Dulur-dulur anggota milis, dihandap ieu sumangga aya bahan bacaan kenging
nyeken (hasil scan) tina buku ka hiji tina seri Kandaga. Buku ieu teh eusina
kumpulan cutatan tina buku atawa majalah. Anu ngumpulkeunana lain jalma samanea
: M.A. Salmun. Dina aslina mah dibedakeun antara e biasa jeung e pepet
(ditulisna ĕ). Tapi hanjakal mesin scan-na teu bisa ngabedakeun (atawa
salah softwarena kitu?).
Ka dulur anu ngarora keneh : nepi ka tahun 1970 (asana mah), c ditulisna tj,
j ditulisna dj, ny ditulisna nj, y ditulisna j. Kulantaran Buku kandaga ieu
terbit tahun 1956, ejaanana oge make ejaan lila. Kahareup, mun aya waktu, urang
ganti ejaannana.
----------------------------------------------------------------------------
DISIPLIN
Maksud kuring, lain rek mieling Hari Angkatan Perang nu umum. Oge lain rek
pipilueun djabung-tumalapung bibisaanan mere sumanget ka para pradjurit urang
nu kiwari geus leuwih ti sumanget. Keun eta mah hantjengan ahlina nu geus legok
tapak genteng kadek tina eta bagian.
Ieu mah sakadar rek mieling pangalaman kuring pribadi, nu kungsi kasorang
dina mangsa milu midjah dibadju hedjo djeung manggul bedil.
Milu midjah, tjeuk kuring, sabab ari tjita-tjita kuring nu djadi panjileukan
ti leuleutik mah lain ka dinja losna. Keun eta mah.teu djadi soal.
Nu rek didongengkeun di dieu, wungkul pangalaman-pangalaman nu kungsi
karanapan sarta karasa ku kuring pribadi, dina djaman pala "putra dewa" keur
ngaradjadewek di urang.
Harita teh duka kumaha, duka sapedah kabawakeun batur, duka enjaan kuring
kaantjikan sumanget ngabela lemahtjai. Kuring udjug-udjug wani asup kana
Pembela Tanah Air, nu di lembur mah "Sukarela", disarebutna.
Ari tjeuk basa Niponna geuning "gyugun" tjenah. Keun eta oge teu kudu
papandjangan.
Mimiti kuring dilatih di Tjimahi, di tangsi nu njanghareupan alun-alun
Pontjol. Dilatih dina harti nu saenjana. Da eta bae, ti mimiti braj beurang
nepi ka reup peuting, djero 4 bulan emplad-empladan, pangadjaran-pangadjaran
teh estu bari disuwuk ku panggebug djeung dimongmong ku panggaplok para
"saderek sepuh" nu tjenah hajang ngagembleng dulur-dulurna banga Indonesia,
supaja kahareup bisa ngadjaga lemburna sorangan tina pangrandjah nu lian, iwal
ti manehna.
Mun ras inget, sok matak kapiasem ajeuna mah.
Disiplin nu dipake ku Djepang, disiplin "bangke". Sagala kudu prak-bisa
prak-kuat. Teu meunang aja nu ngawagu, teu meunang boga katjape. Tjabok djeung
gebug teh djadi lalab-rumbah.
Ari ramena saban isuk.. Mentas "kakeas" (lumpat antja) 5 km nu ditungtungan
ku balap patarik-tarik lumpat, paheula-heula asup ka buruan tangsi, terus kudu
"taiso" satengah djam lilana. Hih, da eta mah sora dampal leungeun kana pipi
...... tinggareplek-tinggareplokna teh geus teu puguh dengekeunana.Atuh da
kumaha tas lumpat sakitu tarikna, terus kudu gerak badan ....... lain teu
sumanget ........ kumaha da napas kaburu sesek manten. Nadjan kitu teu meunang
teu kuat. Lamun urang njebut tjape, kalah hajoh ditambah kudu lumpat deui,
magar teh sampe mati.
Dina waktu diadjar peperangan basa nu dipakena basa Djepang.
Lebah dieu repot deui bae. Sanadjan teu ngarti, dianggapna urang teh geus
lantjar basa Djepangna teh. Atuh kuring angot, nu ngadenge oge kakara harita
kana basa Nippon, ngan ukur "haj-hajan" bae, gawe teh, da lamun njebut
"wakarimaseng" geus tara diengkekeun deui, dampal leungeun njamberan pipi.
Tapi duka kumaha atuh, sanadjan djeung bari diganda teu ngarti kana basana
karasana ku kuring bet aja bae tapakna nu napel. Maksud teh lain tapak nu dina
pipi, eta mah geus puguh deui barengepna. Sagala nu diadjarkeun ku para
sidokang djeung hantjo teh henteu kabeh ngan ukur ngaliwat kana tjeuli, tapi
aja bae nu njangkol saeutik-eutikeun.
