SELEMBAR KENANGAN 2 By : Rina
"Kunci pintu Buk,' kato Bu Janne ke Buk Moy nan tagak dakek pintu masuak ruang perpustakaan sakolah tu. "Kamanga Ibuk mamanggia awak,' kecek si Upiak ka Ibuk-Ibuk guru senior no tu jo hati nan kucuik. "Barani bana awak mangadu-ngadu ka Kapalo sakolah yoh,'bantak Ibuk Janne ka si Upiak. Jo barani si Upiak manjawek,' Buk keceknyo, Ibuk-Ibuk kan alah urang tuo, baa dek balawan ambo nan ketek ko jo politik dagang Ibuk-Ibuk, bukannyo di awal sadonyo alah kito sapakati, pun ado hitam diateh putiah. Kalo kudian Ibuk-Ibuk lain etongannyo, iyo ambo indak pandai doh, ambo ko anak ketek nan masih bodoh untuak mode tu Buk, kalo Ibuk-Ibuk kurang pueh silahkan Ibuk urus jo Rang Gaek ambo. Silahkan Ibuk datang ka rumah. ' Heeehh. pandai kau manjawek yo,' kecek Ibuk Janne nan paliang gapuak diantaro tigo urang Guru senior sakolah tu nan manguruang si Upiak di perpustakaan tun. ' Kami nio baretong baliak kini, cataik bara modal kau kalua untuak pameran tun! Parentah si Ibuk Janne dek Liau salain jadi guru juo jadi pengusaha nan punyo toko di Pasa Bukik. ' Kiniko awak indak nio baetong baliak doh Buk, kalo Ibuk indak pueh silahkan Ibuk baretong jo Rang Gaek awak, sambia manahan tangih dek dihariak-dihariak si Upiak balari ka pintu pustaka nan kebetulan kunci tagantuang di pintu tun, sacapeknyo si Upiak lari kalua taruih ka arah balakang gedung Workshop, disinan si Upiak malapehan tangihnyo sajadi-jadinyo. Sambia balari kalua tu masih tadanga dek Upiak ancaman nan sorakkan dek Ibuk Janne ka inyo. Indak manyangko inyo baa kok sampai hati Ibuk-Ibuk gurunyo nan alah tuo-tuo tu babuek mode tu ka inyo. Padohal awalnyo niat hati nak baraja babisnis ketek-ketek sambia manolongan sakolah nan mamaralukan barang untuak dipamerankan di PRP (Pekan Raya Padang). Caritonyo tu sakolah si Upiak tapiliah untuak maikuti pameran PRP di Padang khusus untuak jaik manjaik sekitar sabulan pas ukatu pakansi sakolah. Dek sakolah si Upiak dapek bantuan World Bank untuak mandirikan Workshop Otomotive jo Workshop manjaik ko. Jadi stand nan ka diisi tu adolah stand pameran dari Depag Propinsi Sumbar. Dari sakolahnyo ko si Upiaklah nan ditunjuak untuak mawakili untuak tagak di stand Depag Sumbar tu. Si Upiak di Workshop tacataik sabagai murik nan paliang bisa manjaik sahinggo kadang si Upiak diagiah tugas untuak maajakan manjaik ka kawan-kawannyo nan lain. Apolai guru manjaik nan didatangkan sakolah hanyo surang pulo sadangkan nan baraja lumayan banyak. Hanyo sajo ukatu tu kato Ibuk guru si Upiak, sakolah kurang dana untuak mamodali mambali bahan untuak ditampilkan di pameran tun, makonyo di kecekkan ka si Upiak apo lai namuah maisi stand jo babarapo macam design nan alah pernah diparagokan si Upiak ka gurunyo tu. Si Upiak mangecek ka Rang Gaeknyo, dek Rang Gaek si Upiak disuruah untuak mancaritoan ka Mamak no. Mamak si Upiak manyatujui untuak mambantu si Upiak untuak manyalangan modal untuak si Upiak mambuek baragam model baju jo rok nan alah biaso dibueknyo. Katiko di sakolah si Upiak manyabuikkan manyanggupi ajakan guru no ko tapi jo perjanjian di ateh karateh. Guru no ko manyanggupi dan sepakat mamulangan harago baju nan dibuek si Upiak ko sasudah pameran salasai. Si Upiak nan manangih di balakang Workshop otomotive tu di dakek i dek kawan-kawan no. Ndee.. Upiak.. manga manangih disiko koh? Tanyo kawannyo ko. Nan si Upiak diam sajo sambia taisak-isak nyo pai baliak ka lokalnyo. Tibo di lokal ado panggilan dari kantua sakolah tu. Pailah si Upiak ka kantua, mangecek Uda-Uda petugas administrasi sakolah baso ado talepon untuak si Upiak. Si Upiak maangkek