Karaj listanoj,
mi ĵus aliĝis al tiu ĉi dissendolisto kaj ŝatus informi vin pri nova
literumkontrolilo por esperanto uzebla en OpenOffice.org.
Mia nomo estas Marek Blahuš, mi estas 23-jaraĝa aktivulo de la
esperanto-movado en Ĉeĥio, interalie estrarano de e...@i. Profesie mi estas
studento de magistra studo en la Fakultato de informadiko ĉe la
Masaryk-Universitato en Brno. Tie mi ankaŭ en junio 2008 defendis
bakalaŭran studlaboraĵon kadre de kiu mi kreis prototipon de nova
literumkontrolila vortaro por esperanto, bazita sur kaj utiliganta la
novajn kapablojn de la literumkontrolilo Hunspell. Vi povas trovi
resumon kaj plenan tekston de tiu studlaboraĵo ĉe:
http://is.muni.cz/th/172464/fi_b/?lang=en
Mi jam prezentis ĝin ĉe kelkaj esperantistaj kaj sciencistaj kunvenoj,
interalie dum la 93-a UK en Roterdamo kaj la 18-a jarkunveno de
Gesellschaft für Interlinguistik en Berlino.
Originale la literumkontrolilo estis celita kiel parto de la
gramatikkontrolila projekto "Lingvohelpilo" de e...@i, sed dume ĝi ankaŭ
parte sendependiĝis. Nuntempe, mi kadre de stipendia programo ĉe la sama
fakultato daŭrigas tiun projekton. Iu skizo pri tiu daŭrigo estas ĉi tie:
http://nlp.fi.muni.cz/projekty/esperanto_spell_checker/
Konkrete, en la nuna, lasta fazo, la tasko kiun mi al mi donis estas
klopodi oficialigi mian plibonigitan literumilon kiel parton de
OpenOffice.org (kies literumkontrola motoro ja nuntempe ankaŭ estas
Hunspell), tiel ke esperantlingvaj uzantoj povu trovi, elŝuti kaj
instali ĝin, kaj laŭeble ke ĝi eĉ estu elŝutebla rekte kiel parto de la
esperantlingva pakaĵo de OpenOffice.org.
Ankaŭ ĉar la tasko "literumkontrolilo por poluri" plu staras kiel
farenda sur la ĉefpaĝo de la projekto eo.openoffice.org, mi esperas ke
mia iniciato estos bonvena en ĉi tiu forumo kaj ke mi ricevos la necesan
apogon de la komunumo por miaj intencoj.
Kompare kun la nuntempe uzata literumkontrolila vortaro de Sergio
Pokrovskij, la mia estas bazita sur algoritmo kiu helpe de morfologie
klasita listo de radikoj kaj eksperimente derivitaj reguloj pri
vortkunmetado rekonas ankaŭ multajn tiajn kunmetaĵojn kiuj estas oftaj
en esperanto sed nerekonataj de la literumkontrolilo de Pokrovskij. La
nova literumkontrolilo ankaŭ klopodas pli aktive utiligi la novajn
eblecojn de Hunspell, dum tiu de Pokrovskij estas bazita ankoraŭ sur la
eksiĝinta Ispell kaj cetere ne estas plu ĝisdatigata. Cetere Pokrovskij
mem respondis al mia demando sciigante ke, se li estus faronta novan
literumkontrolilon nun, li supozeble bazus ĝin ĝuste sur Hunspell. Tre
grave por la integrigo en OpenOffice.org, ekzistas problemo kun kongruo
de la permesiloj por la literumilo kaj por OpenOffice.org, pro kio ĝis
nun ne eblis liveradi literumilon kiel integran parton de la
esperantlingva pakaĵo (anstataŭe ĝi estis elŝutenda aparte). Mia
literumilo baziĝas sur la kapvortoj de PIV (kiuj estas pluuzeblaj laŭ
libera permesilo) kaj la cetero estas mia laboro, tiel ke la kondiĉoj
devus ekzisti por ebligi aŭtomatan distribuadon de la literumkontrolilo
rekte kun la programpakaĵo.
Nuntempe mi ankoraŭ estas kontaktiĝanta kun la administrantoj de la
projekto eo.openoffice.org, sed mi opiniis inda jam nun informi vin pri
tiu ĉi mia klopodo. Espereble jam tre baldaŭ mi sukcesos instali ilon
per kiu eblos raportadi cimojn kaj plibonigajn proponojn pri la
literumilo, kaj tiam mi ankaŭ disponigos ĝin en taŭga formo por testado.
Mi tre esperas ke precipe inter vi, la membroj de tiu ĉi dissendolisto,
mi tiam trovos bonvolemajn testantojn kiuj kontribuos al evoluo de tiu
nova libera literumkontrolilo por esperanto.
Sincere,
Marek Blahuš (Ĉeĥio)
---------------------------------------------------------------------
To unsubscribe, e-mail: [email protected]
For additional commands, e-mail: [email protected]
