Waalaikum Salam Wr Wb rina dan dunsanak sapalanta
Sajak sopir jo sitokar kakanyangan mamakan lapek jaguang di rumah si rinan,
indak tantu sen li kama paino rombongan dun. Lai di kode dek si rina, " oto ka
di arak ka Sungai Tanang,tunggu kami yoh ni " . Antah baa lo, patuah sen sopir
jo sitokar nampakno, sampai indak takano di mereka untuak pulang ka Batusangka
li he he he. .
Ambek cah lu , dek basabuik tantang pacu kudo jo motor koroih, iyo takana lo di
awak sangkek manontonno.
Pacu kudo
Awak caritoan katiko pai manonton jo amak dan kawan-kawanno nan bi mambaok anak
sapantaran lo umuano jo awak. Rombongan biai-biai gon duduak di tribun kalau
ndak salah namono. kami indak mangarati, baa mangko kudo balari nan di tontoni.
kami mintak balian balon-balon, kami balari lo bantuak kudo sambia ma irik
balon balon, wah asyik
Pernah pulo awak pai jo papa dan anak sepupu papa nan padusi, umua no gadang
saketek dari awak. Sangkek itu alah mulai mangarati, kudo ma nan ka disorak-i
... Agam, Agaaammm, Agaaammmm. Hidup Aaaagggaaaammmm
Kato rang Payokumbuah " ompek-ompek kudo nan lopeh, ogam juo nan monang "
Motokoroih
Pantang tingga, mantun sipaik kami jo kawan-kawan sapamainnan di kampuang.
Tadanga Bukik Ambacang indak lai jadi tampek pacuan kuo, tapi baganti jo
motokaroih, satolo kami manonton ba rami-rami. Kok baju kami sangkek itu ...
iyo indak babaju kuruang li doh. babaju biaso sen, sampik indak, dalam indak
lo, di ateh-ateh lutuik saketek lah. Itu alah elok juo namono du. Sangkek kami
SD mangkon baju urang ha
BAJU BOTO
Basagi ampek barendo rendo di tapino
Saroman bana jo kain paaleh meja
Ba bungo-bungo saroman jo baju jenggo
Mode tanamo modenyo baju ponco
.....
Tipak di uni sendiri, baru tahun 1996 babaju muslim. Sabalunno baju tagantuang
mode, paliang indak mode standar. rok 5 cm di ateh lutuk.Umumno urang
mantuinlo, jadi indak taraso babedo wak taraso doh.
Nah nan indak lupo di awak katiko manonton motokoroih gon adolah katiko
manonton dakek jungkek jungkang, apo lah namo keren no du ? Nan surang lapeh
sampai di ujung nan papan tantu turun baliak ka bawah, saat papa satinggi dado,
tibo motor dan langsung tahantak dado peserta dun... motor jatuah, dan peserta
dun pingsan dan ditandu ... antahlah antah baa jadino .... sajak itu awak ndak
nio manonton motokaroih gon li doh. alah du sakali dun... masih lasuah manonton
pacu kudo sambia mandanga rang pikumbuah maumpek.
Babaliak ka pasan si rina nan ka ba oto-oto ka Sungai Tanang
Sajak pasan di tarimo, ndak dapek aka li... tukang masak nan katibo namono,
alah jaleh apo nan paralu di sadiokan. Dek sagalo jauah di kampuang, sagan pulo
manyambuik tamu jo sambalado cangkuak. awak kirim pasan ka si rina, " Rina,
beko mintak baranti sacah di Simpang Tigo dih, turun rina sacah, singgahlah ka
rumah makan di simpang dun, kandakkan gulai cancang. Pakai pitih rinan dulu dih
". Karupuak jangek, timun, buncis lai ado di rumah. Limau sundai, minyak
goreng,. lai lo. Aman du.
Rina, caritoanlah baa lasuahno ba oto-oto ka Sungai Tannag.
Wass
Hanifah
--- On Fri, 5/1/09, rinapermadi <rinaperm...@gmail.com> wrote:
From: rinapermadi <rinaperm...@gmail.com>
Subject: [...@ntau-net] Re: PANAWA TANGAH PANEH PART 2 JO GARAH
To: RantauNet@googlegroups.com
Date: Friday, May 1, 2009, 11:50 AM
Assalamu’alaikum warahmatullahi wabarakaatuh,
Manolah Adidunsanak nan manyanda di Lapau Laweh ko,
Ambbo sambuang malah..episode nangko :
Tipak di badan diri si Rina nan alah mambuek agreement jo sitokar Oto oplet nan
tambangan sakuliliang Pulau Andaleh..
Janji nak ka pai manjapuik talua itiak di tampek dunsanak di ampek sakali
angkek (?)
