Hatur Nuhun, ngke bade langsung bae ka KITLV, naha masih keneh di Gatot Subroto kitu caket kantor LIPI, di kompleks pejabat Tinggi tea...
Aschev Schuraschev <[EMAIL PROTECTED]> wrote: Haturan ambu, Ieu kasanggakeun judul buku anu munel ngeunaan Cianjuran: Sundanese Music in the Cianjuran Style; Wim van Zanten, Foris Publications, 1989. Pedaran ngeunaan Bujangga Manik, Sri Ajnyana sareng Ramayana aya dina buku Three Old Sundanese Poems, J. Noorduyn & A. Teeuw, KITLV Press, Leiden, 2006 (masih keneh haneut). Baktos ----- Original Message ---- From: richadiana kartakusuma To: Baraya_Sunda@yahoogroups.com Sent: Friday, April 25, 2008 8:45:18 PM Subject: Re: [Baraya_Sunda] Mundinglaya jeung Surawisesa Abdi janten emut kana carios Bujangga Manik Punten kang, judul bukuna, tahuna...daabdi ge kenal sareng urang KITLV (Agatha Parsidi) kapungkurv kantos janten anggota...ngan ayeuna kaluar, e ku abdi bade dipilarian van Zanten nu ieu..."Tembang Cianjuran tea kitu ieu teh judulna ? Hatur Nuhun Aschev Schuraschev wrote: Ieu aya tulisan lawas sim kuring (9 Agustus 2007) di milis tatangga, upami aya lepat dina nulisna, punten panglempengkeun. Di tatar Sunda aya dongeng rahayat anu kasohor ngeunaan Mundinglaya Dikusumah. Dina eta dongeng disebatkeun wirehna Mundinglaya teh putrana raja Pajajaran anu pangkakoncarana nyaeta Prabu Silihwangi. Mundinglaya disebatkeun seueur nyorang kaprihatinan sareng kedah mapag jurit ngabela sesa Karajaan Sunda anu puseurna di Pakuan atanapi Pajajaran. Lalakon Mundinglaya oge dijantenkeun rumpaka tembang Sunda Cianjuran. Contona, Lingkung Seni Dewi Pramanik dina Tembang Sunda Cianjuran Album / Volume VI (Album Mega Beureum), kalayan juru tembangna ibu Euis Komariah sareng bapa Iyus, ngaluarkeun tembang anu judulna Salaka Domas anu rumpakana sapertos kieu: Tandang menak Pajajaran Kadiya banteng bayangan Sinatria pilih tanding Tohpati jiwa jeung raga Seja angkat mapag jurit Najan di luhur langit Hamo burung rek disusul Sumujud ka ingkang rama Prabu Agung Silihwangi Layang domas layang domas didamel jimat nolak bala Sinatria Pajajaran Putra silih Silihwangi Estu panceg mamanahan Seja moal waka mulih Najan nemahan pati Mun guriang tacan tumpur Ngesto ka ibu ka rama Sumambat ka Maha Suci Teguh pengkug teguh pengkuh, henteu unggut kalinduan Raden menak Pajajaran Upami numutkeun dongeng rahayat, lalakon ringkelna Mundinglaya sapertos kieu: Prabu Silihwangi ngagaduhan dua garwa, nyaeta Ratu Nyai Emas (Nyimas) Padmawati sareng Ratu Nyimas Tejamantri. Ti Nyimas Tejamantri, Prabu Silihwangi gaduh putra anu jenengannana Raden Guru Gantangan. Ari ti Nyimas Padmawati, anjeunnna gaduh putra anu namina Raden Mundinglaya. Guru gantangan dipercanten ku Prabu Silihwangi janten bupati di dayeuh Kutabarang. Guru Gantangan anu teu kagungan putra, kajabi putra kukutna, Raden Suntenjaya, ngarep-ngarep pisan sangkan Mundinglaya tiasa janten putrana, bade dirorok ti burey keneh. Kitu deui Nyi Mas Ratna Inten, bojona, ngajurung-jurung ka Guru Gantangan supados ngolo Nyi Mas Padmawati supados maparin orokna. Nyi Mas Padmawati kalintang nyaahna ka putrana. Tapi sanaos kitu diririhan ku Guru Gantangan mah, henteu dikoretkeun, kumargi Guru Gantangan oge teu kirang nyaahna ibarat ka putrana pituin. Mangkat rumaja katangen pisan kategepan Mundinglaya. Katambih ku pasipatanana anu sae budi. Tebih pisan bentenna sareng Suntenjaya