Mak Pono tamanuang surang diri di dalam lapau Uwo Pulin. Dek hari masih pagi, hanyo gaek tu baru nan tampak. Sadangkan kawan-kawan lain masih alun nampak batang iduangnyo.
Sambia bamanuang, Mak Pono mambaliak-baliak surek kaba ‘Singgalang'. Sarupo biaso, Mak Pono hanyo bisa mambaco judul-judul gadang sajo. Maklum, dek umua lah batambah tuo juo, paralu kacomato kalau nio mambaco labiah jaleh. Sadang mambaliak-baliak laman demi laman, mato gaek tu talantuang jo judul barita nan mangecek-an surang artis Minang ditangkok polisi. Panyanyi tu tatangkok di ateh taksi di Bukiktinggi, karano kecek polisi sadang mambao narkotika sabu-sabu. “Assalamualaikum. Baa, Mak. Apo barita angek kini tu?” Alun tantu salasai mambaco barita tu, tibo-tibo Uncu Labai masuak lapau sambia batanyo ka Mak Pono. “Lai ko, ha. Ado panyanyi Minang tatangkok mambao sabu-sabu. Tapi, dek mato ambo indak jaleh, sarancaknyo Uncu-lah nan mambaco,” jawek Mak Pono sambia maagiahan surek kaba tu ka Uncu. Dek mandanga ado artis Minang nan tatangkok, Uncu lansuang se maambiak surek kaba tu dari tangan Mak Pono. Inyo nio bana tau, siapo panyanyi Minang nan tatangkok tu. Karano, kalau soal panyanyi Minang, mako Uncu adolah urang nan paliang suko jo lagu-lagu Minang. Malah, manuruik caritonyo, katiko masih bujang-bujang, Uncu suko mambali kaset Minang. Apo sajo lagu Minang, ado kasetnyo di Uncu. Samati-mati angin, Uncu namuah marekam surang kaset urang lain, asa lai ado nyanyi Minang baru jo inyo. Katiko Uncu sadang mambaco barita tu, batirik se kawannyo masuak lapau. Ado Tan Baro, Angah Piyan, Tacin. Kari Garejoh, Ajo Tondeh, Mak Uniang sarato lainnyo. Lansuang se lapau tu manjadi rami dek ota bacampua garah. “Baa, Ncu. Lai baombak juo lawik?” Tanyo Angah Piyan. “Labiah gadang lai dari kapatang ombaknyo, Ngah. Caliaklah dek Angah, ado panyanyi Minang tatangkok mambao sabu-sabu,” jawek Uncu sambia mampacaliak-an baritanyo ka Angah Piyan. Tantu sajo samo-samo takajuik nan lain mandanga kato Uncu tadi. Karano, kini lah baru tadanga ado artis Minang nan main sabu-sabu. Kalau salamo ko, lai tadanga ado artis mamakai narkoba, tapi itu di Jakarta nan kotanyo lah metropolitan. “Yo, lah batambah parah nagari awak kini mah. Salamo ko kasus artis main narkoba baru ado di Jakarta atau di Jawa, tapi kini tajadi di artis Minang,” baleh Angah. “Itu tandoe nagari awak ko lah moderen,” runguik Ajo Tondeh. “Ep, ijan Ajo ukua moderen jo main narkoba. Mambana den!” Mak Uniang nan lah lamo indak mancogok ka lapau Uwo sato mangecek. “Ambo satuju jo pandapek Angah tadi. Ibaraik panyakik, lah batambah parah nagari awak ko. Ruponyo, nagari ko indak lai tampek lalu dek urang manggaleh narkoba, tapi lah jadi pasa. Aratinyo, urang manggaleh narkoba tu basingajo bana manggaleh barang-barang haram tu di siko,” potong Tan Baro. “Jadi, baa aka awak lai?” Tanyo Ajo. “Paelok-i galuang surang-surang. Tunjuak-ajari dan awasi anak jo kamanakan awak surang-surang. Sabagai mamak, awak harus bafungsi panuah baliak. Ijan ado lai kamanakan nan bantuak urang bakawan se jo mamaknyo. Ijan ado pulo anak nan cees jo bapaknyo. Pokoknyo sawah musti diagiah pamatang dan ladang musti ba pintalak,” kato Tan Baro. “Ado ciek lai, Tan. Badan Narkotika Nasional tu musti dituka namonyo jo Badan Anti Narkotika Nasional. Karano jo namo kini, ado kasan narkotika tu legal,” solang Kari Garejoh. Tan Baro maangguak, tando mangarati. Espe St.Soeleman http://www.hariansinggalang.co.id/palanta.html No virus found in this outgoing message. Checked by AVG Free Edition. Version: 7.5.516 / Virus Database: 269.19.8/1236 - Release Date: 21/01/2008 20:23 --~--~---------~--~----~------------~-------~--~----~ =============================================================== Website: http://www.rantaunet.org =============================================================== UNTUK SELALU DIPERHATIKAN: - Selalu mematuhi Peraturan Palanta RantauNet lihat di http://groups.google.com/group/RantauNet/web/peraturan-palanta-rantaunet - Hapus footer dan bagian yang tidak perlu, jika melakukan reply. - Posting email besar dari >200KB akan di banned, sampai yang bersangkutan menyampaikan komitmen akan mematuhi Tata Tertib yang berlaku. - Email attachment, DILARANG! Tawarkan kepada yang berminat dan kirim melalui jalur pribadi. =============================================================== Berhenti, kirim email kosong ke: [EMAIL PROTECTED] Webmail Mailing List dan Konfigurasi teima email, lihat di: http://groups.google.com/group/RantauNet/subscribe Dengan terlebih dahulu mendaftarkan email anda pada Google Account di https://www.google.com/accounts/NewAccount -~----------~----~----~----~------~----~------~--~---