talepon tu, kironyo Apak Upiak manalepon. "Upiak. alah dibayia dek guru-guru Upiak tu sasuai parjanjian pameran kapatang tu? Tanyo Rang Gaek Si Upiak. "Alun laih Pak,' kato si Upiak. "Baa tu Pak?,' tanyo si Upiak baliak. "Indak baa-baa doh,' kecek Apak si Upiak dibaliak talepon tun. Pas pulang dari sakolah si Upiak lansuang disambuik Amakno nan kuruih tun sambia manangih-nangih. "Manga Amak?,' tanyo si Upiak. " Lai ndak baa-baa anak Amak ukatu di Padang sari?,'tanyo Amaknyo. "Baa-baa baa kecek Amak ko?,' tanyo si Upiak. "Tadi guru Upiak kamari,' manyolo Apak si Upiak. "Manga ibuk-ibuk tu kamari,' tanyo si Upiak. "Kecek mereka nio batamu jo kami, tapi banyak carito nan buruak nan mereka caritoan ka kami, satantangan pameran nan kau ikuik kapatang ko tu. Tadi tu mereka kecek baso pitih nan dipajanjian tu alah dibayiakan ka Upiak, makonyo Apak talepon Upiak ka sakolah. Apak nak ka pai manalepon tun ditagahan dek mereka tu,samakin curiga Apak jo guru-guru Upiak tu. " Tu baa jadinyo Pak,' tanyo si Upiak "Memang iyo alun diagiah laih dek Ibuk-Ibuk tu lai doh, jankan itu, bayaran kami untuak tagak di stand sajo alun ado dikaluakan laih. Sadangkan kawan nan dari Kotobaru sajak masih di Padang juo alah di agiah dek pihak sakolahnyo. Katonyo dana untuak itu alah dibayia Katua Depag sajak diajuan ka sakolah-sakolah sabalun acara tu mulai. Tapi antahlah Pak, Upiak panek dek ulah guru-guru Upiak tu, indak manyangko Upiak ka bikoan dek Guru Upiak tu doh. Mungkin Upiak akan tamui baliak Kapalo Sakolah bisuak, dek nampaknyo Kapalo Sakolah indak tau jo masalah Ibuk-ibuk tu doh. "Tadi Ibuk Upiak sempat lo mangecek baso Upiak mangecek jo kawan-kawan di sakolah kalo Uni Upiak bukan kakak kanduang Upiak, kato mereka Upiak indak maakui,' kecek Amak sambia balinang aia mato. (Kakak padusi Upiak nan paliang tuo memang indak bisa bajalan samulai dari lahia, walupun baitu Uninyo ko utaknyo encer labiah dari mereka badunsanak) 'MasyaAllah Mak..baa dek saroman tu bana du yo Mak, cubolah bayangan dek Amak tu ha, tadi pagi di sakolah pas istirahat Upiak dikuruangan di pustaka, sudah tu disuruah baetong-etong baliak tantang parjanjian tu... sambia manahan tangih lo si Upiak mancaritoan ka Amak jo Apaknyo apo nan tajadi di sakolah tadi. "Ndak baitu doh Piak, bialah Apak nan manyalasaian masalah ko. Ndak bisa wak nampaknyo mangecek jo ibuk-ibuk tu doh, ado nan diandokkannyo nampaknyo, bialah Apak tamui Apak Kapalo sakolah Upiak sasudah Ashar bekoh,' kecek Apaknyo. "Iko alah bakalabiahan bana namonyo ko,'kecek Apak si Upiak. Sasudah sambayang Ashar datang Ustadz si Upiak nan karajo di kantua Depag, sasudah mangecek sabanta di ruang tamu jo Apak Upiak pailah mereka bajalan ka arah sakolah si Upiak nan indak talampau jauah dari rumahnyo. Sabalun mugarik alah baliak Apak si Upiak dari tampek rumah Kapalo Sakolah Upiak. Ukatu makan malam bacaritolah Apak si Upiak baso Kapalo Sakolah indak tau sampai mode tu kejadiannyo, Kapalo Sakolahpun indak namuah mangecek dulu tantang iko doh sebab Liau nak ka mamanggia Guru-guru nan bersangkutan jo masalah ko. Sasudah tu baru disalasaikan Liau. Tapi di awal ko Liau minta maaf sagadang-gadangnyo ka keluarga kito. Dek ulah guru-guru tu alah manggaduah keluarga kito. Sampai-sampai baduto bagai baso alah dibayia sadonyo perjanjian nan dipajanjikan tu. Manyangko si Upiak akan katakutan sajo jo gertakan tu. Jankan ka Apak, ka kantau depag sampai ka Presidenpun ambo akan baok masalah ko jikok anak ambo dipalakukan indak sapantasnyo, samantang inyo masih ketek alun tantu jo politik dagang sagalo macam,' panjang leba Apak si Upiak bacarito. Upiak