anu sipatna awon pisan. Kumargi Nyi Mas Ratna Inten nyaah pisan ka Mundinglaya, Suntenjaya janten sirik pisan ka Munding Laya. Guru Gantangan oge jenten timburu, gaduh sangki anu awon sareng ngaraos disapirakeun ku bojona. Pon kitu Suntenjaya asa kasilihkeun. Nya eta pisan anu ngarobih kanyaahna Guru Gantangan ka Mundinglaya janten kaceuceub anu ahirna Mundinglaya dikerem di pangberokan Kutabarang, ku margi dianggap ngalakukeun lampah nirca, sanaos harita Mundinglaya the masih kacida rumajana. Di Pajajran, puseur karajaan Sunda, harita teh nuju meujeuhna angkeub, halodo entak-entakan sareng seueur jalmi nu kaserang kasawat. Katambih tumuwuhna pacengkadan di lingkungan kulawarga karaton sabadana Mundinglaya diberok. Dina hiji waktos Nyi Mas Padmawati ngimpen ningali Layang Salaka Domas nu aya di Jabaning Langit kalayan dijaga ku Guriang Tujuh.. Dina impenannana, aya wartos wirehna sing saha anu tiasa ngengingkeun eta layang, baris kenging kahormatan, kabagjaan, katengtreman, karaharjaan sareng kasalametan kanggo nagara miwah rahayatna. Eta impenan dicarioskeun ka Prabu silihwangi. Prabu Silihwangi hemeng galihna henteu percanten bakal aya jalmi anu sanggem angkat ka Jabaning Langit bari nyandak Layang Salaka Domas tina kakawasaan Guriang Tujuh; asa pamohalan pisan. Antukna Prabu Silihwangi ngayakeun gempungan di pasewakan kangggo nangtoskeun saha anu sanggem ka Jabaning Langit. Pasewakan diluuhan ku rahayat Pajajaran, Nyi Mas Tejamantri, Guru Gantangan sareng putrana, Suntenjaya. Tapi henteu aya saurang oge anu nembongkeun kasayagianana. Ki lengser, ngusulkeun supados Mundinglaya anu aya di pangberokan Kutabarang oge ditaros. Sanaos usulan ki Lengser henteu disatujuan ku Suntenjaya sareng Guru Gantangan, nu ngariung rempug satuju kana usul ki Lengser. Mundinglaya diusulkeun supados enggal dibebaskeun. Patih Gelap Nyawang sareng Kidang Pananjung nyuhunkeun idin ka Guru Gantangan supados ngaluarkeun Mundinglaya tina pangberokan. Saparantosna ngalakonan sadaya panalek ti balarea, Mundinglaya kalawan henteu ngawagu langsung bae nampi sagala pancen ti ramana, Prabu Siliwangi. Patih Gelap Nyawang jeung Kidang Pananjung gasik tatahar kanggo miangkeun Mundinglaya ka Jabaning Langit. Sababaraha dinten Mundinglaya dilatihan perang sareng rupi-rupi elmu gelut sinareng ngagunakeun rupi-rupi pakarang kanggo mayunan sagala hahalang dina lalampahanana. Oge henteu kakantun Mundinglaya diancrubkeun kana Leuwi Sipatahunan supados beresih jiwana. Dina dinten anu tos ditangtoskeun Mundinglaya angkat, kalawan pangesto ti ibu sareng ramana, diiring ku Gelap Nyawang sareng Kidang Pananjung, oge ti sakumna rahayat Pajajaran. Kumargi Mundinglaya henteu kantos aangkatan ka luar Pajajaran, anjeunna henteu terang jalan. Sumerah ka nu Maha Kawasa, Mundinglaya angkat ngalangkungan leuweung geledegan kanggo ngajugjug Jabaning Langit. Dina lalampahan ka Jabaning Langit, Mundinglaya ngalangkung ka karajaan bawahan / karajaan alit nyaeta karajaan Muaraberes atanapi nagri Tanjung Barat (nua aya di Pasar Minggu Jaksel kiwari). Di eta nagri, Mundinglaya papendak sareng Dewi Asri. Dewi Asri anu dikenal oge sabage Dewi Kania atanapi Dewi Kinawati teh putrina Mental Buana incuna Munding Kawati. Mundinglaya sareng Dewi Asri kedal pasini jangji bade patepang deui saparantos Mundinglaya rengse mancen tugas ti ingkang rama. Salajengna Mundinglaya