Assalaamu'alaikum wa rahmatullaahi wa barakaatuhu Kadang-kadang tagalak sengeang awak mambaco postingan di Palanta awak ko. Banyak bana macam jo ragamno. Acok pulo nampak caro pandang nan sangaik baragam untuak sabuah masalah.
Contoh, katiko nan surang mangecek-an bahaso urang lain alah babuek indak elok dek mamakai 'nan sarupo' punyo awak lalu mangecek-an itu awakno punyo. Urang Malaysia mambuek bangunan aula pameran 'agak sarupo' jo rumah adaik Minangkabau dan malangkuang atokno. Agak sarupo walau indak sarupo bana. Nan surang bapandapek bahaso urang Malaysia alah bakalabiahan bana, mamakai atok bangunan nan sarupo itu nan padohal 'sarupo' jo punyo awak. Rami pulolah bahasan tantang itu. Disiko timbua sanyum awak maagaki. Di maa rugi awak, belek awak nan maa nan tasingguang katiko dibuek urang sasuatu nan saroman jo punyo awak...... samantaro di awak sandiri nan 'punyo awak' ko indak panah bagai samparono bakamehi doh. Bak kecek surang kanti, nan tausiak ingin bana mancaliak bantuak rumah nan diunyino. Nan tanyato 'sarupo' bana lo jo bangunan urang. Antah urang di subarang lauik basa, antah urang di banua ruhum. Jano, eh, baa mangko indak dibuek lo rumah nan sarupo jo rumah awak di kampuang? Padohal, di kampuang itu bana, rumah gadang alah baransua langka. Nan baru di buek urang kini alah bagaya mediterania, atau bagaya rumawi, atau bagaya nagari antah mano sajo. Cubolah patuik badan diri awak katiko mamakai kemeja jo sarawa panjang....... Apokoh pakaian sarupo iko indak sarupo 'punyo urang'? Atau katiko awak mamakai baju guntiang Cino, mamakai sarawa batiak, malilik-an kain saruang bugih. Nan maa nan punyo awak, nan maa nan sarupo 'punyo urang' atau nan sabana punyo urang? Raso-rasono..... kacomato awak indak janiah..... Ado pulo bahasan tantang mampagunoan hasia karajo urang. Mampagunoan hasia teknologi urang samisal internet ko. atau mampagunoan fasilitas google, dan nan tarakhir bana facebook. Nan facebook ko jadi pulolah sorotan bahkan anjuran supayo sugirolah mancampak-an pamakaian no sabab sabana babahayo. Data awak ka dikamehino di urang Yahudi. Tau no biko namo awak, rupo awak sagalo sasuatu tantang awak. Kecek-anlah iyo.... Tapi sudahtu kadipangaannno awak? Facebook, google, yahoo, youtube, internet jo sagalo macam nan lain-lain no ko sarupo sarato saroman bana jo pisau tajam. Pisau nan buliah diambiak ka pangarek, ka pamotong, ka paukia, ka pangubak. Tapi dapek pulo dipakai ka pambunuah, ka palukoi urang lain.. Jadi tapulang banalah ka urang nan mamacik-anno. Ka dipagunoaan ka nan elok, sambuah bana manfaat no. Ka dipagunoan untuak nan jahek sambuah bana pulo kamungkinanno. Ado ulama (sabana ulama) mamakai facebook untuak dakwah..... Kadipangaanno dek urang Yahudi? Ado kawan nan mamposting video urang shalat tarawiah di Masjidilharam....... ka dipangaanno di urang? Tantu iyo ado pulo nan baabih hari manggili-gili facebook, manggili-gili youtube, google dan sabagaino tu untuak nan indak elok. Itu tapulang sajolah ka diri masiang-masiang. Dek kaco mato awak balain-lain ukuran. Pandangan masiang-masiang balain pulo janiah no. Hanyo tagalenjek awak katiko ado maraso pandanganno surang sajo nan janiah, nan lain 'jano' kabua sajo........ Wassalamu'alaikum, Muhammad Dafiq Saib Sutan Lembang Alam Suku : Koto, Nagari asal : Koto Tuo - Balai Gurah, Bukit Tinggi Lahir : Zulqaidah 1370H, Jatibening - Bekasi -- . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, bergabung kembali serta ingin merubah konfigurasi/settingan keanggotaan di: http://groups.google.com/group/RantauNet/subscribe