Ia batja itoe tellegram dan kamoedian serai itoe pada Sir James Cantlie, sedeng ia sendiri memaen teroes sama anak jang ia lagi pangkoe. Girang'nja ini orang toea Inggris boekan maen tempo membatja itoe; lantas poen ia bri slamat pada ia poenja bekas moerid jang dalem tempo tida bisa dibilang terlaloe lama soedah bisa doedoek di satoe korsi-pemerentah, memerentah satoe Republiek jang paling besar di dalem Doenia. Tida maoe membikin rakjat menjesel Dr. Sun Yat Sen balik ke Tiongkok dan pangkoe itoe djabatan, jang mana ia tjoema pangkoe 4 boelan, dan kamoedian ia serain itoe djabatan pada Yuan Shi Kai, jang keliatan kemaroek sama ini kedoedoekan. Dr Sun Yat Sen berboeat demikian sebab merasa itoe ada djalan jang paling baek boeat Tiongkok. Ia selama'nja bersedia boeat berkorban apa sadja boeat kebaekan'nja Tiongkok dan rakjat Tiongkok; dan boekti² dari ini perkata'an tertoendjoek dengen njata dalem seantero ia poenja penghidoepan pada sebelon peroebahan terdjadi, sampe ia mendjadi genap dan satoe Republiek Berdiri di Tiongkok. Dan di waktoe² negri atawa rakjat minta pengorbanan ia selama'nja bersedia boeat briken, dan ia poenja kedjoedjoeran boeat goena bangsa dan rakjat, membikin Dr Sun Yat Sen mendjadi terdjoendjoeng tinggi teroes, sampe ia menoetoep mata dan sampe sekarang poen itoe nama aken teroes terkenang. (bersamboeng: Selama hidoep'nja tida brenti'nja Dr. Sun Yat Sen kedjer )