dijajap ku Patih Gelap Nyawang sareng Patih Kidang Pananjung oge teuteup Dewi Asri.. Patih Gelap Nyawang jeung Patih Kidang Pananjung gura-giru nyayagikeun parahu kanggo Mundinglaya ngajugjug Atas Angin. Dugi ka Pulo Putri. Patih Kidang Pananjung sareng Patih Gelap Nyawang dipiwarang nungguan Mundinglaya dugi ka rengsena ngemban pancen nyangking Layang Salaka Domas. Lalakon lalampahan Mundinglaya salajengna sihoreng sanes nyorang jalan ngabulungbung anu caang padang narawangan, malihan jalan anu rembet, rumpil sareng seueur cucuk rungga sareng rangrangna anu ngahalang-halang kana lajuna lalampahan Mundinglaya. Namung sanaos kitu anjeunna henteu unggut kalinduan. Tekadna buleud disarengan ku kasadaran wireh anjeunna baris nyorang sagala hahalang. Dina lalampahan anjeunna pendak sareng raksesa Jonggrang Kalapitung anu ngahalangan jalanna. Numung eta raksesa tiasa diayonan ku Munding Laya.. Rengse ngayonan Jonggrang Kalapitung, Mundinglaya reureuh heula. Ngumpulkeun deui lelembutanana anu kabengbat ku urusan gelut. Mundinglaya nyangsaya kana tangkal katapang nyawang pilampaheun anu natrat na angen-angenna.. Manahna manteng ka Nu Maha Agung sangkan laksana panedana. Sukmana kumalayang ngambah awang-awang. Kalawan dijajap ku Jonggrang Kalapitung, Mundinglaya naek ka langit kahiji, kadua, katilu, sareng saterasna dipungkas dugi ka langit anu katujuh. Di langit ka tujuh Mundinglaya paamprok sareng Guriang Tujuh anu ngajaga layang salaka domas. Mundinglaya nyarioskeun maksadna wireh anjeunna peryogi layang salaka domas kanggo nagarana anu nuju nyorang katunggaraan, pacengkadan, kasawat sareng hahalodoan. Namung eta layang henteu dipasihkeun ku Guriang Tujuh. Mundinglaya mesat keris. Namung dumadakan aya gelap ngabaranyay disarengan sora ngajegur matak katorekan. Mundinglaya tipental, ragrag ka langit kagenep ngalempreh teu empes-empes. Di kahiyangan, para pohaci pating lalengis maridangdam. Utamina pohaci Wirumananggay anu kacida prihatinna ningali Mundinglaya ngalungsar ngababatang. Mundinglaya disangkeh terus disenderkeun dina lahunan, lalaunan embun-embunanana ditiup bari diparancahan. Saparantos Mundinglaya hirup deui, Nyi Pohaci mamagahan anjeunna supados henteu ngalawan ku cara anu heuras malih kedah ngalawan ku kasabaran, nurutkeun kumaha kahayangna. Mundinglaya naek deui ka langit katujuh. Pendak deui sareng Guriang Tujuh. Guriang Tujuh ngawitan ngaharegaan kana karep Mundinglaya anu gaduh tekad bade ngadamel kasaean. Layang Salaka Domas dipaparin ka Mundinglaya. Di Kutabarang, Suntenjaya sasat jigrah saangkatna Mundinglaya ka Jabaning Langit. Asa mobok manggih gorowong, aya jalan komo meuntas. Meungpeung Mundinglaya nuju suwung di nagara, Suntenjaya bade maranan Dewi Asri kanggo diolo supados kersaeun dijantenkeun bojona. Sunten Jaya mepeg wadia balad miang ke Muaraberes. Dina waktos anu harengheng, Mundinglaya dugi ka Pajajaran teras ka Muaraberes. Sunten Jaya kasoran mundur ti Muaraberes. Salajengna Prabu Silihwangi ngangkat Mundinglaya janten raja di Pajajaran kalayan gelar Mundinglaya Dikusumah. Henteu lami ti harita Mundinglaya ngajodo sareng Dewi Asri.. Pajajaran janten aman deui sareng subur makmur. Kitu upami lalakon raja Pajajaran versi cutatan budaya (dongeng rahayat). Lalakonna dikaitkeun sareng kayakinan urang Sunda waktos harita anu percanten ayana Nyi Pohaci, guriang sareng unsur Sunda wiwitan