KERALA (Catatan Perjalanan sederhana yang ditulis seorang amatir-an) Kerala secara geografis terletak di India barat daya nan menghadap ke laut Arab. Dalam kelompok administratif, Kerala masuak India bagian selatan. India bagian selatan ini terdiri dari 4 negara bagian (state): Andhra Pradesh dengan ibukotanyo Hyderabad, Karnataka dengan ibukotanyo Bangalore/Bengaluru, Tamil Nadu dengan ibukotanya Chennai (Madras), dan Kerala dengan ibukotanya Thiruvananthapuram.
Rencana kunjungan ke Kerala nan hanyo 3 malam 4 hari mambuek kami harus menentukan pilihan, daerah mano dari negara bagian Kerala nan akan dituju. Bukannyo kota Thiruvananthapuram (Thrivandrum) yang merupakan ibukota negara bagian Kerala, tapi ambo piliah langsung ka district Ernakulam dengan ibukotanyo Cochin atau Kochi, nan lebih dikenal dengan istilah "The Queen of the Arabian Sea", sebuah kota pantai hi-tech nan hijau, dibatasi oleh perairan baik sungai dan danau/laut dengan pulau-pulau kecil, Kondisi ikolah nan menyebabkan Cochin sangat diminati wisatawan, tarutamo dari subarang (Arab). Sahinggo banyak penerbangan dari Dubai, Abu Dhabi, Bahrain, dan Riyadh nan langsung ka Cochin dan ka Thiruvananthapuram. Penerbangan dari Bangalore ka Cochin pagi hari minggu tanggal 9 Agustus 2009 nan lalu tu agak lain taraso. Mungkin dek badan ambo nan masih kurang fit habis sakik di tambah pulo pesawat nyo barupo pesawat ba badan randah, tipikal pesawat baling-baling India. Sayok pesawat justru jauah di ateh kapalo awak. Walaupun alah beberapo kali mancubo naiak pesawat ketek ba penumpang 10 urang katiko pulang baliak dari Wyoming ka Colorado waktu di Amerika dulu, namun badan pesawat masih cukuik tinggi dari tanah. Tapi pesawat dari Bangalore ka Cochin nan ambo tumpangi ko sabana talanyak ka tanah. Padohal pesawatnyo cukuik gadang dengan 82 bangku penumpang. Tinggi badan pesawat hanyo satinggi diameter roda pesawat dan ketek pulo dari ban mobil. Oalah.... Tinggi pulo janjang pintu bus ANS daripado janjang pesawatnyo. Katiko take off indak baitu taraso, tapi katiko ka mandarek, ondeh mak, agak gali juo, lah raso ka mandada ikua ko ka tanah, nan roda pesawat alun juo menyentuh landasan, hehe. Iyolah... ambo cuma anak dusun dari Kukuban nan baraja naik pesawat, gamang nan lai :) Secara umum, (kecuali di New Delhi nan hanyo bilingual, Hindi dan Inggris), informasi dan pengumuman di India disadiokan dalam 3 bahasa, yaitu bahasa lokal, bahasa Hindi dan bahaso Inggris. Tampek nan juo cuma bilingual ambo liek di kota Agra (tampek bangunan Taj Mahal) di negara bagian Uttar Pradesh karano mayoritas penduduaknyo memang ba bahaso Hindi. Tapi misalnyo nan ambo liek di Chandigarh, informasi disadiokan dalam bahasa Punjabi, Hindi dan Inggeris, dan di Bangalore pakai bahaso Karnataka/Kannada, Hindi dan Inggeris, atau nan ambo liek di Hyderabad pakai bahasa Telugu, Hindi, dan Inggris. Baitu juo tampek-tampek lainnyo nan juo sempat ambo kunjungi. Mungkin hal iko disebabkan perbedaan bahaso lokal di India tidak hanyo dalam kato-kato, tapi juo alfabet, skrip dan bantuak hurufnyo nan aneh-aneh dan ba beda antaro satu bahasa lokal dengan bahasa lokal nan lain. Makonyo setelah penerbangan sekitar satu satangah jam dari Bangalore menuju Selatan dan pesawat mendarat di Cochin International Airport, Nedumbassery, ambo agak surprise juo, karano indak sarupo di kota-kota lain di India, di Cochin informasi hanyo disadiokan dalam duo bahaso, Bahaso Malayalam dan Bahaso Inggeris. Kato kawan ambo, hal ini disebabkan karano kalau bahaso lokal lain masih diturunkan dari bahaso Sanskrit yang merupakan akar bahasa Hindi, samantaro bahaso Malayalam