Konkan Relve Mornnak Rosto? Dha disam bhitor desant relgaddiechem don marekar obsoeg zale, ek Konkan Relve, Sindhudurg jil'leant ani ek South Central Relve, Andhra Pradexant. Poileant 51 ani dusreant 18 tori lok ontorlo ani sabar zokhmi zale. Poileachem karann nisorgi zalear dusreachem kamdaranchi befikir mhonn dubhav asa dekhun Reli Montri Nitish Kumar hannem 6 odhikareank sthogit (suspend) keleat. Maiant Punjabant Mumboi Amritsar Golden Temple Express gaddiecheam tin ddobeank uzo pettun 38 zann mel'let. Religaddiancho ani relimargancho favo to samball zaina mhonn antrea poirean obsoeg zatoch asat.
Adim ani Atam Sumar 40 vorsam fattim oslea eka lhan-xea obsoegak lagun apli noitik zababdari ollkhun tednachea Reli Montri Lal Bahadur Shastri-n Montripodacho rajinamo dil'lo ani Prodhan Montri Jawarharlal Nehru-n to svikarlolo. Ponn te poder mele ani te undde somple. Team montreanche dakhovpache ani chab'pache dant tech asle. Atanchea montreanche dakhovpache veglle ani chab'pache veglle. Team montreamnim eka kallar aplea pokxacho vavr korunk Montripod soddlolem. Atanche Montri zavnk aplea pokxachem dhoronn bodoltat ani goroz poddlear pokxui soddtat. Tednache Jana Sangh vangddi (atam BJP) aplo pokx virgollun Janata Pokxant riglole ponn teach borobor aplem RSS vangddiponn soddun divnk kobul nasle dekhun, Somajvadi Madhu Limaye-n boball kel'lo ani Janata Pokxacho Morarji Desai sorkar poddlolo. Ponn az teach Madhu Limaye-che sangati George Fernandes ani Nitish Kumar RSS- BJP vhoddilponnachea sorkarache Montri asat. Khorem mhonnlear, Konkan Relvechea obsoegak lagun George Fernandesanui rajinamo divnk zai aslo karann, ho relimarg bandpant to mukhar aslo ani atam obsoega vixim ek utorui ulounk na. Nitish Kumar-an aplea Samata Pokxache vangddi apnnacher bhroxttacharache arop kortat mhonn nixedh marun rajinamo dil'lo ponn itle lok melet dekhun dilona. Bhiranticho Relimarg Konkan Relvecho marekar obsoeg zatoch, choddxea lokak khobor nasloleo goxtti dakhol zaleo, ani teo Relvecheach odhikareamni ugddapeo keleo. Hea 760 kilometranchea relmargar osle obsoeg zavpa sarkeo 46 svato asat ponn atam obsoeg zala ti svat heam 46 svatam modli nhoi. Oxe obsoeg zavpachi itli bhirant aslolo desant anik relimarg na. Oxem zalear, ho relimarg khoinchean bandcho tem tharaitana, zom'nichi topasnni kelina? Tedna he zom'nichem soimb koslem tem gomlemna? Gomlolem zalear, oslea konsollta tosle zom'nichea vattarant relimarg kiteak bandlo? Marekar obsoega uprant heach margar Ratnagiri vattarant anikui mati konsllun ani khoddop poddun ieradaricher bada aili. Titlea mhonnsor provaseanchea suguponnachea huskean Maharaxttrantlea Shiv Senan kel'lea vicharak lamb zabab divn, nisorgacher (nature) virodh apnnachean zhuzunk zaina mhonn aponn mandun ghetat ponn monxancho jiv samballunk choddant chodd proitn korunk ani nisrogche vagnnukecho obheas korun somzunk zata mhonn Konkan Relveche odhikari sangtat. Ponn nisorga virodh zhuzunk poddta thoim relimarg bandlo kiteak? Goeant legun khoddpi zom'nir he relimarg bandunk porjechem magnnem aslem taka nhoikar divn, khaznache mou zomnir bhor ghalun relimarg bandlo ani hea vorvim kontradorancho vavr vaddoilo ani masallpikall xetkamtachi zomin padd keli. Sugurponnachi Khatri Konkan Relvechea odhikareamni kolloil'lea promannem obsoeg vattaunk pavsalleant 200 lok obsoeg zavnk xokta toslea vattarant dis rat bhonvon paro kortat ani tancheo bhonvddeo atam anikui vaddoitole. Abril- Maiant tanchi vorsavollichi topasnni asta ani tea pormonnem pausallea adim goroz to vavr kortat. Konsollta tea vattarak sttil zalli ghalunk ievjilam ani atam pasun 50,000 metr lambaiek ghalea. Ho relimarg toiar kortanai zannkarancheo budhi ghevn upai