sanesna. Panginten ieu dongeng teh kawitna diserat atanapi dicipta ku anu mikacinta Mundinglaya, raja karajaan Sunda pamungkas. Suntenjaya anu diposisikeun sabage musuh Mundinglaya disebat pihak anu awon. Dumasar cutatan urang Portugis, Mundinglaya teh identik sareng pangeran Surawisesa, putrana Sri Baduga Maharaja, anu kenging gelar Ratu Sanghiyang saparantos jeneng janten raja Sunda. Dikawitan tina silsilah, Jayadewata, raja Galuh (anu kawéntar ku sebatan Prabu Silihwangi saparantos jeneng janten raja di Galuh), nikah ka Subanglarang (puteri Ki Gedeng Tapa anu janten Raja Singapura). Subanglarang ieu alumni pasantrén Pondok Quro di Pura, Karawang. Ti Subanglarang, Jaya Dewata ngagaduhan putra anu jenengananan Cakrabuana atanapi Walangsungsang. Walangsungsa ngagaduhan putra nu jenengannana Syarif Hidayatullah anu saterasna janten raja Cirebon . Jaya Dewata saterasna nikah ka Kentring Manik Mayang Sunda (puteri Prabu Susuktunggal, raja karajaan Sunda anu puserna di Pakuan atanapi Pajajaran). Ti waktos eta Jaya Dewata janten Raja Sunda anu kakawasaanana ngawengku ogé Galuh sareng saterasna gaduh gelar Sri Baduga Maharaja. Ti Kentring Manik Mayang Sunda, Sri Baduga ngagaduhan putra makuta anu namina Surawisesa. Antawis Sri Baduga di Pakuan Pajajaran sareng putuna, Syarif Hidayatullah, di Cirebon, katinggalna kirang harmonis kumargi aya totonden Cirebon bade misahkeun diri. Wartos to urang Portugis nyarioskeun wirehna Surawisesa kantos diutus Sri Baduga kanggo nepangan Alfonso d'Albuquerque di Malaka kanggo ngadamel perjanjian dagang sareng nyuhunkeun bantosan kanggo ngamankeun karajaan Sunda. Anjeunna angkat ka Malaka dua kali (1512 sareng 1521). Upaya diplomatik éta didasarkan ku kasalempang Sri Baduga Maharaja sawaktos-waktos baris aya invasi Cirebon anu dirojong/dibantos ku Demak. Miangna Surawisesa ke Malaka dina warsih 1512 henteu langsung ngabuahkeun hasil. Portugis mung ngirim tim ekspedisi penjajagan dina warsih 1513. Tome Pires lebet janten anggota ekspedisi eta. Angkatna Surawisesa ka Malaka anu kadua kalina dina warsih 1521, aya hasilna nyaéta dongkapna utusan Portugis anu dipingpin ku Hendrik de Leme (iparna Alfonso) ka dayeuh Pakuan dina warsih 1522. Dina rembugan diplomatik anu kadua éta disatujuan ku dua pihak (Sunda sareng Portugis) ngeunaan perdagangan sareng kaamanan.. Dina warsih eta oge, Portugis dongkap ka Kalapa kanggo mancegkeun padrao, batu prasati. Saur sumber Portugis, dina waktos éta Surawisesa parantos dinobatkan ku Sri Baduga janten raja Sunda kalayan gelar Ratu Sanghiang. Dina taun 1522, karajaan Sunda sareng Portugis ngadamel jangji-pasini dina tulisan rangkep dua, dimana masing-masing pihak nyepeng hiji. Dina jangji-pasini éta disatujuan wiréhna Portugis baris ngadegkeun benteng di Banten sareng Kalapa. Ku kituna unggal kapal Portugis anu dongkap baris dipasihan muatan pedes anu bakal digentoskeun sareng barang-barang kaperyogian anu disuhunkeun ku pihak karajaan Sunda. Saterasna dina waktos benteng ngawitan diwangun, pihak Sunda bakal maparin 1000 karung pedes unggal warsih seueurna dua "costumodos" (kirang langkung 351 kuintal). Namung pangwangunan benteng henteu tiasa langsung dilaksanakeun. Saparantos Prabu Silihwangi wafat, kinten-kinten warsih 1526 / 1527, Cirebon ngawitan kumawantun narajang palabuhan Sunda Kalapa. Jangji pasini Sunda Portugal henteu tiasa dilaksanakeun