Ma sagalo adidunsanak jo anak kamanakan di salapan pinjuru angin,
Assalamu'alaikum wr. wb.
Sato ambo saangin tantang kekejaman parang PRRI-APRI (kutiko tu di lingkuangan
rayaik dinamoan mereka "tantara pusek"). Kutiko malatuih parang ko, sajak
pendaratan APRI di Padang 17 April 1958, ambo jadi guru honor di ST Sungai Pua.
Tgl. 4 Mei 1958, APRI masuk kota Bukiktinggi pagi2 malenggang kangkuang. Dari
kampuang ambo, Galuang, ambo maliek bana tantara APRI ko bajalan kaki melewati
Padang Lua, diiriangi oto dan truk, tanpa letusan senjato ciek juo. 2 hari
sudah tu, Sungai Pua dihujani mortir nan ditembakan dari muko Jam Gadang, dek
di Sungai Pua memang ado konsentrasi tantara dan gudang senjato nan dilatakan
di gedung sikola Diniyah. Babarapo urang kampuang tewas. Bisuak harinyo Sungai
Pua diserbu dan kantua ST jo Diniyah diobrak-abrik. Buku2 pelajaran kami bateba
di lantai.
Sahari duo sasudah tu taseba kaba, pagawai negeri harus mendaftar ka
Bukittinggi.
Tanggal 10 Mei ambo mandaftar ka garnizun Bukittinggi, tapi pulang baliak ka
Galuang. Ironisnyo, kutiko ambo bajalan kaki di Birugo, ambo maliek babarapo
urang tantara nan mamakai seragam APRI, ambo kenali di Sungai Pua sebagai
tantara PRRI. Ruponyo mereka lansuang manyubarang baitu APRI masuak
Bukiktinggi.
Sikola lah indak beres jalannyo. Sasudah tu tasiar kaba parentah Dahlan Jambek:
pagawai nan mandaftar harus pindah ka kota, atau keselamatan indak dijamin.
Bisuak harinyo ambo cigin lari ka Bukittinggi, dan tingga di ruko rang Galuang
di Kampuang Cino. Kutiko penyerangan PRRI ka kota Bukittinggi bulan Juni 58
(tanggalnyo lupo ambo) ambo mangalami bana, mulai sasudah magrib bunyi badia
badaram-daram sampai jam 7 pagi bisuaknyo. Sakiro jam 8 ndak ado lai letusan,
dan tadanga kaba, puluahan mayik tantara PRRI babujuakan di jalan dakek Jam
Gadang. Ambo cigok ka sinan, batua. Ado urang nan mancubo mamareso saku mayik
tu, dan basuo a.l. kartu anggota tantara.
Sampai sanjo sambuah oto bulak baliak mambao mayik lain ka Rumah Sakik (Ahmad
Mukhtar kini). Bisuaknyo sato lo ambo pai ka RS mancaliak mayik ko, nan indak
taetong banyaknyo. Kabanyo, sebahagian gadang adolah urang manggaleh nan kalua
subuah pai ka kamar mandi umum di pasa ateh tu dan di tampek2 lain, lansuang
didor dek APRI dek disangko tantara PRRI. Hari tu, seluruh korban dimakamkan
sacaro masal di Ateh Ngarai, di balakang RS, lai ciek mayik ciek kuburan. Nan
ado identitas, apolai kok ado keluarganyo, buliah dibao pulang.
Sasudah kajadian ko sampai maso badamai, sambuah curito nan mengerikan. Ado
tantara PRRI nan tatangkok dek OPR atau APRI, tangah malam disuruah masuak
tabek dan diagiah sabatang sabun cuci Sunlight nan musti digosokannyo ka
badannyo sampai habih, baru buliah kalua. Ado nan dimasuakan ka dalam drum
minyak dan ditutuik di ateh jo seng dan dilatakan di tangah padang dibawah
terik matoari dari pagi sampai sanjo.
Batalyon B adolah kesatuan nan paliang sadis. Urang nan tingga di sekitar
batalyon ko, tiok malam mandanga luluangan urang nan disiksa. Nan paliang
babahayo adolah informan, urang sipil nan ditunjuak dek APRI jadi mato2, nan
kutiko tu tamusaua dgn istilah "12 koma tunjuak". Asa kanai tunjuak dek
informan ko, lansuang masuak tahanan Batalyon B, salasai tu mah. Hampia ndak
ado nan babaliak pulang kabanyo.
1-8-58 ambo pindah maaja ka SMP Lubuak Aluang, sampai 17-9-59, saat ambo dapek
tugas baraja ka STC Bukiktinggi. Nan ambo danga di Lubuak Aluang ndak banyak
bedanyo. Sasudah ambo baliak tingga di Bukiktinggi, dek kampus kami dakek
Batalyon B, banyaklah ambo dapek curito nan mangerikan. Cuma syukurnyo, kami
kaum guru, ndak pernah dimusuahi dek PRRI ataupun APRI. Kutiko ambo jadi
mahasiswa, ambo bakonco arek jo komandan garnizun dan komandan CPM, dek ambo
jadi ketua senat mahasiswa dan kutiko kami dapek latihan militer, ambo otomatis
diangkek jadi komandan kompi mahasiswa. Jadi alhamdulillah, ambo pribadi tainda
dari situasi sadis nan dialami banyak urang sangkek itu. Nan indak pernah bisa
ambo lupokan, Oktober 1961 ambo diparentah dek komandan garnizun jadi ketua
panitia Hari Sumpah Pemuda ka 33 Kota Bukiktinggi dan Kabupaten Agam. Dari
persiapan sampai salasai ambo diagiah fasilitas dek tantara nan bakuaso di
zaman SOB tu.
mak Sati (L. 72+11+16)
asa Galuang, Sungai Pua, Agam
Jl. Sitawa 25, Tabiang
0812 6600 639 Halo
0856 689 22330, IM3
0751 9878 980, Esia
0878 2175 2424, XL
0897 4666 369 Super 3
--
.
Posting yg berasal dari Palanta RantauNet ini, jika dipublikasikan ditempat
lain wajib mencantumkan sumbernya: ~dari Palanta r...@ntaunet
http://groups.google.com/group/RantauNet/~
===========================================================
UNTUK DIPERHATIKAN, melanggar akan dimoderasi:
- DILARANG:
1. Email besar dari 200KB;
2. Email attachment, tawarkan disini & kirim melalui jalur pribadi;
3. One Liner.
- Anggota WAJIB mematuhi peraturan serta mengirim biodata! Lihat di:
http://groups.google.com/group/RantauNet/web/peraturan-rantaunet
- Tulis Nama, Umur & Lokasi pada setiap posting
- Hapus footer & seluruh bagian tdk perlu dalam melakukan reply
- Untuk topik/subjek baru buat email baru, tidak dengan mereply email lama
===========================================================
Berhenti, bergabung kembali serta ingin merubah konfigurasi/settingan
keanggotaan di: http://groups.google.com/group/RantauNet/subscribe
<<clip_image002.jpg>>