Djaba ti meunang latihan teunggeul djeung tjabok, harita kuring kungsi
dilatih kurang dahar deuih. Eta bae, "kutay" kuring (mun ajeuna mah seksi
meureun ngaranna) nu diwangun ku 60 urang, meunang rangsom sapoe-sapoena teh,
ukur 3 kali satengah ember. Emberna oge lain ember gede, tapi sedengan nu sok
biasa diparake njeuseuh di imah. Angeun kompos bae (angeun lalab sagala bres)
satengah ember. Atuh ana dibagikeun, ngan ukur kabagean sagede-gede peureup
orok sewang. Ku dua kali ngahuapkeun age geus kutap-ketap deui.
Ku lantaran latihan tjape, dibarung djeung beuteung lapar, tungtungna sok
ngagaranggam. Sagala nu kapanggih didahar. Demi balangsiar huapkeuneun keur
ngagandjel-gandjel djero beuteung, biasana sok ka dapur. Kitu oge tara wani ari
lain waktu simpe mah. Estuning riabna teh, teu beda djeung beurit,
tingkarurah-tingkaroreh sugan aja wortel atah atawa engkol sesa nu tinggaleun.
Nu baroga duit sok tingharewos djeung koki-koki dapur, menta dipangmeulikeun
naon bae dadahareun ti luar. Pagawe dapur mah sok baralik, datang-datang deui
djanari, ngadon njadiakeun ompreng keur isuk-isuk.
Lila-lila, maranehanana sorangan sok ngahadja marawa dagangan kadaharan, aja
goreng taleus, kueh atji, malah ari keur nu merekis pesakna mah aja nasigoreng
sagala. Hargana, geus munasabah leuwih mahal batan di luar. Nu geus tangtu
tikel dua, paling murah.
Laun-Iaun dapur teh ari tengah peuting salin djinis djadi pasar gelap.
Nu teu baroga duit, dibelaan burindil ngadjarualan papakeanana bawa ti imah,
dipake meulian dadahareun.
Sakali mangsa kuring boga duit ladang roko tjap "gadjah" djeung sabun
pembagian. Waktu kagiliran djadi "tobang"(tu kang beberes djeung njokot
rangsom) ka mang koki pesen nasi goreng sapori.
Sakumaha biasa, pesenan teh disampeurna kudu djanari di "pasar gelap" tea.
Inget keneh nepi ka ajeuna oge, harita the teu kungsi bisa sare
sakeredjep-keredjep atjan, bawaning ku panteng ngadagoan djanari.
Pukul tilu lotjeng di "Eihei" (djaga gerbang) kadenge disada tilu kali.
Garajam kuring kaluar ti djero kulambu, kerewek, kana "boshi" (pet) rap dipake,
da badju djeung tjalana mah ti sabadana "tenko" (appel) peuting oge henteu
dilaan.
Ketejep lalaunan kaluar ti "naimohang" (ruangan tempat sare). Lebah panto
pasanggrok djeung "fusimbang" (djaga ruangan). Waktu ngabetahkeun ku kuring
dikitjeupan. Manehna ngarti sabab kitjeup kuring, sakumaha biasa, ngandung
harti "tst" mun ajeuna mah. Nadjan kitu manehna tetep nitah ati-ati bisi
kapanggih ku "sjubang shirei" (opsir piket) tjenah.
Mangkaning peuting kamarina kungsi aja nu kapanggih keur laha loho ka dapur
teu dibere ampun deui, djaba ti dihantem sirahna ku sarangka "samurai" bari
diuk emok Djepang, dipentrang di nu panas satengah poe.
Di dapur sakumaha biasa njampak geus loba nu sedjen keur baralandja. Tapi
barang reket kuring mukakeun panto, rarikat pisan ratjleng njarumput ka nu
poek, samarukna opsir piket ngontrol.
Barang pintjukan pesenan tea geus katarima, kuring mah gura-giru ngelemet
deui ka luar, mulang ka "naimohang" sieun kaburu aja nu ngontrol. Tapi barang
rek sup pisan, ti djero kadenge "fusimbang" nu ngaluarkeun kuring tea keur
"hokok" (mere laporan) ka "subang shirei" nu keur mariksa ruangan. Satadina.
kuring boga ingetan rek luntjat njalingker ka nu poek, ngan orokaja kaburu
kapelengok manten.
Duka kumaha djalanna, kuring poho deui, ngan nu inget harita, pintjukan nasi
goreng tea geus ngiles, euweuh tina leungeun, pindah njumput kana handapeun
"boshi" nu keur dipake. Sanadjan bari angen ratug tutunggulan, kuring "keirei"
ngahormat ku ngantelkeun ramo leungeun katuhu kana tungtung kopeah.
Teu ku hanteu pintjukan teh hajoh make muka deuih. Karasa pisan haneutna
minjak nu ngalej tina sirah lenang mapaj kana tarang. Bawaning ku gugup, memeh
ditanja kuring geus nembalan ku basa Djepang lagam Sunda diteugeugkeun: "Hait!