jalaran bantosan Portugis dongkapna telat ku margi Francisco de Sa anu dipasihan pancen ngawangun benteng kabujeng diangkat janten Gubernur Goa di India. Angkatna armada Portugis ka karajaan Sunda disiapkeun ti Goa ngagunakeun 6 kapal. Galiun anu ditaekkan ku De Sa sareng eusi parabot kanggo ngawangun benteng kapaksa dikantunkeun alatan armada ieu ditarajang angin puyuh lilimbungan di Teluk Benggala. De Sa sumping di Malaka warsih 1527. Ekspedsi Portugis ti Malaka ka Sunda dilaksanakeun taun 1527. Kawitna ekspedisi teh ngarah ka Banten, tapi ku margi Banten tos dikawasa ku raja Hasanudin, lalampahan diteraskeun ka Palabuhan Kalapa. Tapi armada kasebat henteu terang yen Cirebon tos ngarebut Sunda Kalapa ti Karajaan Sunda, kapalna badarat caket teuing ka basisir anu antukna janten mangsa pasukan Cirebon. Ku margi kapal Portugis ngalaman kareksakan anu beurat sareng korban anu seueur, kapal Portugis ieu kabur ka Pasai. Warsih 1529 Portugis nyiapkeun 8 kapal kanggo ngabales serangan Cirebon, namung batal. Perang karajaan Sunda sareng Cirebon teras lumangsung salami 5 warsih. Nanging, Cirebon henteu wantun naék ka darat, prajurit karajaan Sunda oge henteu wantun turun ka laut. Cirebon sareng Demak ngan ngawasa dayeuh-dayeuh palabuhan. Mung di bagian wétan pasukan Cirebon hasil nembus langgkung jero ka beh kidul ku karebutna Talaga (karajaan bawahan Sunda), benteng pamungkas karajaan Sunda di Galuh. Ti waktos harita Cirebon janten lemah sareng henteu ngalakukeun ekspansi deui. upami ditilik nami patempatan sareng tokoh lalakon Mundinglaya sareng Surawisesa, nyebatkeun nami tempat sareng jenengan tokoh anu benten. Sri Baduga Maharaja dina sumber historis (prasasti sareng cutatan urang Portugis) dina dongeng Mundinglaya disebat Prabu Silihwangi. Kentring Manik Mayang Sunda disebat Nyi Mas Padmawati Subanglarang disebat Nyimas Tejamantri. Surawisesa disebat Mundinglaya. Cakrabuana atanapi Walangsungsang disebat Guru Gantangan. Syarif Hidayatullah disebat Sunten Jaya Karajaan Sunda disebat Karajaan Pajajaran Cirebon disebat Kutabarang Malaka disebat Jabaning Langit Padrao (tugu prasasti) atanapi serat perjanjian disebat layang salaka domas Urang Portugis anu ditepangan dua kali di Malaka disebat Guring Tujuh. Ngeunaan gelar Prabu Silihwangi, bapa Edi S. Ekajati, ngutip seratan bapa Ayatrohaedi anu nyindekkeun wirehna Prabu Maharaja, raja Sunda (1350-1357) anu gugur di palagan Bubat kenging gelar Prabu Wangi anu ngandung hartos raja anu seungit namina kumargi kalayan gagah perkosa mempertahankeun kahormatan nagara. Putrana Prabu Wangi nyaeta Prabu Niskala Wastu Kancana mimpin karajaan Sunda (1371-1475) kalayan wijaksana sahingga nagara janten subur makmur loh jinawi. Ku margi kitu Prabu Niskala Wastu Kancana namina seungit nyambuang sanagara. Ku kituna, anjeunna dipaparin gelar Prabu Silihwangi anu ngandung hartos gegentos Prabu Wangi. Jenengannana tos diabadikeun dina sumur jalatunda di Brebes (Banyumas? hilap deui) waktos Bujangga Manik (wiku sareng ahli geografi Sunda) ngalangkung ka wewengkon Jawa. Waktos Sri Baduga Maharaja, incuna Prabu Silihwangi, marentah karajaan Sunda (1482-1521) kalawan nyandak karajaan kana kaayaan gemah ripah loh jinawi, dipaparin gelar anu sami sareng eyangna nyaeta Prabu Silihwangi (Ayatrohaedi, 1997: 48-51). Janten lebet akal upami Sri Baduga Maharaja disebat Prabu Silihwangi dina