http://www.xornal.com/artigo/2009/09/30/sociedad/xunta-desfaios-proxectos-tecnoloxicos-do-bipartito/2009093022455236900.html
Un cento de técnicos, a maioría vinculados á sociedade da información, reciben notificacións de fin de contrato e o Goberno non define os seus plans --------------------------------------------------------------------- A Xunta de Galicia está levando a cabo o desmantelamento dos proxectos tecnolóxicos vinculados a sociedade da información, que impulsara o goberno bipartito na pasada lexislatura. O 15 de setembro, a Administración confirmou o despedimento de sete traballadores do Centro de Referencia e Servizos de Software Libre (Mancomún), dando comezo a un proceso que rematará a finais de decembro. Outros sete empregados de proxectos de investigación e desenvolvemento foron botados onte, namentras aos técnicos da Fundación Calidade xa se lles ratificou por carta a data de finalización dos seus contratos. En total, 120 persoas perderán o seu traballo a finais de ano, segundo denuncia a CIG. ?Trátase dun despedimento masivo cando en todas partes se está apostando polo fomento da I+D; a Xunta, en cambio, despide a todo o cadro de persoal?, explica Manuel Gallardo Canitrot, secretario nacional de CIG Administración. Pola súa banda, dende a Secretaría Xeral de Modernización e Innovación Tecnolóxica, da que dependenden todas estas inciativas, limítanse a reponder que, de cara ao ano 2010, todos estes proxectos ?serán adaptados ás liñas estratéxicas? do departamento e manterán a súa vixencia, aínda que non precisan como lles van afectar estes cambios. Suso Baleato, antigo coordinador de Mancomun, considera, en cambio, que ?nun proxecto tecnolóxico o importante é o coñecemento, non os ordenadores, e iso está nos traballadores; se prescinden de todos eles, prescinden do proxecto?. ?Eu entendo que para a Xunta a tecnoloxía non é unha prioridade?, di. DISTINTOS CASOS En concreto, a iniciativa máis afectada é a Rede de Dinamización da Sociedade da Información, destinada a favorecer o acceso ás novas tecnoloxías de diferentes sectores sociais, como maiores ou mulleres, e que conta cuns 80 centros en toda Galicia. Neste programa, hai 80 traballadores que perderán o seu posto. O mesmo ocorre no Observatorio Galego da Sociedade da Información, onde hai catro persoas adicadas á recollida de datos sobre o acceso ás TIC. Tamén están afectados empregados do mapa de infraestruturas ?que determina os puntos de acceso a internet en Galicia?, cinco técnicos adicados ao mantemento de portais e plataformas tecnolóxicas e o persoal das oficinas universitarias que traballan en distintos programas de software libre. Ademais, as partidas orzamentarias destinadas tanto ao desenvolvemento de programas de estándares abertos coma a proxectos tecnolóxicos deste tipo a través da Fundación para o Fomento da Calidade Industrial e Desenvolvemento Tecnolóxico de Galicia e do Centro de Supercomputación de Galicia (Cesga), máis de dous millóns e medio de euros, ?desapareceron; namentras que a actual Administración veu incrementando o gasto en licencenzas de Microsoft nos últimos meses. A deputada do BNG, Ana Luisa Bouza, que xa fixera unha pregunta no Parlamento no mes de setembro sobre os despedimentos de Mancomún, explica que o obxectivo do bipartito era que ?a Xunta asumira programas como Administración e que contratara ás persoas necesarias para levalos adiante?. A deputada considera, pola contra, que agora a situación é distinta. ?Co PP, o que hai son subvencións a asociacións afíns en plan clientelar e para deixar a deber favores?, di. -- --- Saúde. ...................................................................... Alexandre Prieto. Vigo-Galiza. CiberIrmandade da Fala: Por Galiza e a sua lingua propia, colabora http://www.ciberirmandade.org A defensa da lingua da Galiza, tamén na rede ......................................................................