Bendjo karakaeri masta!" (Wangsul ti tjai mun dibasa Sunda mah). Kawasna bae
harita kuring keur bintang terang, da "Sjubang Shireidono" (dono teh ketjap
panghormat ka saluhureun) ukur merong bari ngagerem nitah sare deui.
Neger-negerkeun maneh, kuring leumpang lalaunan, ngarah , teu katangar boga
dosa. Barang sapatu nu ngontrol geus teu kadenge deui ketukna, gura-giru ngudar
"boshi" lalaunan. Ku sabab pintjukanana udar, nasi goreng teh teu kaburu
diudulkeun deker bae dihabek ku duaan tina kopeahna. Estu ni'mat taja
babandinganana, nadjan tjampur djeung totombe oge.
Tutup latihan, kuring sabatur-batur bodo pinter, kabeh rata pada mareunang
idjazah salambar sewang. Badju anjar djeung sapatu sasetel sewang, sarta tanda
pangkat "budantjo" (kepala regu) sapasang sewang. Demi ditempatkeunana kuring
mah kabagean di salah sahidji "Daidang" (bataljon) luar Tjimahi.
Nu djadi "Shodantjo (kepala seksi) di Shodan kuring, harita sarua pada anjar
pisan kaluar tina latihan. Ngan ari manehna mah latihanan di Bogor. Djelema
dedeg, gede, budajut. Dangong ludeung bangun taja kasieun.
Kawasna bae, eta djelema teh kakara manggih pangkat, da katingal dina
tingkah-Iakuna teu beda ti si Tjepot djadi radja.
Lelewa nurutan Nippon, hampang leungeun, gawe ngan hajang tjatjabok bae. Ari
ngomong sok ninipongan, ngomong basa Indonesia letah Djepang,
disalah-salahkeun. Lamun njebut "L" sok di "R-keun" bari teu tinggal ti
"bakeroh" djeung "tida bangus".
Pamakena teu kaop, aja awewe deukeut-deukeut, sok "buang aksi". Biasana sok
terus nulak tjangkeng, popolotot njalukan budak "gyuhei" (pradjurit) nu teu
tuah teu dosa. Bari ieu aing opsir "Nippon" nitah "kioskit" (sikep),
dialak-diilik kawas nu keur meuli kuda. Gaplok njabok bari njarekan: "Bakeroh".
Gyuhei tida bangus dah !".
Nu ditjabok bari rungah-ringeuh, teu ngarti, da puguh teu boga salah,
kuram-kireum era ku nu narendjo.
Njutjudna ari geus ngagugubrag tengah peuting. Barudak nu keur meumeudjeuhna
ngeunah sare, hajoh dibagi tugas salah mangsa. Leuheung mun parentah baleg, da
ieu mah saurang dititah ka dapur menta sangu, saurang dititah njambel, sedeng
nu sedjenna kudu kukurumujan ngundeur kasedep, lalab sintrong nu ngageba di
pipir dapur.
Karunja aja, seuri aja, ari ras kana lakuna barudak harita. Meureun kagambar
kumaha tingtarologna. Nu keur sare dititah njambel, ........ tarasi pahili
djeung areng, tjikur disangka tjengek. Angot eta mah nu kabagean ngundeur,
djiga nu keur ngalalindur, alasruk-asrukan di nu bala. Nu dirampidanana, duka
sintrong duka babadotan, da puguh undeur nu keur sare, ........ hih satjegna
bae. Malah lain2 atjan ngundeur, da dirabutan djeung akar-akarna. Rengse tuang,
masih keneh tatjan seep piwarangan.
Bari eureuleu teurab, golojoh kana padjuaran. Ngahenen dipeuseulan. Saurang
bagian sirah, saurang sukuna, saurang leungeunna. Nu teu kabagian mentjetan,
kudu ngalanglaeu tembang, bari sila andekak di handap.
Sakitu antarana pangalaman kuring djaman djadi tentara "Sukarela".
Dipidangkeun soteh lain malar katangar, ieu mah itung-itung milu mieling tgl. 5
October nu geus kaliwat bae.
O. HIDAJAT (Madjalah "Panghegar" 1954)
---------------------------------
Yahoo! Messenger with Voice. Make PC-to-Phone Calls to the US (and 30+
countries) for 2¢/min or less.
[Non-text portions of this message have been removed]
http://groups.yahoo.com/group/baraya_sunda/
http://barayasunda.servertalk.in/index.php?mforum=barayasunda
[Ti urang, nu urang, ku urang jeung keur urang balarea]
Yahoo! Groups Links
<*> To visit your group on the web, go to:
http://groups.yahoo.com/group/Baraya_Sunda/
<*> Your email settings:
Individual Email | Traditional
<*> To change settings online go to:
http://groups.yahoo.com/group/Baraya_Sunda/join
(Yahoo! ID required)
<*> To change settings via email:
mailto:[EMAIL PROTECTED]
mailto:[EMAIL PROTECTED]
<*> To unsubscribe from this group, send an email to:
[EMAIL PROTECTED]
<*> Your use of Yahoo! Groups is subject to:
http://docs.yahoo.com/info/terms/