Pagi2 lah tibo oplet antik ko..taruihlah ka rumah di dakek pacuan kudo bukik
ambacang
Kironyo hari tun tapek pulo urang sadiang bakuhampeh pacu kudo..eh.. indak
laih.. bukan pacu kudo ..disinun laih..ba motor koroih urang
Disinun kiro no mah..
Ndak nampak bakupiah beka laih..basirawa galembong , mahariak kudo..
tapi paja2 babaju kakurangan kain sambuah manggarutuang ka bukik ambacang tun…
Jaleh ari paneh garang bagai..
Nan oplet cako du.. babelok jalanlah mancari jalan mancik lalu ka gulai
bancah..sakalian baranti di SPBU mandiangin manyampaian pasan Toke gadang kalau
pom bensin dun dapek penghargaan “pasti pas” antahlah.. aa nan pas kini dulah?
Pailah mancari jalan mancik sampai juo di simpang luak anyia… kalua urang di
rumah dek manggaroroh buni oto oplet di laman.
Turunlah si rina lansuang no ka dapua…dek ongkoih lah baagiahkan di dalam oto
sambia maota2 resep nagari awak ko jo sitokar nan alah agak batuka baun
badane.. hehe
Dek Pak Aji ( papa si rina) dibaoklah turun sitokar jo supir satu jo supir duo
(haha cando mambaok bus lorena sen….)
Sambuah carito nan lalu di paotaan di laman rumah tun sambia mancaliak umaik
nan rami balalu lalang nak kamancaliak motor koroihh di bukik ambacang nan
dakek dari simpang tun..
Pak Aji : Ndee Yuang… caliaklah.. dek Ang tuha… sudahlah kindorok
no bauleh uleh.. indak lo sampai ka lutuik doh..
Baju lah sambuah lo dek panumbok, tapi senteang ba spasi lo 45
mm, sudah tun indak lo ado langan doh..caliaklah nan bairiang2an tu ha..
Sitokar : Itulah Pak, urang kini ko alah subana bansaik.. ndak
tabali kain cukuik untuak basapatagak laih..paniang tukang jaik e manjaik no..
mangko bauleh2 tu mah pak,
Supir 1 : Sabana no memang iyolah mode tu nagari kini Pak Aji, sabana
bansaik..kok taisuak malagu urang lagu no lagu no si baju kuruang……adolo lagu
sisuak kala nan kiro2 mode ko ha:
Anak urang si Kubang Putiah pai ka balai, hari sanjo
Mamakai baju guntiang cino..guntiang cino…
Ulah rayu si daun siriah bacarai pinang jo tampuak nyo
Apo katenggang si carano si carano
Urang kapau pai ka ladang sarupo kodek jo bajunyo
Iyo buruak lakunyo alang ayam tapauik disembanyo..
Urang sariak babaju ganiah pai manggaleh ka padang lua
Iyo sarik baa yam putiah Kok indak sikok alang manyemba
Jikok mandi denai dihulu aia nan usah adiak sauak
Disauak usah dikaruahi…dikaruahi..
Jikok mati denai daulu mati nan usah adiak janguak
Dijanguak usah diratok I diratok i..
Dek sajuak bana si pak supir 1 malaguan batapuak tangan sado alah nan hadir
tun..sampai2 minantu Pak Aji kalua pulo dari dapua nak ka sato lo maota,
Minantu pak Aji : wah.. Uda..rancak banar nyanyian Uda..menyantuah kiranya
isinya ya Uda?
Manyolo sitokar : Haaa kan dek mantun du.. samanda…isi lagu sabantar caka
tu..padiah..isinyaa. bila2 lah kita privatkan badua ya?
Babisiak Mando ko ka Pak Aji : Pa, what does it mean?
Babisiak pulo Pak Aji ka Minantu liau : we discuss it later… ok?
Angguak-angguak balam sin mando ko..
Pak Aji : Sabana padiah yiah…kok dicaliak2 urg saisuak tun baju ganiahlah
guntiang cino, kodek jo baju samo rononyo..kan baju kuruang mukasuik no du ndak?
Supir 2 : (Nan hanok miang dr td) Iyo bana Pak Aji, baju kuruang ko agak no lah
langka kini..mungkin dek rang saisuak ko kan kayo2 mah..nan kodek ado nan dr
kain panjang bameter2 ragi kacang goreang..nan baju panjang sp ka lutuik langan
no panjang pulo..nan tikuluak no dari kain aluih nan bameter2 lo dililik an ka
kapalo..basulam pulo jo bungo roih merah jo ijau..haluih suji no..antah kama
lah ka awak cari kini ko go laih.. iyo banal ah langka Pak Aji..
Sabanta sudah tu kalua si rina mambaok lapek jaguang jo paragede jaguang nan
kupi lah taidang dari tadi dek mamanyo..
Maikua lo anak no nan “kembung” dibulakang no malu2..lah diparsilahkan sadonyo
manyuboan..pailah no kabalakang laih..