indak. Wallahu'alam. Begitu mendarat, ambo lah raso di Ketaping :) Perjalanan sejauh 35 km dari Airport ke Cochin city sabana raso pulang dari Padang ka Maninjau sajo. Sapanjang jalan sawah mambantang, batang karambia di sana-sini, parak, pohon mangga, cubadak, batang pisang, sadonyo dilewati di tapi jalan, ondeh mak. Rumah-rumah penduduk juo sangat mirip jo rumah urang awak di kampuang atau di Indonesia secara umum. Kalau di tampek lain di India, atok rumah dari beton data bantuak ubin talakok, tapi atok rumah-rumah di Kerala punyo kemiringan sarupo di tampek awak, dan bahan atoknyo juo genteng dan seng. Hal iko hanyo ado di Kerala, daerah nan sangat mirip Minangkabau dengan penduduknyo babahaso Malayalam (Malaya lam?), dan urangnyo di sabuik Malayalis. Mayoritas beragama Hindu, walaupun cukuik banyak juo nan baagamo Kristen dan Islam. Manuruik legenda, tanah Kerala adolah hadiah dari "Parasurama", yaitu salah seorang dari sepuluh "Avatharas" atau reingkarnasi sang Dewa Wisnu. Dipercaya bahwa katiko Parasurama melemparkan pedangnyo ke laut, terbentuk lah suatu tanah. Tanah itu sendiri kemudian dinamakan "Kerala" karano di ateh tanah hasil 'lemparan' Parasurama tu banyak tumbuah batang "Keram" (kelapa). Lagi-lagi mirip jo minangkabau karano di awak namonyo Karambia, sadangkan di Kerala namonyo Keram. :) Kebetulan kalau diliek selintas dalam posisi dua dimensi, Kerala ko agak mirip jo pulau Sumatera, membentang miring dari timur laut ke tenggara. Sementaro di sebelah baratnya adolah laut arab. Ambopun sempat 'takicuah', katiko staf dari Kerala tourism maagiah ambo peta negara bagian Kerala, sangko ambo itu peta pulau Sumatera :) Minggu sorenyo, kami jalan-jalan di Mahatma Gandhi Road sekitar hotel dan ke pantai Cochin, ondeh... raso di Pantai Padang awak dek ee. Pagi-pagi, Senin tanggal 10 Agustus 2009, sasudah subuah jo sarapan, kami di hotel di japuik oleh petugas paket pariwisata nan lah di pasan. Ciek bus dan ciek oto jip lah tasadio ka maangkuik rombongan kami. Karano rencana pagi tu ka bakunjuang ka pedesaan, ambo piliah naiak oto jip. Tujuan pertamo adolah kunjungan ke pedesaan di Alleppey District untuk menikmati suasana pedesaan Kerala, dan melalui Willingdon Island nan jaraknyo hanyo 50 menit dengan mobil. Sapanjang jalan suasana daerah tropis dan bangunan rumah-rumah penduduk nan mirip di Indonesia sangat mendominasi. Indak pernah ambo menemukan suasana seperti itu di tampek lain nan kebetulan pernah ambo kunjungi baik di India utara sampai India selatan. Sapanjang jalan sawah mambantang, baik itu ditanami padi ataupun sayur-sayuran. Urang di tapi jalan juo banyak manjua karambia mudo, hehehe, tabik salero jadinyo. Sampai di Alleppey atau Alappuzha, nan sering disebut "the Venice of the East", perjalanan kami lanjutkan dengan duo buah country boat nan lah disiapkan, perahu kayu ba atok bambu ba campua rumbio untuak penumpang maksimum 15 orang. Pandayungnyo juo galah panjang nan dijalankan oleh panduduak setempat, tapi inyo bisa berkomunikasi dengan bahasa Inggeris dialek Malayalam. Menyelusuri sungai/kanal gadang 'snakewater' pagi tu sabana raso babiduak-biduak di danau Maninjau wakatu ketek-ketek dulu. Batang beringin jo batang jawi-jawi tumbuah labek manjorok masuak aie. Batang karambia babarih pulo rancak-rancak sapanjang tapian. Cuma karano aie kanal agak kumuah dan hijau di ganggang, ambo jo kawan-kawan indak barani mamasuakkan tangan ka dalam aie doh. Apolai tukang pendayuang jo galah panjang nan cukup mahir bahaso Inggris ala malayalam tu maingekkkan hati-hati, karano sasuai jo namonyo, kadang-kadang ado ular malinteh baranang dakek biduak, hiiiii, Iyo