Assalamualaikum warahmatullahi wabarakatuhu, Alah lamo ambo mandanga dari Angku Lembang dalam komunikasi paribadi nan bahaso ayah maningga wakatu parang. Tapi detailno iyo baru kini agak jaleh di anbo. Walaupun lah jauah di maso lalu, kito tatap mandoakan keselamatan arwah beliau di Alam Baqa bersama para syuhada teraniaya entah di mana. Kita semua berserah diri kepada Allah yang Maha Kuasa.
Baitu juo ambo tagugah dan panuah raso simpati mambaco postiang Kenangan Angku Lembang nan mangikuti posting tukang Tunjuk tu. Satantangan tanggl 26 Juni 1957 tu iyo tapek Hari Kamih. Tapi "sahari sabalun hari rayo haji" tu mungkin pralu dikana baliak karano manuruik panyilauan ambo Hari Rayo Haji wakatu itu 10 Zulhijjah 1377 jatuah pado hari Sabtu. Tapi mungkin juo hari Jumaat sabab di kampuang awak ado hari rayo nan dahulu bakudianan babeda hari. Untuak silau-silauan tanggal dan mancocokkan hari jo tanggal Masehi jo Hijrah, caliak link ko. http://www.fourmilab.ch/documents/calendar/ Kapado Adidunsak nan basamo rancak link ko disimpan, banyak gunonyo untuak manccocokkan tanggal-tanggal dan hari Sejarah, tapi juo untuk catatan-catan paribadi. Misanyo untuak mancocokkan Hari dan Tanggal Hari Lahia dalam tahun Masehi jo Hijrah. Kenangan ambo. Saketek manjapuik Kenangan Sejarah dan pengalaman Pribadi ambo. Ambo ado di Kamang di sekitar minggu-minggu kejadian Ayah Angku Lembang tu, tapi lah awal Juli rasonyo. Ambo indak takana bilo Hari Rayo Haji wakatu itu sabab mungkin ambo sadang dalam pajalanan dari Palembang baliak ka Bukittinggi. Jadi, ambo sampai baliak ruponyo urang sudah hari rayo haji. Sabab Hari Rayo Idl Fitri 21 April 1958, Senin, ambo ado di Palembang salamo kiro-kiro duo bulan. Pak Natsir memberikan khutbah Hari Rayo di Batu Sangka. Teks Khutbah baliau ambo dapekkan dari baliau dan lamo ammbo simpan dalam pajalanan. Tiok ambo baco Kutbah tu dalam pengembaraan, aia mato ambo tatap balinang. Waktu baliak dari Palembang tu, sampai di Bukittinggi ambo mancirupuih pulang kalua kota. Barapo hari di rumah kami rendezvous jo duo kawan nan samo-samo pulang dari Palembang. Sjofjan Asnawi dan Ridwan Asky, (kaduonyo kini alah alm.) turun di Padang Lua mancirupuih ka rumah Urang Gaek Sjofjan. Tapi sabanta di rumah tapaso ijok, karano kadatangana Sjofjan babaun di tukang tunjuak pulo. Mereka menghilang ka Banuampu dan kami rendezvouz di Ampek Angkek. Kami cari Tuan Dala (Pak Decha, Dalailul Chairat, kepala Penerangan Sumatera Tengah) ka Aia Tabik untuak informasi di ma Pak Dahlan. Tuan Dala ado di Cangkiang kambi bqasuo di sinan. Dari Cangkiang kami taruih ka Kamang malalui Tanjuang Alam dan Pakan Kamih. Tapek seperti petunjuk, kami basuo jo Pak Dahlan di Bansa. Salamo satangah hari kami jo Baliau malaporkan perjalanan kami nan baliau dan Pak Natsir tugaskan. Sanjo hari tu, mortir mahampeh-hamapeh pulo ka arah Kamang. Pak Dahlan dan kami ijok berpencar. Sudah aman kami (nan batigo) lalok di suatu rumah antaro Bansa jo Tarusan. Pak Dahlan minta kami manamui Mayor Nusyrwan di Sungai Dareh, karano Pak Dahlan indak mamaciak Penerangan lai, lah pindah ka Pak Natsir. Sudah basuo jo Mayor Nusyirwan, baliau ingin kami tingga bakarajo jo baliau. Namaun kami bapikia sabalun manjawab iyo. Waktu baliak dari Sungai Dareh ka Bansa-Tarusan, ari alah sanjo dan akhirnyo kalam. Kami jalan mamutiuh sawah-sawah dan manggunokan suluah jarami. Kami