahun nan lalu, ambo basobok di jalan jo truk-truk gadang mambawo muatan panuah jo kayu-kayu log gadang nan masih segar. Ambo etong-etong saharian pajalanan, jumlah truk tu mungkin hampia 100 bairiang-iriang duo tigo bakompoi-kompoi. Bayangkan sajolah kalau data ambo sahari sajo lah sabanyak tu, baralah banyak kayu nan dihoyak dari rimbo-rimbo tu sapanjang tahun. Jauah di Hilia Batang Kampar di Pangkalan Kerinci, wakatu ambo dari Tambilahan ka Pakanbaru, kalau awak maengong ka ilia kaarah timur ka Palalawan, ratusan, mungkin ribuan logs barapuangan di Batang Kampar tu... Kadang-kadang taibo hati ambo, karano bakeh pambakaran hutan patangahan 1990an dahulu nan manjadi asok angek garang, masih tabayang. Banyak bakeh-bakeh tanah hutan tu nan masih bancah-bancah, banyak kayu-kayu nan mati tagak tabaka barono hitam marano sabagai saksi kemerajalelaan tangan manusia ... Sakitulah dahulu, sabagai tambahan panjapuik carito dari Sijunjuang. Salam, --MakNgah Sjamsir Sjarif --- In [EMAIL PROTECTED], Mantari Sutan <[EMAIL PROTECTED]> wrote: > > Iyo menguasai Mak Ngah daerah kampuang ambo mah. > Durian Godang tu sampai kini masih agak susah oto masuak. > Kok jaso nagari tu tahadok kawasan sakitar cukuik godang. > Kok ado rancana bajalan ka daerah kami Mak Ngah, kontak-kontak ambo. > Sanyampang ambo bisa mangawani ancak bana mak. kalaupun indak, bia ambo carian urang mangawani Mamak bajalan-jalan di rimbo tu. Cubo bamain ka ngalau sisawah Mak, sabana ancak. FYI, ambo parnah naiak parahu mailia batang kuantan tu. Iyo sabana lomak mak. > > Ambo picayo bahasonyo kereta api ko memang harus manjadi alat utama mobilitas. > Di India, kareta api ko diuruih urang salevel menteri. > Di lua ambo caliak, pengembangan jaringan jalan highway salalu menyisakan jalur untuk kereta api. > Kadang malah skaligus dibangun jalan tol jo kareta apinyo. Kecek kawan nan bidang iko, gadang manfaatnyo kalau basabalahan bantuak itu. Cuma kalau di kito susah disabuik Mak... > > Wassalam > > PS: Ambo cc ka rantaunet juo mak > PIM: Pondok Indah Mall > --~--~---------~--~----~------------~-------~--~----~ =============================================================== Website: http://www.rantaunet.org =============================================================== UNTUK DIPERHATIKAN: - Mematuhi Peraturan Palanta RantauNet, lihat di http://groups.google.com/group/RantauNet/web/peraturan-rantaunet - Hapus footer dan bagian yang tidak perlu, jika melakukan reply. - Posting email besar dari >200KB akan di banned, sampai yang bersangkutan menyampaikan komitmen akan mematuhi Peraturan yang berlaku. - Email attachment, DILARANG! Tawarkan kepada yang berminat dan kirim melalui jalur pribadi. =============================================================== Berhenti, kirim email kosong ke: [EMAIL PROTECTED] Webmail Mailing List dan Konfigurasi teima email, lihat di: http://groups.google.com/group/RantauNet/subscribe Dengan terlebih dahulu mendaftarkan email anda pada Google Account di https://www.google.com/accounts/NewAccount -~----------~----~----~----~------~----~------~--~---