dongeng-dongeng Sunda. Ngeunaan Surawisesa sabage Mundinglaya tiasa kahartos alatan anjeunna teh carogéna putri ti karajaan Muara Beres, persisna nagri Tanjung Barat anu rajana ngagunakeun gelar atanapi sebutan Munding sapertos Munding Kawati. Panginten Mundinglaya teh gelar anu dipaparin kulawargi karajaan Tanjung Barat kanggo Surawisesa. Karajaan Sunda disebat karajaan Pajajaran alatan karajaan Sunda dina jaman anu nyerat dongeng (bujangga / sastrawan) hirup parantos henteu jiga kapungkur, wilayahna ngaheureutan dimana Banten sareng Cirebon tos ngaleupaskeun diri ti ibukota karajaan (Pajajaran). Janten nami karajaan digentos ku nami puseur dayeuhna. Ti saprak Banten sareng Cirebon mapan, wewengkon Sunda kabagi ku tilu kakawasaan enyaeta Sunda Banten, Sunda Pajajaran sareng Sunda Cirebon. Malaka disebat Jabaning langit jigana ku margi pohara tebihna. Padrao disebat layang salaka domas alatan padrao ngarupikeun tulisan ( surat ) anu ditulis dina batu (domas?).Urang Portugis disebat guriang tujuh kumargi kacida hesena mayunan / komunikasi sareng eta bangsa (panginten alatan bénten basa anu digunakeun) sareng hese belekena Portugis kanggo masihan bantuan. Kadongkapan Surawisesa anu kahiji (warsih 1512) henteu langsung aya hasilna). Anu nyerat dongeng Mundinglaya oge panginten sakalian ngalebetkeun nilai-nilai kayakinan anu aya waktos harita sapertos unsur-unsur Sunda Wiwitan upamina wae Nyi Pohaci sareng guriang. Nilai-nilai Islam oge mangaruhan eta dongeng sapertos lalampahan Mundinglaya ti langit kahiji dugi katujuh anu sapertos perjalanan isra miraj nabi Muhammad. Atanapi mungkin wae aya alesan sanesna; upamina wae kreativitas para bujangga Sunda anu palay tampil béda sahingga lalakon Mundinglaya rada benten sakedik sareng aslina (jalan hirup Surawisesa). Hal ieu kajantenan dina carita anu eusina kalebet lalakon wayang, namung lalakonna sareng struktur cariosanna ngawangun lakon pantun sareng eusina mahiwal benten sareng versi Jawa atanapi Malayu anu diadopsi ti ajaran Hindu. Numutkeun bapa Edi S. Ekajati, sastrawan Sunda ngadamel carita Ramayana anu kacida béntenna. Carita anu dimaksad nyaéta Ramayana dina naskah lontar kropak no. 1102 anu kiwari disimpen di Musium Sri Baduga Bandung. Dina Sanghyang Siksa Kandang Karesian, Ramayana kacatet sabage carita anu biasa dilakonkeun ku memen (dalang?), sami sareng lalakon wayang sanésna, nyaéta Adiparwa, Korawasarma, Bismasarga. Namung lalakon Ramayanan naskah kropak no. 1102 jalan carios sareng tokoh utamana henteu sami sareng carita Ramayana umumna, anu sumberna ti India, nyaéta nyarioskeun peperangan Rama sareng Rahwana katut wadyabaladna alatan Rahwananyulik Dewi Sinta, permaisuri Rama (Stutterheim, 1925; Ikram, 1982). Lakon Ramayana versi bujangga Sunda anu diserat nganggo aksara sareng basa Sunda Kuna nyarioskeun pasca perang kasebut anu ngabalukarkeun Rahwana sareng kulawarga katut wadyabaladna tiwas di medan paperangan, saterasna lahir putera Rama namina Prebu Bujanggalawa sareng ogé putera Rahwana anu jenengannana Prebu Manabaya. Prebu Manabaya nungtut bales tiwasna rama, ibu, sareng barayana, anu ngabalukarkeun paperangan antawis Prebu Bujanggalawa sareng Prebu Manabaya. === message truncated === --------------------------------- Be a better friend, newshound, and know-it-all with Yahoo! Mobile. Try it now. [Non-text portions of this message have been removed]