iandak tahu uang sadang waspada pulo malam tu. Hampia sampai di tapi labuah dakek tampek kami ka bamalam tu kami diagiah signal tanyo "Siapa" oleh komandan mereka. "Kami, Mahasiswa", jawab kami. "Mahasiswa opo kowe" kecek komandannyo dengan logat kejawa-jawaan. Ruponyo tentera PRRI nan ado di sinan tu lah siap siaga tiarap lengkap dengan senjatonyo ka mahadang kami. Untunglah, nan batanyo ka kami tu akhirnyo tahu kami dalam perjalanan dibawah tugas Pak Dahlan. Sasudah mangecek-ngekck kamudian kamai tahu kamandan tu bagala dipanggiakan kawan-kawannyo sabagai Ustaz Kapia. Garahnyo macam-macam, logatnyo dapek batuka-tuka. Kami lah bari tau ka Mayor Nusyirwan bahaso kami ingin mancari Pak Natsir untuak mambari laporan pajalanan kami. Baliau lah bari patunjuak kama ka pai. Bisuaknyo kami barangkek maninggakan Tarusan, masuak rimbo partamu kali mannyubarang Agam jo Limopuluah ka Suayan. Pangalaman masuak rimbo partamu kali tu iyo mengharukan karano kami hilang di jalan manamuah rimbo tu. Wakatu itu alun banuyak urang masuak rimbo lai. Kami akhirnyo sampai lah malam di Suayan. Kami malapor ka Wali Nagari dan bamalam di Suayan. Bisuaknyo, kami barangkek naiak bukik ka arah Timur Suayan manuju Ranah Limo Puluah nan disabuik Pek Mudiak. Tapi, apo nan tajadi? Sasudah kami batigo sampai di ateh puncak bukik, istirahat sabanta manikmati pamandangan Ranah Indah Limopuluah di sabalah Timur kami, tibo-tibo ado rombongan maojok-ojok mandaki bukik dari arah Timur. Alahamdulillah, kami tacangang dan badoa alhamdulillah. Ruponyo itulah Rombongan Pak Imam (M. Natsir) nan sadang kami cari. Tuhan mempertemukan kami di Puncak Bukik Suayan. Sampai di puncak, baliau tarangah-angah duduak di batu. Maangguak-angguak sambia mambaco alhamdulillah. Kami lah baliak dari Palembang dengan selamat melaksanakan tugas sajak baliau dan Pak Dahlan menugaskan kami pai barangkek dari Bukittinggi, Minggu tanggal 13 April 1958 sabalunnyo. Di Puncak Bukik Suayan tu lah kami mambari Laporan Lisan, saroman laporan ka Pak Dahlan di Bansa kapatang. Sasudah mandanga laporan kami, baliau tulih surek nota ketek, berikan kapado kami. Paciak surekko, sampaikan ka nan baliau alamatkan Angku Dt. Rajo Malano. Surek ko langkok mearupokan check, dimaa ka tingga dan sagalo kaparaluan lah ado di ssinan samantaro manunggu. "Teruskanlah perjalanan tuan-tuan ke Limopuluh. Tunggu saya di sana, sampai ada berita dari saya kemana lagi. Saya akan trus ke Agam," kata beliau. Kami berpisah, bersalaman berangkuman diiiringi doa selamat jalan. Dompet Ayah angku Lembang. Nah, Carito Dompet dari Ayah Angku Lembang ko Cocok bana. Ruponyo Ayah alah tahu bahaso Pak Imam akan ka Kamang, dan pitih tu lah baliau sadiokan kalau basuo. Waktu, tempat, dan suasana carito Angku Lembang, cocok jo Carito Pajalanan ambo dan Pajalanan Pak Imam wakatu itu. Sakitulah dahulu sekedar kenangan penjampuik cerito. Salam, --Nyiak Sunguik Sjamsir Sjarif --- In rantau...@yahoogroups.com, Muhammad Dafiq Saib <stlembang_a...@...