Ngalangkungan ieu surat, simkuring Mang Ucup seja nandeskeun sarta ngajangjikeun yen dina jangka waktu sajam nu bakal sumping, salira bakal tos tiasa diajar sarta ngajalankeun elmu "NGALUARKEUN SUKMA". Hebring, pan?
Dijamin 100%. Pami teu tiasa, Mang Ucup kersa dihukum rajam! Dina jangka waktu sajam, sadaya nu maca - teu aya iwalna - bakal parantos tiasa diajar sarta ngajalankeun elmu ngaluarkeun sukma tina raga, dijamin. Ieu sanes mung meureun, tapi tiasa saenggalna dipraktekkeun turta dibuktikeun ayeuna keneh. Gombal! Upami salira henteu percanten, cobian nelasan maneh ku cara nuang Baygon saember. Moal lami sukma salira bakal ngalayang KALUAR MISAH tina raga salira. Eta mah sadayana ge uninga, yen dina hiji mangsa urang bakal maot sarta jiwa urang bakal misah tina raga. Malah panginten eta jiwa bakal nyarios "Sayonara" alias moal wangsul deui ka jero raga urang, namina oge tos maot. Ke, sabar heula..! Mang Ucup - tadi mung ngajangjikeun yen unggal nu maca bakal tiasa diajar elmu NGALUARKEUN sukma, sarta tetela ieu leres 100%! Janten sanes bohong yen Mang Ucup tiasa ngajarkeun ka unggal jalmi cara misahkeun jiwa tina raga! Nu Mang Ucup teu acan tiasa mah ngatur kumaha carana supados ieu eta jiwa tiasa sarta kersa wangsul deui kana raga urang. Janten elmu anu nembe teh mung elmu "one way ticket", sanes elmu "return ticket"! Elmu "return ticket" atanapi out of body experience (OBE) atanapi sering oge disebat "separation" teh elmu tata cara ngatur supados sukma urang tiasa kaluar jalan-jalan tina raga, sapertos jalmi mati suri, sarta - anu langkung penting - tata cara ngatur supados eta sukma tiasa sarta kersa leber deui kana raga urang. Kanggo salajengna urang sebat bae ieu elmu teh elmu OBE. Panginten salira henteu percanten yen OBE teh leres ayana sarta tiasa prak dipidamel. Kanggo anu teu acan percanten sarta palay ningal heula kuanjeun, mangga nongton DVD pilem anu judulna "Ghost Dad" anu pamaen utamana Bill Cosby. Dina eta pilem ditembongkeun kumaha prakprakanana jalmi tiasa milampah OBE. "Eta mah pilem atuh, Mang Ucup. Sanes kanyataan!" Ahli parapsikologi di dieu parantos nguji sarta ngabuktoskeun yen OBE teh leres aya turta tiasa dijalankeun, sanes ukur dongeng atanapi rahul wungkul. Kumaha carana sangkan urang tiasa ngaraoskeun OBE? Umumna mah urang tiasa ngiring ngarasakeun nalika jiwa urang kaluar tina raga. Nete unggal hambalan, urang tiasa ngarasakeun awak jadi tiis jeung kaku, sapertos lumpuh. Dimimitian tina sampean, naek ka luhur ka mastaka. Saparantosna eta, urang bakal ngaraos hampang, malah tiasa ngalayang kaluar tina raga. Urang bakal tiasa ningal awak urang boh ti luhur atanapi ti gigir. Ngawitanana mah urang teu percaya tiasa hiber turta ngalayang, tapi buktosna kalah tiasa nembus tembok! Urang bakal tiasa ningal sagala kajadian di sakurilingeun urang, tapi mung tiasa lalajo. Urang nu nuju ngalaman OBE moal katingal sarta moal kadangu ku aranjeunna, sarta urang moal tiasa noel naon-naon oge. Hal eta kumargi urang ukur