Rabu, 18 February 2009
Sarkot Apak 'Demi Caleg, Jual Harta Benda'. Barita sarupo itu lah manjadi biaso dek Tan Baro. Tapi indak baitu dek Malin Kacindin jo Kudun. Dalam ota urang baduo tu, apo nan dilakukan dek Caleg sampai manjua-manggadai adolah lua biaso. Alasannyo, alun manga-manga, harato lah tandeh. Kok iyo lai tapiliah beko, tantu bisa babaliak pokok, tambah labo sabanyak itu pulo di lua pambali rumah, oto, tanah sarato bini mudo. Namun, kok nyampang indak tapiliah, bisa tigo kosong main. Sudahlah awak kalah, harato tandeh, tingga di rumah sakik jiwa, urang rumah mintak carai pulo. "Baa pandangan Tan Baro ka barita Caleg nan sampai manjua harato bando ko?" Tanyo Malin Kacindin tibo-tibo mintak pandapek konconyo tu. "Kalau itu nan ditanyo, dek ambo biaso se tu nyo. Kalau nio dapek ikan tantu musti dipanciang pakai umpan. Indak bisa papeh kosong sajo dilompek-an ka dalam aia doh," jawek Tan Baro. "Bisa, Tan! Bisa papeh kosong tu mah, tapi indak ikan nan dapek doh," salo Uwo Pulin. "Apo?" Tanyo Tan Baro. "Sipatu buruak, kain buruak, sarawa kolor buruak, lapiak buruak. Pokoknyo nan sagalo buruak," jawek Uwo disambuik jo galak dek kawan-kawannyo. "Caleg manjua-manggadai, ah, biaso se tu nyo. Kan lah bak kato papatah urang tuo-tuo saisuak juo; barugi dulu mangko balabo. Mukasuiknyo, ibaraik urang manggaleh, kalau nio dapek labo musti dimodali dulu. Nak duo pantun sairiang, kalau nio basubang, talingo musti ditindiak dulu. Jadi, biaso-biaso se manjua harto bando untuak mandapek-an nan labiah gadang, asa jan manjua sarawa kotok sajo. Kalau sampai sarawa kotok sato tajua, tantu batalanjang gegek se apak tu lai sapanjang hari. Kok lah sarupo itu, indak talok di Gaduik tu doh, tapi musti dipasuang dulu," Kari Garejoh nan dari tadi diam sajo, mulai buka suaro. "Sia pulo nan namuah manjua sarawa kotok, Kari? Nan ka indak-indak se pangana tu!" Potong Ajo Tondeh. "Itu bisa tajadi, Jo. Cubo bayangkan dek Ajo, kalau kasado harato lah tajua, nan ka dimakan lah abih, bini indak namuah batanak, dunsanak lah banci, karajo indak ado pulo, kama badan batenggang lai?" Hanyo itu nan bisa dijawek Kari. "Kok itu, namoe tenggen mah," baleh Ajo. "Lai mah tau Ajo, manga batanyo juo," kato Kari baliak. "Indak den doh! Ijan sampai ado Caleg-Caleg di nagari awak ko nan indak basarawa kotok. Kini musim anjiang gilo," kecek Ajo sambia galak manih. Baitulah ota di lapau Uwo Pulin kapatang. Nan dipaotakan masih basumber dari barita-barita di surek kaba 'Singgalang' juo. Karano, hanyo surek kaba urang awak itulah nan dipicayo dek komunitas lapau Uwo salamo ko. Apolai kini, lah ado pulo namonyo ekspedisi wartawannyo ka palosok-palosok dusun untuk mancari barita, informasi sarato masalah-masalah nan indak didapek dek pamarentah, anggota dewan atau siapo sajo. Pokoknyo, dek urang-urang tu, sakali 'Singgalang', salamonyo pasti 'Singgalang'. Espe St.Soeleman http://www.hariansinggalang.co.id/index.php?mod=detail_berita.php&id=403 The above message is for the intended recipient only and may contain confidential information and/or may be subject to legal privilege. If you are not the intended recipient, you are hereby notified that any dissemination, distribution, or copying of this message, or any attachment, is strictly prohibited. If it has reached you in error please inform us immediately by reply e-mail or telephone, reversing the charge if necessary. Please delete the message and the reply (if it contains the original message) thereafter. Thank you. --~--~---------~--~----~------------~-------~--~----~ =============================================================== UNTUK DIPERHATIKAN, melanggar akan dimoderasi/dibanned: - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi di setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama - DILARANG: 1. Email attachment, tawarkan disini & kirim melalui jalur pribadi; 2. Posting email besar dari 200KB; 3. One Liner =============================================================== Berhenti, kirim email kosong ke: rantaunet-unsubscr...@googlegroups.com Daftarkan email anda yg terdaftar disini pada Google Account di: https://www.google.com/accounts/NewAccount?hl=id Untuk melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---