ghetleat. Halinchea marekar obsoega uprant anikui Ru 25 kotti khorchitole ani bobdam ani sonkoxttanchea svatancher religaddi cholovpeak konsoll'lear adim- fuddem kollon ievnk 800 Raksha Dhaga iontram bosounk tharailam. Ponn itleo rattavolli ani hispa bhair khorch korunk poddta ani torii sugurponnachi khatri na toslea vattarant relimarg kiteak bandlo? He vattar vattaunk zainaslo? Ani 800 iontram bosoitoch legun, boltech svater, atam zalam toxem, mati konsllunk zaina? Oslea vattarant anik "Bullet Train" ghalpachi? Hem sogllem nihallun, monant ievzota tem hem: Kontradorank chodd duddu mellunk ani lagu zatoleam Relvecheam odhikareank vhoddle hafte mellunk Konkan Relimarg oslea vattarant bandla oso hea vattara vixim horkot asli tanchea aropant sot asa. Tosoch ho relimarg injinerkechem ek novol mhonntale, to provaxeank tanchea thikannar pavounche bodlek mornna sorxem pavounk bandla mhonnlear otitai nhoi. ??Felix P. da Cruz MON'XALL HOK'K Nit na, zalear xanti na. Mon'xall hok'k ami rakhonant, zalear nit asum nozo, mhonntoch sovostkai asum nozo. Mon'xall hok'k mhonnlear kitem? Hanv Sallganvche Sim'narint Konknni xiklam, tedna mhozo Guru, Pri.Crescencio Monteiro, aplea vavran mhaka ek nomunno zala. Tannem aplem veakron, "Konknni Guru-Pustok" chear bhasamni-Konknni, Inglez, Portugez ani Jerman bhasamni boroilam. Tea bhair, Konknni Sobdkox rochun haddla. Tannem khorench bhorpur vavr aplea jivitant kelo. Bhaso xiklo ani teo xikoileo. Tachem Gurupustok ghevn, hanv nhoich Konknni xiklom, ponn tornne piraier Jerman bhasui vachunk ani somzunk xoklom. He bhaxen khub totvgniananchi ani dhormxastranchi mhaka mahiti-ollokh mell'li. He khasgi veaktichea vaddhpache hok'k hea Gurun amkam aplea jivitache chalin xikoile, dekhun az hanv taka abhari. Xikunk, aplem mon uzvaddaunk, dusreankui ho uzvadd divnk-he sobhar hok'k hea mhojea Gurujin mhaka uzvaddailet. Mon'xak khasgi ani somajik hok'k asat: vavr korunk, apli udorgot korunk, aplem xikop korunk, ektthaim ravun mellave korunk, kosloi sodhpus korunk, aplea vaddpa khatir zhuzunk taka hok'k asat. Mon'xanche hok'k paiam tolla mostun, mon'xachem vorteponn ami noikartat, mon'xak gulam' koso kortat, mon'xank mon'zatim porim dhortat, tankam koir koso ami vagoitat. Amchea Dalit bhavam-bhoinnanche hok'k ami paiam tolla mostitat. Kitli maramari! Kitli onit! Kitlo bholatkar! Amchea bhoinnam sovem kitli chepnni! Bharoti Kheast-kaido (Indian Criminal Code) ostoriancher bholatkar korit, zalear kolm 354 lagu zata, ani tancheo moskorio korit, zalear kolm 509 lagta. Jezu mon'xanchea mogan hea sonvsarant aila. Peleacho mog tannem amkam xikoila, toch mog to khursar poreant dakhoila. Mon'xanche hok'k sambhallunk to zhuzla. Dev somestancho Bapui, to sogleancho mog korta, to borea ani vaittancher suriachim kirnam fankoita, tech porim amim ekamekacho mog korunk to amkam ulo marta ani tachoch deivik mog to amchea kallzant romboita (Ju 13:34). Povitr-Sobhen aplea don hozarkechea ithiasant osloch Kristi-deivik mog dakhoila. Kitleoi chuki asot, hea mogak ti axeta ani hoch mog ti vantt'ta. Mon'xanchea hok'kam khatir ti aplo provadi ulo ubarta. Amchem misanv mhollear mon'xam khatir vavrrunk, tanche hok'k sambhallunk ani he porim ami Jezuche govai aichea odhunik sonvsarant zavnk!?? Ivo da C.Souza (Raiturchi Sim'nar) ########################################################################## # Send submissions for Goanet to [EMAIL PROTECTED] # # PLEASE remember to stay on-topic (related to Goa), and avoid top-posts # # More details on Goanet at http://joingoanet.shorturl.com/ # # Please keep your discussion/tone polite, to reflect respect to others # ##########################################################################