Oetoesan² dari toean Pidjaja ada dateng dan kasih kabar bahwa radja kalang teroes memboeroe pada toean Pidjaja sampe di Madjapahit dan sekarang di minta pertoeloengan'nja Tiongkok poenja soldadoe boeat lindoengken pada toean Pidjaja, dan satoe officier ada mengikoeti dengen sepasoekan soldadoe pergi ke Tjanggoe, pelaboean'nja kota Madjapahit. Kaoe Hsing djoega madjoe, menoedjoe ke djoeroesan Madjapahit, tetapi waktoe ia dapet kabar jang belon ada ketentoean apa soldadoe² kalang soedah dekat atawa masih djaoeh, ia kombali ke Kali Mas. Tida lama kamoedian ia dapet kabar dari Ike Mese, bahwa moesoeh aken dateng itoe malem djoega, dan ia di prentah boeat madjoe lagi ke Madjapahit. Di hari ke 7 soldadoe² kalang dateng menjerang pada toean Pidjaja dari 3 djoeroesan, dan di hari ke 8, waktoe masih pagi sekali, Ike Mese kepalaken sebagian dari tentara'nja boeat poekoel pada moesoeh di sebelah Barat-Selatan, tapi moesti kombali dengen pertjoema, sebab tida bisa dapetken itoe moesoeh. Kaoe Hsing belkai dengen moesoeh di sebelah Tiomoer-Selatan (*Tenggara) dan binasaken bilangan ratoesan soldadoe Kalang, sedeng sisa'nja bisa melariken diri ke goenoeng-goenoeng. Deket siang moesoeh djoega dateng lagi dari sebelah Selatan, Kaoe Hsing kombali labrak pada moesoeh jang baroe dateng, dan di waktoe sore bala tentara Kalang soedah berhasil di moendoerken. VI. Kaoe Hsing, itoe kepala perang bangsa Tionghoa, lantas berkata: Maski toean Pidjaja soedah menahloek, ia boleh dapet rasa menjesel dari hal itoe dan, dengen berserikat pada Kalang, lantas menjerang pada kita. Kaloe sampe kedjadian begitoe, kita poenja pasoekan bisa dapet soesah besar, dan kita tida bisa doega bagimana ini expeditie nanti berachir." Ini mendjadi Kaoe Hsing kasih pikiran boeat teroes poekoel negri Kalang sampe antjoer sama sekali. Di hari ke 15 pasoekan perang Tiongkok di petjah mendjadi 3 bagian boeat poekoel negri Kalang, dan kepala² perang soedah sama bermoefakatan jang ia orang aken bertemoe lagi satoe dengen laen'nja di hari ke 19 di Daha, iboe kota dari negri Kalang. Sebagian dari tentara toeroet djalan'nja kali Brantas menoedjoe ke selatan, ike Mase madjoe dari sebelah Oetara Daha dan Sjih Pi dari sebelah Timoer Daha dan Kaoe Hsing sisir tepi kali Brantas. Sedeng toean Pidjaja, dengen tentara'nja hanja pada bagian belakang. Betoel pada hari ke 19 ia orang sampe di Daha dimana radja Kalang ada melawan dengen lebih dari seratoes riboe soldadoe, peperangan moelai di waktoe masih djam 6 pagi dan berachir pada djam doea lohor. 3 labrakan moesti di lakoeken pasoekan Tiongkok sebelon benteng Daha bisa petjah. Bilang riboean tentara Kalang binasa oleh pedang'nja orang Tionghoa, dan tida bisa di itoeng soldadoe jang lompat dalem soengei. Poetera Radja Kalang moendoer dari Kraton'nja lari ke goenoeng bersama dengen itoe kraton soedah terkepoeng oleh pasoekan dari Tiongkok. Deket sore radja Kalang keloear dari Kraton boeat menakloek akibat'nja kraton loepoet dari pembakaran. Kamoedian Pidjaja tawan semoea Radja, permaisoeri dan anak dari officier² Kalang. Taoe ini semoea kamoedian Kaoe Hsing minta idzin boeat kedjer sang poetra, dengen bawa 1000 pasoekan Kaoe Hsing naek goenoeng boeat tjari itoe Poetra mahkota Kalang. Djoestroe pergi'nja Kaoe Hsing, pasoekan Tiongkok djadi dapet tjilaka. Sjih Pi dan Ike Mase soedah kena di bikin bodoh oleh orang² Djawa. VII. Dari penoetoep riwajat hal petjah'nja kota Daha dan taloek'nja Hadji Kalang, kita boleh bikin doegaan, pasoekan Tiongkok soedah dapet keroesakan tida sedikit lantaran itoe peperangan dengen labrakan hingga 3x, kerna kaloe tida begitoe, kepala² perang Tiongkok tentoe tida maoe trima dengen begitoe gampang Hadji Kalang menakloek diri, dan lantas sadja moendoerken pasoekan. Ini hal soedah membikin toean Pidjaja dapet pikiran boesoek, ia minta pada Sjih Pi dan Ike Mase, soepaia ia dibri idzin poelang ke negri'nja, aken menoelis satoe soerat baroe boeat menjataken ia soedah menaloek pada Tiongkok dan aken bikin sedia roepa² barang boeat di persembahken pada Kaizer. Ini permintaan di trima baek oleh Sjih Pi dan Ike Mase, dan toean Pidjaja dikasih doea officier dengen 200 soldadoe boeat anter" pada'nja. Di tengah djalan toean Pidjaja boenoeh ini doea officier plus 200 tentara dan dari doea djoeroesan ia lantas menjerang pada barisan Tiongkok jang lagi moendoer. Sjih Pi ada kepalaken bagian belakang dan oleh toean Pidjaja di pisah dari bagian jang lebih besar. Sembari beklai, ia moesti berdjalan berapa poeloeh mijl djaoeh'nja sebelon ia sampe di tempat kapal²nja berlaboeh.