jiwa nu keur jalan-jalan tanpa raga. Iraha urang tiasa ngalaman OBE? Nalika nuju kulem, tapi seringna mah upami nuju setres, teu damang wales, atanapi nuju kapiuhan. Tapi numutkeun panalungtikan, OBE ieu tiasa ngahaja dihontal sakumaha kahoyong, sanes ukur kaleresan, nyaeta dina mangsa nuju tatapa atanapi nuju ngosongkeun emutan/pikiran. Jalmi nu tiasa ngosongkeun emutan bakal langkung gampil diajar ngosongkeun ragana. Naha leres manusa mibanda kamampuh ngalaman OBE? Simkuring bade ngadugikeun cariosan sababaraha jalmi anu kantos ngalaman OBE kalawan teu ngahaja. Saurang mahasiswi Indonesia di nu nuju sakola di Leiden - Walanda, hiji mangsa ngaraoskeun asa kasumpingan ibuna nu aya di Jakarta, Indonesia. Anjeunna tiasa ningal kalawan atra yen ibuna sumping ka bumina, sanaos mung etangan sababaraha detik. Nu aheng, kajadianana teh lumangsung tengah poe ereng-erengan. Saatos eta kajantenan, anjeunna langsung nelepon ka Jakarta. Kulawargina anu di Jakarta rareuwaseun, naha anjeunna bet tiasa uninga yen ibuna nuju di rumah sakit alatan teu damang wales, padahal teu aya nu ngawartosan. Naha mungkin ibuna ngalaman OBE, jalan-jalan ka Walanda pikeun ningal putra kameumeutna? Jalmi anu mati suri oge saleresna tiasa disebat OBE, kumargi jiwana tos kaluar tina ragana sanaos mung sakedap. Seueur jalmi nu ngalaman OBE nalika nuju dioprasi. Sanaos nuju dina kaayaan teu sadar kumargi dibius, tapi seueur anu tiasa ngadongengkeun kalawan jentre kajantenan salami lumangsung oprasi. Malah seueur oge anu ngadon jalan-jalan kaluar ti rumah sakit, sarupaning sindang ka bumi wargi atanapi para sobat dalitna. Pami urang jujur, urang oge sering ngimpen aya di hij itempat atanapi pendak sareng hiji jalmi. Eta impenan atra pisan, sahingga urang jadi bingung naha eta teh kanyataan atanapi leres ukur impenan. Nuju alit keneh, simkuring sering ngalaman hal-hal anu arendah. Nalika kitu, simkuring sok nyiwit leungeun sorangan, kanggo mastikeun yen ieu teh leres kajantenan, sarta sanes wungkul dina impenan (OBE). Ku kituna, urang salaku manusa taya lepatna gaduh bakat sareng kamampuh ngalaman OBE. Namung, naha ieu OBE tiasa dileukeunan? Simkuring teu tiasa ngawaler kalawan pasti, sanaos anu "one way ticket" mah tangtos sadayana ge tiasa. Anu matak panasaran teh, upami hiji jalmi tiasa ngatur kaluar-asup sukma tina ragana, kacipta pilieureunana ieu dunya! Kumaha upami kontrak urang sareng Pangeran tos nincak kana mangsana, sahingga jiwa urang kedah kaluar tina raga? Jalmi anu betah hirup sareng hoyong salawasna hirup pasti bakal satekah-polah balik deui kana ragana, alias henteu maot-maot! Atanapi kalah luncat ka raga anu sanes? Kanggo panutup, Mang Ucup neda sihapunten saupamina seueur anu ngaraos dikuciwakeun atanapi dibobodo, kumargi simkuring teu tiasa maparin Elmu Ngaluarkeun Sukma p.p. Tiasa soteh mung kanggo "one way ticket". Neda maphum bae, Mang Ucup mah bodo keneh, teu acan tiasa ngawasa saluhureun nu eta. Mang Ucup Email: [EMAIL PROTECTED] Homepage: www.mangucup.net