Agak sasak angok sitokar nan iyo baun2 no ireh no agak e ado nan sedap betul di
dapua agak e mah.. iko malah nan ditunggu2 batin no.
Silahkan Pak Aji..kecek e..sambiak maonyok an tangan ka arah sia tampek
paragede ko..
Supir 1 : Ondeh mandeh..wa Ang laih..iyo bana yiah..alun Tuan rumah maambiak
laih.. lah daulu pulo waAng.. ditapuak no tangan sitokar ko.. capek2 lo nyo
ambiak sia ko diagiah no pak aji, minantu no..duo incek lo untuak wak Ano..
lalu lansuang kaduo2 no.. tandeh
Sitokar : Yooo cadiak waang yiah..nyo cikuih ciek..galak sadono..hehehe..
Supir 2 : (Milu2) baambiak juo lapek ciek..
Pak Aji : Anak ambo nan surang tun iyo bisalah dibaok katangah (hihihihi… muji
diri sendiri?) kato ambo ndak kapandai no ka dapua do.. dek sangkek kaciak ambo
manjoan sangaik.. dek bunsu ndak baradiak lai, tapi dari abang2 no labiah tageh
lo no laih.. kadang cando laki2 miang den caliak.
Supir 1 : Baa dek mantun kecek Apak?
Pak Aji : Iyo.. ano tun mancandu lo mamapeh..talabiah mamapeh ka lauik.
Agaklah..paruik no gadang lah ka ampia malatuih, masih dilakik an no juo
mamapeh ka tangah lauik tan..ampun den maagak i….panek mangecek sen awak
noh..nan dino dilaluan no juo..baa laih.. no lah awak sarahan ka minantu wak ko.
Minantu : Yaa Papa..kan wajar mah pa? Kalo Si Kenek ni Wa bawa mah susah..ntar
Wa lapar jo haus mah di tangah laut tan..antah mau antah tidak dio menyediakan
makan minum..kalo Wa bawa si rina..dia tak nyusahin..ikat mata kail sampe makan
minum beres semua..kadang dia pula yang dapat ikan paling banyak..yaa mending
Wa bawa dialah Pa..dari pada bawa si kenek ini..hehe
Pak Aji : Antahlah yuang yuang.. kalian samo sen..Ntu kini si Zaki cucu den
babaok lo mamapeh kalauik yiah?
Minantu : Ya iyalah Pa.. masak iya dong? Hahaha orang dia juga suka kok,
adventure Pa? kalo ndak nurunin kakeknya ya siapa lagi Pak?
Pak Aji : memanglah kalian..
Sitokar : (sambia mangulek) Ndak baitu nan rancak doh..kok wak rancang mamapeh
rami2 baa gak no ? suruah si rina mambuek baka awak..(dasar tukang paragade)..
MInantu : Tidak baa do Da? Biarlah di cari hari nan rancaknya..
Pak Aji : Pailah kalian..aden ndak sato doh..lah cukuik dek den katu sari2
taisuak..aden ka pai ka surau laih..
Mako bubarlah coffe morning pagi tun nak ka pai ka tampek Uni Ipah di sungai
tanang..rencanano nak ka mancaliak Sungai Tanang…
Biaso no lagu tadanga :
Babendi bendi.. ka sungai tanang.. aduhai.. sayang..babendi.. bendi..
Kini batuka job a oplet oplet.. ka sungai tanang…aduhai.. sayang…ba oplet
oplet.. hehe..
“To be continued” bg nan suko hati..silahkan disambuang..
Talabiah takurang banyak maaf
Wassalam
Rina, 32, batam
--~--~---------~--~----~------------~-------~--~----~
.
Posting yg berasal dari Palanta RantauNet ini, jika dipublikasikan ditempat
lain harap mencantumkan sumbernya: ~dari Palanta r...@ntaunet
http://groups.google.com/group/RantauNet/~
===========================================================
UNTUK DIPERHATIKAN, melanggar akan dimoderasi/dibanned:
- Anggota WAJIB mematuhi peraturan serta mengirim biodata! Lihat di:
http://groups.google.com/group/RantauNet/web/peraturan-rantaunet
- Tulis Nama, Umur & Lokasi pada setiap posting
- Hapus footer & seluruh bagian tdk perlu dalam melakukan reply
- Untuk topik/subjek baru buat email baru, tidak dengan mereply email lama
- DILARANG: 1. Email attachment, tawarkan disini & kirim melalui jalur pribadi;
2. Posting email besar dari 200KB; 3. One Liner
===========================================================
Berhenti, kirim email kosong ke: rantaunet-unsubscr...@googlegroups.com
Untuk melakukan konfigurasi keanggotaan di:
http://groups.google.com/group/RantauNet/subscribe
-~----------~----~----~----~------~----~------~--~---
