V. Ixtt Samachar * News from V. Ixtt 5 Kherit suttiam vixim amdar Mathanychem mot -------------------------------------------- Matanhy Saldanha on the plan for 5 holidays
Halinch Goem sorkaran 5 kherit suttiam vixim aplem dhoron jahir kelam tem fattim gheunchem mhunn Kutt'tthallecho amdar Mathany Saldanha hannem maglam. Sorkari Khateant nokri kortele kamdar aplem kam' vevosthit korinant oxem dista zalear ani tea khatir tankam odik vell zai zalear sorkaran mhoineacho poilo vo tisro sonvar kamcho mhunn jahir korcho mhunn tannem sanglem. Halinch sorkarn Dusserah, Bhag. Francis Xavierachi porob, Id, Holi, adi oxea soglea mellun panch porbancheo suttio kaddun uddoupacho proitn kela taka ul'lekhun amdarr Saldanha hannem aplem hem mot manddlem. Bhurgeanchi poristhiti sudraunchi --------------------------------- Rajasthanant ostoream ani bhurgeam khatir punorvo-sonnachi (rehabilitation) kendram asat tanchi poristhiti borich bigoddleli pollevn tanchi sudarnni korunk duddvanchi odik bondobost korchi mhunn Rajasthan Unch Neaialoian punorvosonnachea soglea kendrank hukum dila, Rajasthanant Shishu Grah ani Balika Grah hantunt vosti kortelea 103 bhurgeanchi poristhiti sudraunk Korttan maglam. Bholaiken borim aslolea bailank ani bhurgeank barik zor ani her pidda zaloleam piddestam vangdda ravchem poddtta. Bhag Francisk Xavierachea Relikanchi dakhovnn --------------------------------------------- Exposition of St Francis Xavier in 2004 Porneam Goeam St Francisk Xavierachea Relikanchem Expozisanv ietea vorsachea Novembrache 21ver tem Janerache 2rer 2005 vorsa meren astolem mhonn jahir zalam. Dor dha vorsamni St Francis Xaiverachea Relikanchi dakhovnn korpachi Goenche Arkidiosezint chal asa ti monant dhorun hi 16vi dobajik dakhovn korunk tharailam mhonn Patriark Saiban apli dikri porgottun jahir kelam. Poili dakhovnn 1782 vorsachea Fevrerache 10ver tem 12ver porian keloli. Relikanchi 15vi dobajik dakhovn zaloli ti 1994 vorsa Novembr 21vi tem 1995 vorsa Jan. 7vi poiran. Bispanchim Hindunk porbim ------------------------- Archbishop greets Hindus Ganesh Chaturthiche porbe somoiar mukhel montri ani Rajpala xivai, Adhari Bisp Felipe Neri Ferrao sangata Patriark Raul Gonsalves hannem Hindu bhavam bhoinnank porbim dilim ani sontosbhorit Ganesh Chaturthi anvddele. Devan amchea kallzamni ani monamni khoro mog ani ekamekacho husko ghalcho ani hea denneam vorvim ekuch vhoddlo somaz novsorunk ani thir korunk pavchim mhonnlam. Ikravechea xikpeam khatir Cyberage ievzonn ------------------------------------------ Cyberage scheme for other Std XI students Ikravechea Vidnean ani Vevsaik songonnuk (computer) tontrnean obheaskromantlea xikpeam khatir Cyberage videarthi ievzonn iesesvi ritin chalik lailea uprant sorkaran 2003-04 hea xikxonnik vorsa ikravi Kola, Vannijio, Vidnean ani Vevsaik (venchik) obheaskromantlea xikpeam khatir he ievzonnecho faido divpacho nirnnoi ghetla. Orje ani odik mahite khatir lagu zatolea sonsthanchea mukhelamni Somar, 8 Setembr 2003 disa Xikxonn Sonchalanaloi, Ponnji hanga khobor kaddchi. Sonsthechea mukheleamni aplea vangdda fantteam pormonnem mahiti haddchi. Purnn ritin bhorleleo orzo Somar tarik 22 Setembr hache poilim xikxonn khateant svikartele. Konknni Xikxok Proxikxonn Kendr suru korpak magnnem --------------------------------------------------- Plea to launch a 'Konknni Xikxok Proxikxonn Centre' Goeant 250 poros odik osorkari ani 78 Konknni madheomacheo sorkari xalla asat. Goenchi bhou-sonkhea (majority) lok konknni uloitat, khubxe zann khasgi vevhar konknni bhaxentlean kortat. Baravek 7 hozaram poros