Mak Ngah, barau-barau iyo sabana lain jo barau
Nan ciek nyo tabang, nan ciek yo baranang ..
Nan barau yo sabana ikan ... bacarito ambo saketek mak ..
Wakatu ketek ambo di Lubuak Sikapiang/Pasaman Timur, ambo acok diajak ayah
ka batang aia mancari ikan ..
Di batang aia dakek rumah kami tu kalau sadang indak wakatu larangan
(larangan = indak buliah manjalo/mamanciang ikan) iyo sabana lasuah mancari
ikan .. ayah ambo dek lah pensiun karajo beliau ka sawah jo ka batang aia
tu.
Ado ikan barau, ado ikan gariang, ikan limasai, ikan rutiang (gabus), ikan
kalang-kalang (lele sungai, sabana lamak digulai asam durian, urang siko
manyabuik lempok), bauang (mirip lele tapi badannyo labiah banyak suduiknyo,
labiah prasejarah, hehe), ikan puyu sarupo nan pernah ditulih kanda Suheimi
dulu, dan banyak bana ikan nan lain tamasuak nila, ikan ameh, ikan tonsen
(antah apo namo ikan ko di tampek lain, bantuak ikan ameh badannyo tapi
warnonyo bantuak gariang/limasai), dll ... ikan limasai tu sarupo jo gariang
tapi labiah ketek, kalau digoreng kariang jo samba lado ijau sabana lamak
rasonyo, tabayang di ambo kini ko, manitiak aia liua, rang rumah ambo nan
asli Tangerang pernah mancubo limasai lado ijau tu sampai kini takana-kana
taruih ... salain nan bantuaknyo ikan, ado pulo nan satangah ikan satangah
baluik, ado nan di kami namonyo lanjiang, ado nan namonyo tilan .. tilan jo
lanjiang ko bantuaknyo mirip lele tapi badannyo pipih dan tulangnyo pipih
pulo jadi mangupeh dagiangnyo mudah bana kalau dimasak asam padeh atau asam
durian. nan duo ko caro dapeknyo jo mamapeh/mamanciang, panciangnyo umpan
caciang, panciang diikekkan pendek sajo (sajari) ka sabatang
pariang/bambu/batuang nan lah disaruik manjadi sabantuak lidi panjang
(kiro-kiro panjang lidi labiah dari dalamnyo batang aia) .. kalau lidi tu
lah goyang-goyang, biasonyo tilan atau lanjiang tu lah dapek di awak tingga
maangkek sajo ..
Nah, kalau nan disabuik barau-barau tu tantu sajo dari alam nan lain yaitu
nan inggok dari batang kayu ka batang kayu, ndak dari batang aia doh ...
kalau ndak salah, barau-barau ko di urang jawa disabuiknyo jo
cucakrowo/cucakrawa ...
Ambo takana, dulu pernah ayah ambo mambaok barau-barau ko ka tanah jawa ka
tampek uda ambo di jl. kramat ... tapi nampaknyo dek kalua dari alam
aslinyo, barau-barau nan lah pandai baciloteh tu ndak tahan, ndak lamo
umuanyo di tanah jawa ...
Itulah kiro-kiro saketek kisah ambo, takana ambo samaso ketek wakatu sanang
mancari ikan di batang aia, mamanciang baluik di sawah, mambongka
bangka-bangka di sawah atau ditapi batang aia, atau wakatu ambo pai ka bukik
tampek kawan ambo baparak sambia kami mancari buruang, mamikek ataupun
manembak buruang jo badia angin ... sajak ambo kanai saikua induak buruang
jo badia angin tu, ambo sabana manangih dalam hati, sajak itu ambo
jaran/kapok manyakiti binatang, jadi kiniko ambo jadi panyayang binatang ...
panah pulo dulu mancari sarang buruang nan bantuak sarangnyo
malangkuang/bantuak lorong nan katonyo dibawah pohon tampek sarang tu
biasonyo dijago ula .. lupo namo buruang nan sarangnyo malangkuang indah tu
..
Sakitu dulu Mak ..
Wassalam,
Kamanakan Delfiar
Tangerang
----- Original Message -----
From: "sjamsir_sjarif" <hamboc...@yahoo.com>
To: <rantaunet@googlegroups.com>
Sent: Wednesday, March 10, 2010 8:45 PM
Subject: Re: [...@ntau-net] Pangek Barau
Pancinto kuliner nan basamo,
Apokoh "barau" ko samo jo "barau-barau"?
Takona dek MakNgahado sabarih pantun tapi lupo sambuangannyo, mungkin Rita
tahu kapanjangannyo.
Barau-barau tabang ka ...
...
...
...
MakNgha caliak CAroAwak dalam Kamus Minangkabau M. Thaib:
Barau, nama sebangsa ikan sungai
barau-barau - barau-barau [aslinyo tatulih barau2].
Taoi Makngah caliak di KBBI:
1. barau-barau, n, burung penyayi, warna bulunya abu-abu bercampur kuning;
cucak rawa. Trachyomanus macrolepidota.
2. barau-barau, n, ikan laut yangdapat dimakan; sebarau, Hampala
macrolepidota.
Thaib mangecekkan ikan sungai, KBBI mangecekkan ikan laut ... ?
Nan maa barau nan diotapangekkulinerkan siko?
Salam,
--MakNgah
--
.
Posting yg berasal dari Palanta RantauNet ini, jika dipublikasikan ditempat
lain wajib mencantumkan sumbernya: ~dari Palanta r...@ntaunet
http://groups.google.com/group/RantauNet/~
===========================================================
UNTUK DIPERHATIKAN, melanggar akan dimoderasi:
- DILARANG:
1. Email besar dari 200KB;
2. Email attachment, tawarkan disini & kirim melalui jalur pribadi;
3. One Liner.
- Anggota WAJIB mematuhi peraturan serta mengirim biodata! Lihat di:
http://groups.google.com/group/RantauNet/web/peraturan-rantaunet
- Tulis Nama, Umur & Lokasi pada setiap posting
- Hapus footer & seluruh bagian tdk perlu dalam melakukan reply
- Untuk topik/subjek baru buat email baru, tidak dengan mereply email lama
===========================================================
Berhenti, bergabung kembali serta ingin merubah konfigurasi/settingan
keanggotaan di: http://groups.google.com/group/RantauNet/subscribe