lai duo tigo ula ketek nan baranang nampak. Tapi nan kami takuikkan sabananyo justru buayo, nan Alhamdulillah lai indak ado. Perjalanan jo biduak kayu nan agak ngeri tu ditingkahi kawan sa grup perjalanan nan asyik manyanyi-nyanyi jo bahaso Punjabi (mereka turis dari Punjab, India Utara, persisnyo sebelah utara Delhi). Karano kami ndak mangarati, ambo jo kawan sarombongan nan dari Parancih, Aljazair, Philipinnes dan Afrika selatan tu cuma galak-galak sengeng jo ikuik batapuak-tapuak tangan, sambia asyik mamoto-moto buruang kingfisher nan sadang mamburu ikan. Sakali-kali kami agak tapakiak juo kalau biduak agak oleng. Kok karam beko... Baranang Insya Allah tantu indak masalah bana di anak urang Maninjau doh, tapi baranang jo ula, hiiiiiii. takuik, ;) Setelah perjalanan biduak 40 menit, biduak mandarek di sebuah kampuang pedalaman di daerah Alleppey. Perjalanan singkat cross country desa di mulai. Sambia menyusuri jalan-jalan, *guide* indak baranti manjalehkan ka rombongan tentang berjenis-jenis tumbuhan dan buah-buahan di Kerala nan indak ado tumbuah di tampek lain di India. Begitu semangat nyo *guide* manunjuak kiri-kanan jalan sambia maagiah tahu nan ma nan batang pisang, batang pinang, batang cubadak, batang rambutan, dan lain-lain. Kawan-kawan sa rombongan banyak nan takjub, hanyo sajo ambo nan digadangkan dalam parak di dusun pinggiran danau Maninjau lah galak-galak sengeng sajo maagak-i. Karano kami banyak sa rombongan, banyak pertanyaan-pertanyaan dari rombongan tentang tumbuhan tu nan indak takamehi lai di guide, ambo pun manyadiokan diri jadi guide amatir indak bagaji, hehehe. Indak lamo kami lah sampai di perumahan penduduak, maliek apak-apak ma nenun aleh kaki dari banang rami (Coir). Rumah-rumah penduduak di situ ketek-ketek, tapi ba atok seng. Kaum perempuannyo nan alah paruah bayo mamakai 'saree' atau 'sari', sementaro apak-apaknyo mamakai 'sarong'. Tapi caro pemakaiannyo indak persis jo apak-apak di kampuang awak mamakai kain saruang doh. Kalau apak-apak di kampuang awak lakek saruangnyo rapi dan kuat :) Setelah pueh di pedalaman tu, kami ba biduak baliak di tampek samulo. Kembali ka pangkalan asal di mano bus jo oto jip manunggu. Sayang hari mulai hujan jo angin kancang, sahinggo perjalanan babaliak jo biduak kayu tu indak lai sa nikmat sa mulo. Rombongan kami di bao baliak ka daerah Ernakulam (nan ibukotanyo Cochin), Karano sampai kini ambo masih alun bisa mambedakan nan ma nan masjid nan ma nan gurudwara (tampek beribadat urang Sikh) di India ko, kecuali lah sampai bana di pintu gerbang nyo dan mambaco ado ndak tulisan mosque atau huruf arabnyo, mako katiko ambo maliek ado bangunan sarupo musajik, ambo langsung batanyo ka guide, "Is it a mosque or a Gurudwara?. Eh jawab guide dengan kalemnyo: "That building is for Muslim, Madam. Here, we name it Masjid", hehehe. Kawan-kawan langsung tagalak kakah maledek ambo. Di perjalanan ambo sempat pulo tapana mandanga musik dari sebuah rumah penduduak di tapi jalan, nan sangat mirip jo intro musik saluang awak. Walaaah... jadi taragak pulo ambo basaluang dulu agak ciek lagu, hehe. Babaliak ka district Ernakulam, kami di suguhi makan siang ala India/malayalam. Makan di piriang layah bantuak baki khusus dengan salah satu sisinyo ba lubang-lubang bantuak cetakan agar-agar. Di tiok lubang mangkuak tu lah ta isi masing-masing nyo samba, gulai, sayua, dan lain-lain. Tukang tatiang asyik ba puta-puta jo baskom atau pitalai laweh baisi nasi untuak manambahkan nasi urang nan tingga saketek. Tukang lainnyo asyik pulo mambao satumpuak embe ketek barisi ba macam gulai jo samba. Kalau di lieknyo mangkuak gulai urang