Kanda Sutan Mancayo yth dan dunsanak di palanta mohon maaf sabalumnyo ambo ucapkan, awalnyo ambo sangko lah diporowaik ka palanta, sasudah ambo pareso ruponyo alun ado wek e di palanta lai, mangko dari itu, izinkanlah ambo mamporowaik catatan kanda di fesbuk ko ka palanta kito ko, buliah talewa pulo ka dunsanak kito di palanta. Tarimokasih
Sanak Palanta Jum'at pagi kutiko mengawasi tukang ka bakarajo, badantang sms di saku, sakatiko talipun di kambang, muncul tulisan, "Ambo ka datang ka rumah uda". Sms datang dari sabaliak bukik, kok jaman saisuak, jo telepati urang sampaikan, ternyata iko SMS dari dunsanak baru ambo dari RN, dunsanak Roni Malin Marajo. Sakatiko di irik kudo pulang, salanja inyo balari, sampai di pintu, nan roni alun mancogok juo. Dek kumandang azan Jumaik alah tibo pulo, diarahkan langkah ka musajik. Alah salasai sumbayang Jumaik, ka malangkah di pintu musajik, duduak sorang anak mudo, tapaku bana bazikir, tasirok darah sakatiko, iko ruponyo Malin Marajo, anak urang dari Pasisie. Ambo sentuh bahunyo dan ambo tanyo "iko Roni kan ? ". Sakatiko anak mudo ko manjawek, "iyo da". "Molah kito ka rumah' timpo ambo. Dululah uda, ambo dimusajik sabanta, jaweknyo. Ruponyo dunsanak ambo ko alun salasai sumbayang do'anyo. Ndak lamo kami alah bakumpua di rumah, langkok jo urang rumah Roni jo anak gadihnyo nan baru lahia pulo. Ndak lamo, sa iriang jo mato ari tagak tali, manggareok sakali lambuang tangah. Ambo minta di hidang sagalo jamba, untuak pananti dunsanak tibo. Sajak pagi ambo mintak siapkan, masakan spesial untuak Malin Marjo jo keluarga. Mako disiapkanlah pangek ijau koto gadang, goreng karupuak ubi jo bada kariang, dilepoh lado salayang, goreng talua bulek dan ikan tamban jo kantang. Ndak lupo sayua mayua palicinnyo. Ambo katokan ka sanak Malin, iko masakan khusus untuak Roni, mari kito ba nostalgia iduik di kampuang, mode iko kito makan di kampuang. Sambia makan kami badiskusi soal Randang Gulai Paku jo Lokan, yo sabana manggilo lamaknyo. Yo bana palanta RN, tampek basilaturrahmi manambah dunsanak. Kini di Batam alah ado sorang dunsanak ambo, anak mudo nan gigiah marantau, nan banamo Syafroni Malin Marajo. Indak baraso lai langang di tangah nan rami di Batam ko. Ciek lai nan menyenangkan, baliau ko mambaokan ambo tambo nagari Cupak. Ado kiro-kiro 3-4 jam sanak ambo ko di rumah, banyak curito nan di baco, sampai manyiogi-nyigi bantuak rumah, tampek biaso ambo ba interenek. Akhia kato, harus batarimo kasih ambo ka pendiri lapau RN jo urang dapua kini ko. Alah tarantang tali silaturrahmi, ranah bundo manauiknyo. Yo taraso bana pasan niniak, kalau marantau, dunsanak cari dulu. Salam Andiko Sutan Mancayo *Komen dari Malin Marajo di FB:* Manolah Ayah Amirah Cahya Andiko, satantang curito nan kanda kamukakan di palanta ko, ha iyo salut kito mambaconyo, jo ampu tangan kito acuangkan, sahabih curito kito simak, ha tiado lain kato nan bisa disampaikan, tarimokasih banyak dari kami sekeluarga nan di batu aji, kok lai umua samo panjang, rasaki lai samo ka murah, mudah2an bisa pulo kito ... Lihat Selengkapnyajalang-manjalang di maso mandatang, bakunjuanglah kanda ka dangau kami di batu aji, kok dak tatampuang jo tapak tangan, jo niru kami nanti juo... satantang pangek ijau koto gadang, iyo sabanya maknyus rasonyo, tambah pulo goreng ikan sapek kariang, .... satantang tando baputih ati untuak si aisha puti kami, insya Allah akan kami balikan ka cincin ameh buliah abadi kito kanang... sainggan itu dulu sutan.... di lain kesempatan kito sambuang baliak... wassalam. malin marajo sumber: http://www.facebook.com/note.php?note_id=329301485951 -- . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, bergabung kembali serta ingin merubah konfigurasi/settingan keanggotaan di: http://groups.google.com/group/RantauNet/subscribe
