Baraya saalam dunya, Sakumaha kungsi dicaritakeun samemehna, produk sarana pertanian (gemuk jeung hormon) yasana Kang Idrus Gunawan tos ngawitan digunakeun di 11 kacamatan di Kab. Sidrap, Sulawesi Selatan minangka demplot (conto panaratas). Hasilna tos kapetik, nyugemakeun malah kacida mucekilna keur patani mah. Mangga, warta dina situs koran lokal Sulsel, "Fajar", di handap ieu ngiberan urang sadaya ngeunaan panen raya hasil demplot di Kab. Sidrap anu kasebut di luhur anu dipimpin langsung ku Bupati Sidrap: http://www.fajar.co.id/news.php?newsid=17435
Dina eta warta, memang teu disebut-sebut nami Kang Idrus, namung gemuk cair (ppc) Grammor + hormon (zpt) Hidrazil (lepat nyerat koran Fajar teh, kedahna diserat: Hydrasil) anu digunakeun dina eta demplot eta teges-teges karya Kang Idrus. Numutkeun wartos anu teu kasebut dina eta koran, Bupati Sidrap teh bade ngahucuhkeun (BI: menggalakkan) masyarakat Sidrap sangkan ngagunakeun ieu gemuk Grammor jeung zpt Hydrasil. Aya deui kauntungan anu teu katuliskeun dina eta warta: Tatanen ngagunakeun Grammor + Hydrasil salian ti bisa ngaronjatkeun hasil panen nepi ka rata-rata 30% (naekna hasil pare), oge tiasa ngurangan ongkos produksi tatanen nepi ka 50%-na. Kukituna, kauntungan patani teh ngalipet: beaya nyawah ngurangan nepi ka 50%-na bari jeung hasilna ningkat nepi ka 30% (saleresna tiasa langkung ti 30% lamun ngagunakeun gemuk + hormon bener-bener sakumaha aturan). Warta di luhur mere harepan. Komo lamun pirang-pirang "harta karun Pajajaran" sejenna geus prak diusahakeun tur diala manfaatna keur masyarakat, tangtu kaperluan poko masyarakat baris leuwih kacumponan. Naon wae "harta karun Pajajaran" teh? Teu luhur-luhur ngawangwang teh, jeung deui, lain ngawangwang anu teu pararuguh ieu mah, tapi sakabehna geus aya panalungtikanana jeung geus siap bahan keur prakna, kari daekna sakabeh golongan boh masyarakat umum, pamarentah oge komponen masyarakat sejenna, ngalarapkeunana. Anu dimaksud "harta karun Pajajaran" lebah dieu mah taya lian ti sakabeh hasil kamotekaran Urang Sunda atawa saha wae anu aya di Tatar Sunda heureutna, jembarna di Indonesia, anu sacara teori jeung bukti di laboratorium jeung conto lapangan mawa hasil keur karaharjaan kahirupan-anu salila ieu teu pati kapirosea ku Pamarentah jeung masyarakat umum. Diantaran wae, nyoko kana kaperluan utama keur kahirupan: 1) Keur nyadiakeun cai anu cukup: Aya PATMO keur daerah garing, aya "anti limbah" anu bisa ngaherangkeun cai walungan atawa sumber cai sejenna sakumaha kotorna oge (ANTILIM ti Kang Idrus, upamana). Malah, riset keur desalinisasi cai laut oge keur dipikiran make deukeutan (BI : pendekatan) biologi. Apan cai teh kaperluan anu dadasar, lain? 2) Keur nyadiakeun pangan anu cukup, malah mokaha bisa mere hasil sesa kaperluan sapopoe anu lumayan mucekil: Aya Grammor _ Hydrasil ti Kang Idrus, aya tatanen deukeutan murni sistem organik model SRI ti DPLKTS (Dewan Pemerhati Lingkungan dan Kehutanan Tatar Sunda) anu bisa ngahasilkeun nepi ka 14 ton/ha (sok sanajan ongkos produksina lumayan gede, rata-rata Rp 4,5 juta/ha), jst. 3) Keur nyadiakeun energi BBM alternatif: aya konsep biofule melak jeung ngokolakeun jarak nepi ka jadi BBM, konsep jeung prak-prakanana nepi ka balitungan untung rugina geus aya di DPLKTS. Keur 3 kaperluan poko manusa sanyatan Indonesia bisa mandiri. Boh cai, pangan (pare/beas), oge energi (BBM) teu kudu ngaruksak alam jeung ngunyang ka nagara sejen, komo bari jeung ngahutang mah. Naon pakaitna kana kamajuan budaya? Ceuk salah saurang panalungtik budaya Indonesia, anu nulis buku kandel ngeunaan budaya Nusantara, maju mundurna kabudayaan Indonesia mah, kulantaran alamna, gumantung pisan kana maju mundurna kahirupan patani jeung tatanenna. Sugan atuh, dina kaayaan patani ma'mur mah piraku budaya urang teh teu kuat. Sakabehna kari prakna, ngadagoan kadariaan sakabeh manusa Sunda, jembarna sa-Nusantara. Iraha atuh nya? Nungguan budak angon? Mangga, teu langkung, nyanggakeun ka sadayana ieu emutaneun teh. Baktos, manAR [Non-text portions of this message have been removed] http://groups.yahoo.com/group/baraya_sunda/ [Ti urang, nu urang, ku urang jeung keur urang balarea] Yahoo! Groups Links <*> To visit your group on the web, go to: http://groups.yahoo.com/group/Baraya_Sunda/ <*> To unsubscribe from this group, send an email to: [EMAIL PROTECTED] <*> Your use of Yahoo! Groups is subject to: http://docs.yahoo.com/info/terms/