Acara TV ari malem minggu, sakapeung sok bosen ngalalajoanana, tapi untung stasiun MetroTV sok muter pilem-pilem khusus nu teu diputer di bioskop da lain pelem holywood, bolywood atawa pelem indonesia populer. Rupa-rupa pilemna, aya pilem jieunan urang Iran, Kurdi, Perancis ...jrrd. Dina salah sahiji pilem Iran aya adegan budak keur diajar dikelas, ger hujan ngagebret turun, si budak ngadigdig kaluar teu noleh guruna, ...... lalajo hujan, nu saumur-umur manehna acan nyaho sabab anyar pindah ti hiji tempat di Iran nu jarang aya hujan. Aya deui pilem kurdi, nu ngagambarkeun kumaha kejemna perang di Irak, nu ngalalakon dina pelem eta, barudak wungkul ....tapi ampir kabeh tanpa daksa: buntung sukuna, leungeunna, yatim-piatu ......
Nu sok rame mah, pelem Perancis. Geus dua nu dilalajoan. Nu kahiji nyaritakeun kumaha baheula waktu perang Dunya II urang Tunisia nu dijajah Perancis, direkrut jadi tentara perancis make saeutik embel-embel ngabela "tanah air perancis" nu harita diserebu jeung dikawasa Jerman. Nu kadua, malem minggu kamari, hanjakal lalajona ditengah-tengah, teu ti mimiti. Judul pelemna teh Le Grand Voyage. Ieu pelem nyaritakeun saurang imigran Maroko di Perancis nu hayang munggah Haji. Manehna dianteur ku anakna, nu lahir jeung gede di Perancis. Si bapa nu relijius ieu, boga prinsip lamun naek haji, ulah make jalan gampang, tapi kudu nu hese. Ceuk manehna leuwih afdol naek kuda kalde tinimbang mobil, leuwih hade naek mobil tinimbang naek kapal jeung leuwih hade naek kapal tinimbang naek kapal hiber. Jadi si bapa teh make mobil ti Perancis ka Mekkah. Sabab manehna teu bisa nyupir, anakna nu nyupiran. Anakna nu lahir jeung gede di Perancis, weleh teu ngarti kana sikep bapana nu relijius. Lalakon perjalanan bapa jeung anak nu boga sikep patulang-tonggong ieu, nu dicaritakeun. Hiji perjalanan nu jauh sabab ngaliwatan sababaraha nagara. Waktu tepi ka tapel wates Turki, bapa jeung anak ieu, keuna masalah dina paspor, untung aya nu nulungan urang Turki. Si urang Turki, sanggeus mangmereskeun masalah, ieu ngajak nyimpang ka imahna, terus ngarasa katarik indit ka Mekkah, manehna ngilu. DItengahperjalanan, masih di Turki, si "Turki" ieu ngajak anakna ka cafe ...terus nginum bir, mabok. Isuk-isuk si Turki ngaleungit, kaasup sabagian duit bapana, bekel ka Mekkah ........ Sikep anak jeung bapa nu patulang-tonggong, terus ditempokeun dina pelem. Lamun bapana sholat, budakna ukur lalajo ....hehehe. Hiji waktu, di hiji tempat di nagara Arab (sigana mah di Suriah atawa Yordania) maranehna nginep di losmen nu aya diskotikna. Si budak ngilu "brang-breng-brong", terus mamawa awewe ka hareupeun kamarna, tepi kapergo ku bapana. Bapana ambek...... ngadigdig mamawa koperna, ditutur-tutur ku anakna nu menta dihampura. Si bapana nagen tepi ka anakna ngagorowok: " Bapa, lain dina agama oge mere maap teh alus?" Loba deui adegan anu narik tapi panjang teuing ah dongengna. Singket caritana mah si bapa jeung anak teh tepi ka Mekkah. Budakna ukur nungguan, sabot bapana ngalakukeun ritual-ritual haji. Tapi bapana teu jol wae, si budak neangan ngilu pasedek-sedek jeung jamaah, bari gogorowokan ngageroan bapana. Ku petugas keamanan si budak di"aman"keun da ngaganggu. Adegan saterusna di Rumah sakit, bapana geus ngababatang, maot. Si Budak ceurik gagaukan terus ditempokeun adegan si budak ngiluan ngamandian mayit bapana. Adegan pangakhirna ........ si budak nyegat taksi, meureun rek balik ka lemburna, Perancis .... Hiji pilem lenyepaneun ............. Baktosna, WALUYA