odik bhurge dor vorsa konknni vixoi ghevn pas zatat, ponn dukhachi gozal mhollear mullavea panvddeacher konknni xikxonn ghevpi hozaramni bhurgeank xikovnni xikxokank proxikxonn (training) divpak 'Xikxok Proxikxonn Kendr' D.Ed hachi vevostha na. Te khatir Konknni vixoi ghevn pas zavpi bhurgeanchea fuddara khatir ani konknni mullavea xikxokanchi goroz nodre mukhar dovrun ieta tea xikxonnik vorsa 2004-05 thavn Porvore hanga aslolea Xikxok Proxikxonn Kendrant inglix ani moratthi madheoma vangddach konknni madheo-mantlean Diploma xikxonn suru korchem oxem magnnem korpi chitt halinch Harvalle Sankhlle hangachea kaim huskeabhorit tornatteamni bholaike Montri Dr. Suresh Amonkar haka dilea. "Gonnpoti Bap'pa Morya" surar dedd disancho gonnpoti pavoilo ------------------------------------------------------------ Reports on the Ganesh festivities underway Morya, Gonnpoti Bap'pa Morya" oxea utramni gait ani fog-marannancho goddgodd korun Somara dis dedd disancho gonnpoti pavoilo. Pavsan visov ghetlo tea khatir gonnpoti pavoupak ani zai toso fog launk gonnpoti pavounk hajir asloleam modem borich umed distali. Somara disa sokallim thavn usram meren ganvchea lokamni novim angavlim ghalun ghora-ghoramni vochun arteo korun gonnpotichem dorxon ghetlem. Sanje vellar ghorantlea dor eklean ganvantlea ghoramni kelole dekhave polleunk gordi keli. Pavsacho matui nett naslolean porum poros hea vorsa lokamni dekhave polleunk borich lutt keleli disun ietali. Kristi bhav-bhoinnamni-i aplea hindu xezari ani ixtt-ixttinnichea ghoramni bhett diun tankam gonnes porbechim porbim dilim. Sanje vellar ghumttam ani tobleanchea talar arti korun kaim hindu bhavamni dedd disanchea gonnpotichem nhoint zalear kaim kaim zannamni baint ani tolleant visorjon kelem. Novem Bhoktivont Setembrache 14ver Zdenka Schelling --------------------------------------------------- The making of a saint in Slovakia Slovkia, hea Evropa-chea Ut'tor desant Kriva ganvant Cecilia Schelling nanv ghevn zolmolem. Tacho avoi- bapui Pavol ani Zuzanna. 10 bhurgeam modlem tem novem. Povitr Khursachea madrim lagim tannem aplem mullavem xikop kelem. 16 vorsanche piraier tem "Sister of the Mercy of the Holy Cross" he madrinche sonsthent bhitor sorlem. Apleo angovnneo kortana tannem nanv bodol'lem ani Cecilia aslem tem Zdenka kelem. Onek hospitolamni "nurse' koxi tannem vavr kelo. Itle churchure ani sosnnikai tachea vavrantli polleun, tem khorench bhagivont mhonn kolltalem. Komunist raj cholounk lagle tedna taka tanchea hatamni zaitem soschem poddlem. Fevrerache 20ver 1952 vorsa tacher kosloch arop nastana taka dhorun vhelem ani bondhkhonnint ghetlem. Bondhkonnint aslolea eka duent padrik tem soddounk sodtalem mhonn tacher boglantt ghatlem. Prague xarant taka bondhkhonnint dovorlem. thoim taka tore-toreche proxn vicharun sotaunk lagle. Xekim Julaiache 31ver 1955 vorsa osoktaiek lagon tacher moronn ailem. 39 vorsanche piraier dekhivont kristi jivit jieun tem melem. Heach bhoktivontache sonsthecheo madri amchea Goeant tin svatancher vavr kortat: o Tivim, Damedem, tanchem Akarnnechem ghor asa. o Tivim, Cansa, tancheo dog madreo AIDS piddechea vaittakarancho samball kortat. o Ambaulim (Quepem) goribam modem somajik vavr kortat. Sonsode ghoracher hol'lo korpeak marlo -------------------------------------- Attacker of parliament killed Don vorsam fattim Delhi sonsodechea ghoracher akromonn kelolea mukhi akantvadi Gazi Baba haka surokxonn bollamni 10 horam far mar kortana her char akantvadeam borobor marun uddoilo, oxem Xima surokxonn Foujechea odhikarean sanglam. Hea far maramni ek BSF