sabananyo indak manyangko akan sampai mode itu kajadiannyo. Sabalun nyo tarimo proyek ibuk-ibuk tu, hubungannyo jo ibuk-ibuk tu santianglah ka eloknyo. Mintak dijaikkan baju ibuk-ibuk tu disudahan lakeh dek si Upiak. Nan pontennyo jo guru-guru tu biasonyo lai santiang pulo. Sasudah kajadian tun jadi tabaliak sadonyo. Sabana jangga jikok dicaliak di raport si Upiak sauwek tu. Saminggu diantaronyo Apak si Upiak dipanggia ka sakolah untuak manyalasaikan parsoalan nan tajadi. Sacaro resmi sakolah maminta maaf ka keluarga Upiak malalui Apak Upiak sekaligus dibayiakan isi perjanjian pameran tu baliak ka Upiak. Katiko si Upiak datang ka Mamaknyo manyarahan salangan pitih nan dipinjam si Upiak untuak pameran tu, mangeceklah Mamak si Upiak. "Upiak, iyo barani kamanakan Mamak yoh, kalo nan lain mungkin lah kuncun sajo dipalakuan mode tun dek gurunyo. "Iyo baa dek Mamak tu, kalo Upiak takuik tantu ndak tabayia dek Upiak pitih nan Upiak salang ka Mamak ko, ciek lih walaupun itu pajabaik pamarentah bana, tapi kalo memang awak indak salah Upiak raso indak ka baa bagai awak malawan doh. Mah awak tagak dinan bana mah Mak. Untuang sari tu Mamak ingekkan Upiak untuak mambuek surek pajanjian nan ditando tangani dek Ibuk Guru tu. Kalo indak kan lain lo kajadiannyo Mak. "Iyo mode tu Piak, kan bisa Upiak baraja dari kajadian nan tajadi tu, apopun dalam urusan pitih ko awak musti bajaleh-jaleh indak bisa dek urang elok awak picayo sajo. Baa dek baitu mamak kecek an, dunia kini samakin sarik, urang nan bijak bagai kadang takijau juo dek ameh nan saketek, hilang kahormatan diri di mato urang banyak. Nan ka kateh ko Upiak musti bahati-hati laih jo urusan tarutamo nan bakaik-kaik jo pitih ko. Kan awak ndak nio doh katiko itu kawan awak, guru awak atau mungkin dunsanak awak barubah jadi musuah hanyo karano harato. Samakin tinggi batang kayu samakin dareh angin malapianyo. Walaupun baitu bana Guru Upiak ka Upiak nan Upiak jan sampai mandandam pulo ka mereka, dek baapun juo mereka tatap Guru nan maagiah Upiak ilmu jo pangatahuan salamo ko. "Iyo Mak, pasan Mamak Upiak akan kana-kana taruih, jawek si Upiak. Kawan-kawan sikolah si Upiak indak talalu tau apo nan manjadi masalah baa dek tibo-tibo guru-guru nan sayang ka inyo malah baliak mandiamkan inyo. Hanyo sebagian sajo kawan-kawan dakek si Upiak nan tau tapi mereka indak namuah ikuik campua urusan si Upiak dek mungkin mereka takuik dek nan dihadok i si upiak adolah guru-guru senior nan mamacik di sekolah di maso tu. Bagi si Upiak iko adolah pelajaran nan sangaik baharago gadang bagi iduiknyo, inyo hanyo maambiak hikmah dibaliak sadonyo kejadian itu. Takadang niaik elok nak mambantu kalo indak dimanagement sacaro elok, alun apsti akan mendatangkan kebaikan. Upiak ikhlash akan apo nan alah dilakukannyo samaso manolongan sekolahnyo tu walaupun dari realnyo indak dibaleh baiak tapi kudian hari sangaik baharago untuak baka iduiknyo sasudah tu. Barangkali si Upiak harus labiah baiak dari nan alah dibueknyo malabiahi apo nan dibuek dek kawan-kawannyo sapangkek tu. Dan itupun alun cukuik, masih banyak peluang untuak harus jadi labiah baiak.. Bagi Upiak Guru-gurunyo tu adolah tatap jadi Pahlawan tanpa tando Jaso nan manjadi Kartini jo Siti Manggopoh di bidang dan dimasonyo. Alhamdulillah. Batam, April 21st , 2010 Rina Permadi (Didedikasikan untuk Guru-guru, Kepala Sekolah dan kawan-kawan sepermainan di masa Sekolah di Gulai Bancah, Bukittinggi) -- . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, bergabung kembali serta ingin merubah konfigurasi/settingan keanggotaan di: http://groups.google.com/group/RantauNet/subscribe
