Dr. Sun Yat Sen mendjadi sama terkenal'nja di London dan doenia Barat, seperti doeloe ia djadi terkenal di Timoer lantaran soedah brani ketemoein dan bitjara Lie Hung Chang. Orang bisa mengarti jang dengen keada'an begini roepa. Legatie Tiongkok djadi ketakoetan sendiri, teroetama sebab Lord Salisbury (-teroes kritiek dalem soerat-kabar-) soedah protest ini Penangkepan jang belon terboekti" dengen kasih oendjoek jang perboeatan demikian melanggar keangoengan'nja Inggris, jang di Negri'nja tida haroes terdapet satoe gedong jang di sediaken boeat tangkep dan hoekoem orang² dari kalangan politiek. Demikianlah kedjadian, tatkala soedah dateng tempo'nja itoe kapal berangkat, Dr. Sun Yat Sen dilepas dari pintoe belakang'nja gedong Legatie. Sesoedah terlepas Dr Sun Yat Sen segra landjoetken domontratie" dengen terang²an. Memang doeloan poen setjara samar² ia kembangken Nasionalisme" dan democratie". Belakangan Dr Sun Yat Sen tambal ia poenja principe Manoesia moesti dapet hak aken hidoep" dan kamoedian lagi, tersoeroeng oleh aliran Sociaalisme" jang mendjalar tjepet di Europa; tegesnja: Manoesia haroes di kasih halaman hidoep", dengen mana ia maoe mengartiken pemerentah moesti menanggoeng boeat kesedjateraan rakjat. Ini semoea telah di gaboengken dalem satoe boekoe jang ia namaken Sam Min Chu I". Atas ini pokok telah diatoer tjabang- tjabang'nja dalem oeroesan pemerentah, antara mana selaen'nja diwan (*dewan) jang pemdjalanken pemerentahan (*Eksekutif), diwan wet (*legistatief) dan diwan kahakiman (*Judikatif) ia poen tetepken ada'nja: Diwan pengoedjian dan diwan penilikan (* Trias Politica jang sanget madjoe di itoe djaman). Sebagimana orang taoe, ini azaz² Dr Sun Yat Sen telah masoeken dalem wet pemerentah Tiongkok, tatkala ia soedah beroentoeng pegang kendali pemerentahan. Kita perloe tjatet di sini Dr Sun Yat Sen poenja kekoeatan bekerdja, bagimana oentoek sampeken angen² ia tida segan boeat koeliling. Di doenia Timoer ia telah koendjoengi Toerki, Palestina, India, Siam, Tanah Melajoe dan INDONESIA (Hindia Olanda) poen tida loepoet trima koendjoengan. (Bersamboeng : Kita inget bagimana di waktoe ia (Dr Sun Yat Sen) mengoendjoengi ini negri telah )