soinik ani her 8 rakhonddar meleat toxech ek komandar ani 2 adhari komandar zokhmi zaleat. Gazi baba melo mhonn Jaish-e- Mohammad hache akantvadi mandun ghenant. Gazi babak adim pollelolean tachi kudd ollkholi. Kornattokant segit tisrea vorsa dukoll ---------------------------------------- Drought in Karnataka-Andhra border areas Kornattok-Andhra ximevelea khubxea xetkamteamni xet-vosti korunk rinn kaddlolem, ponn hevui vorsa thoimsor dukoll ailolean tea xetkamteank apnnem kaddlolea rinnacho faido mellunk naslolean te niraxi zaun atmghat korunk lagleat. Disantlean donam poros odik zann apleach hatamni aploch jiv kaddttat. Hea vattarant fattlim tin vorsam osloch dukoll ailolean choddxea dadleamni rinn farik korunk ghoddchem na hem pollevn atmghat kelolo. Ponn hea vorsa dadleam xivai xetkamti somazantleo bailoi aplo jiv apleach hatamni sompoitana distat. Fattlea mhoineant Ut'tor Kornattokantlea Koppal jil'leant ravpi eka ghorabeantle 6 zann vangddeamni atmghat kela. Kerollacho Khasdar George somplo ---------------------------------- Kerala parliamentarian George dies Keroll rajeantlo adlo siminarist ani atancho khasdar George Eden All India Institute of Medical Science Hospital-ant Nove Dil'li somplo. Tachi pirai 50 vorsam asli. To boro katolk ani sogleank adhar divpi aslo. Sonsodechea chalu odhivexonnak hajir zatalo. Tachea ganv ghora Kochi hangasor taka Boro Samaritan mhonn ollkhotale. Tachem udarponn, sadheponn ani promannikponn porzolltalem ani sogleanchech nodrent bhortalem. Xri. Eden girest-astig naslo ani girest zavpachi taka axai nasli. Oslea khasdarachi aiz sonsodent goroz asli. Tacho rikamo zago tacheach oslea sobhavachea mon'xamni bhorun kaddunk bhouch kotthin oso lok uloita. Mulyam Singh UP-cho novo mukhel montri ---------------------------------------------------- Mulayam Singh is new chief minister of Uttar Pradesh Atth vorsanchea kalla uprant 63 vorsancho Mulyam Singh Yadav anik ek pavtt Ut'tor Prodexacho mukhel montri zaun unchlea panvddear pavla. Samajwadi Pokxacho fuddari Mulyam Singh Yadav haka mukhel montreache kodelir bosounk Kongres, RLD, RKP, CPI-M ani BSP vidrohi (rebels) hancho sohokar asa. Ut'tor Prodexacho mukhel montri mhunn soput ghetlea uprant rajki ragan sogleam add jeo POTA kesi asleo teo tannem fattim ghetleo. Mulyam Singh Yadav ho tisre favtt Ut'tor Prodexacho mukhel montri zala. Tea adim to 1989 vorsa mukhel montri aslo. Jammu ani Kaxmirant poili reilgaddi 2007 vorsa pavteli; Prodhan Montri ---------------------------------------------------------------------- Jammu & Kashmir to get first railway in 2007, says PM Jammu ani Kaxmir hache khatir 14,944 krutt rupia rakhun dovorleat te vapddunk suru keloleachi khuxalkai bhogit, Jammu ani Kaxmirant poili reilgaddi 2007 vorsa pavteli oxem Prodhan Montri Atal bihari Vajpayee hannem sanglem. Bekar asloleam khatir sumar ek lak nokreo toiar keleat oxem-i tannem sanglem. Hantuntleo 38,170 nokreo svotacho dhondo korunk sodhteleam khatir rakhun dovorleat, 45,180 nokreo komi pogar melltoleam khatir samballun dovorleat ani 16,650 nokreo protek mhoineak pogar melltoleam khatir rakhun dovorleat oxi tannim nokreanchi mahiti dili. (***) ########################################################################## # Send submissions for Goanet to [EMAIL PROTECTED] # # PLEASE remember to stay on-topic (related to Goa), and avoid top-posts # # More details on Goanet at http://joingoanet.shorturl.com/ # # Please keep your discussion/tone polite, to reflect respect to others # ##########################################################################