lah tingga saketek, d tambahnyo gulai. Kalau mangkuak sayua nan nampak lah habih, lah dicorohkannyo pulo dari embe ajaib nyo tu. Kadang-kadang lah ikuik tangannyo mancorohkan. Alamak... bukannyo batambah lamak makan, salero ambo hilang jadinyo :( Katiko minum mulai disajikan dari embe ka galeh-galeh loyang nan talatak di meja. Ambo capek maagiah kode kawan, dan kami minta minuman botol, sahinggo bisa manolak minuman galeh tu secara halus, sementaro mereka ndak tasinggung. Bukan bermaksud merendahkan sih, tapi kami labiah bajago-jago jo kebersihan makanan nan ka masuak paruik. Setelah istirahat makan siang, Oto bus jo jip maantakan kami ka Cochin Marine. Pemandangan sabana rancak sahinggo ambo lah asik pulo patiak sana patiak sini walaupun cuma fotografer amatir :). Untuang memori kamera ambo juo lah bakosongkan dulu pagi harinyo, sahinggo labiah bebas marekam atau mamoto apo nan 'menggoda mata' :) Tujuan selanjutnyo adolah Fort Kochi, nan membutuhkan satu jam perjalanan naik motorboat atau perahu motor dari Pantai Cochin. Sepanjang perjalanan kami bapapasan jo kapa-kapa gadang mambao container atau barang tambang. Ditambah pulo beberapo tanjuang nan di lalui dakek motorboat tu. Untuak ukuran pantai, kami agak heran juo, baa kok rancak bana tingkah laku ombaknyo, indak gadang bana sahinggo perjalanan taraso lamak. Eh, kironyo kato guide, nan kini awak harungi alun laut Arab lai, tapi baru Danau Vembanand. Aie nyo masih aie tawar. Nanti di Fort Kochi, muaro ujuang danau ko, baru di sinan muluik laut arab, nan aienyo asin. Diliek baliak patunjuak, map dan brosur dari package tour, kironyo iyo. Hehehe, kami sadonyo tagalak-galak, takicuah ughang sa kapa e dek ee. Setelah perjalanan air salamo satu jam, kami tibo di muluik laut Arab nan jadi kaba tu. Begitu motorboat mandarek di Fort Kochi, suasana multi etnik langsung taraso. Sajak dari pedagang pelabuhan, caro urang berpakaian, sampai rumah-rumah atau perkampungan. Kampuang-kampuangnyo agak tersentralisasi, sahinggo ado kampuang Arab, kampuang Yahudi, kampung Portugis, dan lain-lain, tamasuak kampuang asli. Sangat banyak pulo nan bisa di liek di siko. Ado Istana Mattancherry nan dibangun Portugis tahun 1557 dalam bentuk rumah tradisional Kerala "Nalukettu" (rumah gadang ampek balai) nan kemudian diserahkan ka rajo Kochi Veera Kerala Varma. Ado istana atau rumah yahudi "Synagogue" nan dibangun tahun tahun 1568. Ado Rumah Vasco da Gama, Pekuburan Belanda, Gapura VOC, Gereja St. Francis, dan lain-lain. Salain Vasco da Gama, ternyato dari informasi nan ambo tarimo, Marco Polo pun pernah singgah di siko. Setelah ba main-main sabanta di *Vasco da Gama Square*, kami akhirnya mangunjungi Gereja St. Francise nan di bangun keturunan Portugis Prancis tahun 1503. Gereja nan asalnyo di bangun dari kayu tu kemudian di awal abad ka 16 lah diganti jo bangunan batu/semen. Katiko Vasco da Gama maningga di Cochin tahun 1524, di makamkan di tampek ko. Walaupun 14 tahun sasudah Vasco da Gama maningga, jasadnyo di bao pulang ka Lisabon, tapi bakeh kuburannyo tatap dijago dan jadi tujuan wisata sampai kini. Di pantai Fort Kochi, kami juo di suguhi pemandangan nelayan satampek nan manangkok ikan secara tradisional nan disabuiknyo "Chinese Fishing Net". tradisi nan di bao urang Cino ka situ dan dipertahankan sampai hari kini. Tapi nampak di ambo mirip juo jo caro urang awak manangkok ikan. Jarek/net gadang ba tiang panjang di banamkan ka dalam aie, lalu nantik di angkek tibo-tibo sahinggo banyak ikan-ikan ketek ta bao. Jadi di nagari awak ado juo :) Karano hari lah sanjo, kami babaliak ka Cochin city. Kunjungan labiah dakek ka daerah dan mengenal