Oleh: Liem Thian Joe Ada satoe djaman di mana golongan pranakan Tionghoa di Djawa Tengah ada taroh perhatian besar pada kasoesastraan Djawa, jaitoe tatkala pembatja'an Melajoe jang goenaken hoeroef latijn belon ambil bagian penting di dalem kalangan masjarakat kita, seperti di dalem tempo setengah abad kemaren. Pada abad jang laloe, pertama berhoeboengan dengen pergaoelan jang rapet antara kaoem kita dan pendoedoek priboemi; kedoea lantaran pada masa itoe soeker'nja di dapet roemah² sekolah, baek Tionghoa maoepoen Melajoe, maka banjak anak² Tionghoa jang masoek di dalem sekola² priboemi, dimana selaen'nja beladjar hoeroef dan bahasa djawa djoega anak² itoe haroes pahamken kasopanan² djawa seperti moerid² laen'nja. Dari sitoe maka kesoesastraan Djawa lebih mendjalar loeas di kalangan pranakan Tionghoa. Ada banjak sekali orang² Tionghoa di itoe koetika jang begitoe pande goenaken hoeroet dan bahasa Djawa, tida beda'nja sebage pendoedoek Priboemi aseli. Dari sebab itoe achir'nja telah terbit boekoe² Watjan (kitab hoeroef dan bahasa Djawa pake tembang) dari tjerita Tionghoa. Sebegitoe djaoeh jang saja taoe, tjerita² Tionghoa jang di salin ke dalem bahasa dan hoeroef Djawa (pake tembang), antara'nja ada: Shih Djien Koei Tjing Tang; Shih Djien Koei Tjing See; Tik Tjhing Ban Hwa Lauw; Tik Tjhing Ping See; Tio Khong In Hoei Liong Thwan; Yo Tjong Poo; Sam Kok. Dari beberapa tjerita terseboet di atas, melaenken tjerita Sam Kok jang di tjitak dan tersiar loeas di kalangan Publiek, lantaran tjerita ini doeloe di moeat sebage feuilleton di dalem soerat-kabar SLOMPRET MELAJOE jang di terbitken oleh firma G.C.T. van Drop, Semarang, dari taon 1890 sampe 1894, tetapi belon tamat* (*) (Slompret Melajoe di terbitken pertama kali pada taon 1876 dan brenti terbit dalem taon 1910. Pengarang dari Sam Kok bahasa Djawa jang di moeat di dalem soerat kabar tadi adalah toean R. Goenawan di Maospati-Madioen dengen bantoean'nja seorang Tionghoa. tetapi nama pembantoe Tionghoa terseboet tida di seboetken. Oleh orang² jang mengarti kesoesastraan Djawa, salinan atawa tjara soeroepken pangkat² Tionghoa ke dalem kebesaran² Priboemi ada soeroep sekali, sementara tembang'nja amat bagoes. Teroetama bagian Khong Beng adoe bitjara di Tong Gouw dan Tjo Tjho kalah perang di Tjhik Phik, ada bagian² jang sanget di soeka oleh pembatja'nja.) Tjerita² jang laen semoea di toelis dengen tangan, malah djika saja perhatiken dari goerata²'nja sang hoeroef, orang tida goenaken pena dari logam boeat menoelis itoe, hanja masih pake boeloe gangsa. Boekoe² itoe ada mendjadi milik'nja famillie² Tionghoa toea jang soeka dengen boekoe pembatja'an. Sebegitoe djaoeh jang saja inget, boekoe Yo Tjong Poo ada milik'nja famillie Njoo di Ngadiredjo, Parakan, dan ada salinan'nja toean Njoo Tik Hap, jang sekarang telah beroesia koerang lebih 82 taon. Boekoe² watjan doeloe biasa di pindjemken oleh orang² jang mempoenjai kerdja, oepama lahirken anak, menikahken, kematian, gadangin orang sakit dan sebage'nja poela, dimana orang biasa doedoek sampe djaoeh malem atawa sampe fadjar. Goena mentjegah mereka mengantoek, maka orang batjaken boekoe² watjan itoe. Djoega entjim² pranakan Tionghoa pada djaman itoe, soeka sekali dengerin orang batja boekoe² Tionghoa itoe jang di salin ke dalem bahasa Djawa dan di tembangin. Boleh djadi sama getol'nja dengen kita poenja siotjia² dan ensoo² djaman sekarang djika nonton bioscoop. Saja doeloe kenal satoe entjim jang biasa trima panggilan dari golongan njonja² djika mempoenjai kerdja, oentoek batjaken boekoe salinan Tionghoa itoe boeat kaoem'nja. Djika ini entjim membatja ada poeloehan siotjia dan oewa² jang toengkoelin hati'nja goena dengerken itoe entjim poenja soeara jang moeloek, ia poenja tembang ada begitoe enak, dan orang kesengsem sampe terkadang deket fadjar baroe pada boebaran. Selaen itoe boekoe² salinan dari tjerita Tiongkok, ada lagi satoe boekoe watjan jang meloekisken lelakon pertjintaan antara satoe Sultan dan Njonja Koei, jang amat disoeka oleh golongan lelaki Tionghoa, sebab heibat!". Sampe pada permoelaan ini abad kaoem istri Tionghoa di Djawa Tengah masih asing dengen segala njanjian, apalagi Song" atawa lagoe² Barat, tetapi mereka lebih mengerti pada tembang² seperti Asmorodono, Midjil, Dangang goelo, Kinanti dan laen-laen. Tetapi sedjek di kalangan Tionghoa terdjadi perobahan, jaitoe dengen masoek'nja pembatja'an bahasa Melajoe dengen goenaken hoeroef latijn, boekoe² watjan begitoean lantas terdorong ke satoe pinggir. Djoega di Batavia di kawasan petjinan kira² 40 taon jang soedah ada kebiasa'an boeat dengerin TOEKANG DONGENG", jang tjeritaken tjerita² koeno Tionghoa di waktoe orang kematian enz. Doea toekang dongeng terkenal ada `Ntjek Lim Joen dan emah Kie Sen (jalah satoe mah'tjomblang). Seperti djoega di Tiongkok di ketahoei banjak toekang dongeng di djalan besar. Djoega di Batavia doeloe ada ini toekang² tjerita di Kongsi Besar di djalanan. Orang jang maoe denger bajar se Gobang!". Madjoe'nja pembatja'an melajoe di kalangan Tionghoa di Djawa Tengah, adalah berhoeboengan dengen di boeka'nja filial dari toko boekoe Yap Goan Hoo, Batavia, di Gang Pinggir Semarang pada taon 1894. Toko boekoe ini telah terbitken banjak boekoe² Melajoe, salinan dari tjerita² Tionghoa, jang banjak di soeka, hingga populairteit dari kitab watjan lantas mendjadi ilang. Sekarang boekoe² watjan itoe djadi sadja seroepa barang antiek di kalangan kita. Pada taon 1926 volkslectuur poen pernah terbitken boekoe tjerita Sam Pek Ing Tay di dalem bahasa Djawa (ngoko) dengen hoeroef latijn. Dalem taon 1932 volkslectuur terbitken salinan Djawa ( oleh S. Sastrasoewignja) dari tjerita Ma Tjoen" dalem 3 djilid. Tjamboek Berdoeri28.