> wrote: > > Wa'alaikumussalaam wa rahmatullaahi wa barakaatuhu > > Manolah angku Abraham Ilyas sarato dunsanak salingka palanta > > Tarimo kasih ateh empatino. > > Tanggal nan tapek adolah tanggal 26 Juni 1958. Sahari sabalun hari rayo > Haji. Hari Kamih tu biasono ayah ambo pulang ka Koto Tuo kampuang ambo. Dan > ambo dapek tugas dari baliau untuak mancarian kalikih (sabanano disadioaan > mak tuo ambo, ambo tingga manjapuik sajo lai), talua ayam jo daun bungo > putiah. Baliau suko dan biaso minum ramehan daun bungo putiah, dan sangat > suko jo kalikih. > > Hari Kamih tu tanyato baliau indak pulang-pulang do. Ambo manantian baliau ka > makan sampai agak laruik malam sampai ambo indak makan samalam tu. Bisuakno > hari Jumaaik adolah hari rayo Haji. Sasudah sumbayang hari rayo, ado urang ka > rumah. Disangko ibu ambo urang ka bahari rayo. Walaupun di hari rayo haji > biasono jarang urang datang bahari rayo. Sudah itu datang pulo urang duo tigo > lai. Ibu ambo muloi batanyo-tanyo, ado apo. (Bagian nan iko ambo dapek dari > carito ibu ambo). Nan ambo sandiri sadang di rumah mak tuo ambo di sabalah. > Tagak-tagak dakek pintu jandela. Sudah tu nampak di ambo mak ngah ambo > manangih sambia balari dari rumah nan lain manuju ka rumah kami. Ambo batanyo > ka mak tuo, baa mangko mak ngah balari sambia manangih. Indak ado jawaban > baliau do. Ambo turun dari rumah baliau naiak ka rumah kami. Ambo dapek-i ibu > ambo jo mak tuo-mak ngah jo amak-amak nan lain abih manangih. Ibu ambo > mamaluak ambo, sambia mangecek-an apa.... apa... Sampai > disinan indak juo jaleh di ambo.aa nan tajadi. > > Singkek carito, ado anak buah baliau, kami maimbau mak Kuto, urang > Panampuang, datang mambao kaba pagi tu. Baliau datang ka inyiak Muncak > (panungkek Datuak di suku kami) manyampaikan kaba bahaso ayah ambo alah > indak ado. > > Dek kayakinan urang di kampuang maso itu baliau ko mati syahid, ayah ambo > indak dimandian dan indak dikafani tapi langsuang sajo dishalatkan dan > dikubuaan. Saminggu sasudah itu kami ziarahi tampek baliau tatembak di sawah > tu. Katiko itu baliau rupono manyimpan pitih nan musti disarahan ka pak > Natsir, dalam dompet. Dompet ko rupono baliau campak-an, dan katiko baziarah > tu basuo / dapek di kakak ambo. Ado surek untuak pak Natsir tu bagai basuo. > > Itu sajolah ka tambahno samantaro, > > Muhammad Dafiq Saib Sutan Lembang Alam > Suku : Koto, Nagari asal : Koto Tuo - Balai Gurah, Bukit Tinggi > Lahir : Zulqaidah 1370H, > Jatibening - Bekasi > > ________________________________ > From: Abraham Ilyas <abrahamil...@...> > To: rantaunet@googlegroups.com > Sent: Wed, February 17, 2010 8:49:07 AM > Subject: Re: [...@ntau-net] Cerpen TUKANG TUNJUK > > > Pado suatu hari, kari Kamih sahari sabalun hari rayo Haji di bulan Juni tahun > 1958 > > Angku Muhammad Dafiq Saib nan ambo hormati. > > Assalamualikum WW. > > Salam kenal. > Pertamo ambo ikut berempati pada Angku Dafiq. > Sejarah bagi manusia memang sangat perlu untuak diambiak hikmah supayo nan > buruak indak taulang, dan elok manjadi contoh. > > Hanya para ahli (akademisi) menuntut pulo bukti tertulis untuk bisa diakui > sebagai dokumen sejarah. Manuruik ambo ikolah masalah nan ado pado kito maso > kini. > > Alhamdullilah sejarah keluarga Angku Dafiq lai ado ingatannyo nan pasti oleh > pihak keluarga yaitu sabalun hari rayo haji bulan Juni 1958. > Mungkin paralu dipastikan bana tanggal di bulan Juni 58, dan mungkin tanggal > tersebut bisa dipakai pulo oleh para penulis/ahli sejarah lainnyo nanti. > > Maaf dan salam > > Abraham Ilyas > www.nagari.org -- . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, bergabung kembali serta ingin merubah konfigurasi/settingan keanggotaan di: http://groups.google.com/group/RantauNet/subscribe