lebih jauh tentang Kerala kami rencanakan bisuak harinyo. Karano itu kami baniat mangunjungi temple-temple, museum, art galery, dan lain-lain nan bisa mengekspresikan gambaran urang Kerala labiah jauh. Untuak itu mangunjungi Temple di Chottanikkara dan The Hill Palace Museum di Thripunithura adolah agenda utama hari berikutnyo. Dan supayo labiah bebas, hari berikutnyo kami maambiak private package tour sajo, sahinggo bisa bak kato awak kama ka pai jo bara lamo wakatunyo. Kerala memang lain dari nan lain. Karano di situ matrilineal, khususnyo nan masih di pedalaman, mako mereka juo punyo datuak-datuak (karanavar) dan kapalo kampuang (taravad). Adat matrilineal jugo mambuek posisi padusi cukuik berperan dan dihormati sarupo hal nyo di ranah Minang. Itu pulo lah barangkali sababnyo mereka jugo mengenal konsep rumah gadang. Kalau di awak ado rumah gadang sambilan ruang, atau mungkin limo ruang? Rumah besarnyo di Kerala ado nan Nalukettu (rumah empat balai), Ettukettu (rumah delapan balai), dan Patinjarekettu (rumah 16 balai). Peran mamak/uncle juo sangat di hormati nampaknyo di siko. Dalam salah satu Relief nan ambo liek di dinding bangunan, ambo takajuik karano bangunan dalam relief sangat mirip pulo jo lumbuang padi rumah gadang awak. Apolai di sabalah rumah ketek jo atok malangkuang tu ado pulo relief batang karambia nyo. Alamak... Bantuak gambar awak katiko ketek-ketek, kalau di suruah guru manggambar, kito cenderung manggambar dangau ketek ba atok bantuak lumbuang padi, tapi di tangah sawah dengan latar belakang gunuang, dan dakek tu paralu basalek kan pulo batang karambia agak sa batang. hehe. Cuma nan mambedakan saketek, di suduik rumah dalam relief tu, ado relief DEWA, hehe. Jadi jo Minangkabau tu indak mirip bana lai doh, hahaha. Kalau ado dunsanak nan sadang mampalajari Matrilineal, rancak di kaji pulo ko mah. Jalan-jalan lah ka Kerala tu, tapi bao ambo jadi guide yo, hehehe. Apokah ado kekerabatan Minangkabau jo tanah Kerala? Baa kok banyak kemiripannyo. Kalau cuma sekedar samo-samo di daerah tropis, banyak tampek lain nan juo daerah tropis, tapi indak sarupo kemiripan antaro Kerala jo Minangkabau. Apokah dulunyo urang Kerala datang dari Minangkabau atau sebaliknyo????? Bialah urang nan profesional di bidangnyo nan manjawab, bukan ambo nan indak mangarati apo-apo :) Eh....Ondek mak... lah siang mah yo Manulih lah sajak parak siang cako Mantang-mantang hari ko indak karajo Di baehnyo bamain internet sajo Padohal tugas lah talungguak pulo Ah...Lah jadih tu bacarito Paling indak utang jo janji ka mak ngah lah tapanuahi pulo :) Janji tapaso dipanuahi, apolai hari kini puaso :) Oh...Kironyo manulih ko lameh juo Apo lai dek lah panjang bajelo-jelo Dan ambo cuma manulih amatir pulo Ambo takuik urang pun berang karano seso Jadi laporan pandangan mato ambo cukuik kan sampai di siko Tarimo kasih panutuiknyo Salam jo maaf dari ambo. New Delhi, 29 Agustus 2009 Wassalam Rita Desfitri Lukman Murai Kukuban NB. Mak Ngah, Ambo lah mengundurkan diri dari kegiatan minggu kini di Hyderabad (Andhra Pradesh) karano awal puaso, baitu juo minggu muko di Allahabad (Uttar Pradesh). tapi kalau minggu muko di Allahabad tu ambo tapaso ikuik juo, Insya Allah awak cigok pulo urang mandi di Sungai Gangga tu yo. Eh, tapi mancigok urang mandi tu puaso batal ndak yo? ha ha. --~--~---------~--~----~------------~-------~--~----~ . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, kirim email kosong ke: rantaunet-unsubscr...@googlegroups.com Untuk melakukan konfigurasi keanggotaan di: http://groups.google.com/group/RantauNet/subscribe -~----------~----~----~----~------~----~------~--~---