Hea cholchitrachi khobor kortannam maka ugddas eilo amchea somplelea J.P. Souzalin ankolacho. Oi, Souzalin zaitoch thokos ghetalo ani khorchoi bhi kortalo tiatr pollennarank dadoxi korunk. Dhor eka tiatran to apli ikmot uzar korun ani jinsanvar “scene” ghalun riti-dekiche tiatr machier haddtalo. Choddxe tache tiatr dhormik asson amche Cristaum porjek korezmanchea kallar dekivont ani dhormik tiatr pollounk melltalet. Fokot Souzalinache tiatr vogtar suru zatalet, justuch ratchim 9 tim 12 horam passun. Sumar cheallis vorsam adim tannem amkam machier haddleleam thoddeam tiatranchim nanvam boroun ditam:
SANT FRANCIS XAVIER: Hea tiatran tannem dakoilem jivit Sant Francis Xavierachem jeant Goemchea lokacho bhavart amchea patrona thaim anik vaddlo.
SANT ANTON: Hea tiatran Souzalin-an dakoileo St. Antonicheo tera milagri jeo polleunk tea kallar ek jivem vizmit koxem dislem.
HEM ASSAM TEM: Hea tiatran Souzalin mhunntta konnamchean kaddunk zainam Devan nirmilam tem, mojem ani tujem sogleank amkam Devan dilam tem; tukai Devan dilam ani makai dilam, tor kitem zait tem? Kalliz ugttem korun tannem dakoilem “Hem Assam Tem.”
SAT DUKI: Souzalinachea soglea tiatram poros hea tiatrachi dakounn nhoich chodd pauttim zali punn ho tiatr polletannam lok aplea boskancher dukancheo zori korun roddlo. Hea tiatrachea dhor eka porddean Souzalinan dakoll korun dilem jem ami amchea Povitr Pustokan vachlam. Zonn eklea partistan hea tiatran thokos gheun apleak dileli part vhodde zababdaren keli, zaum to Anthony De Sa (Jezu), vo Shalini (Ankvar Mori), vo khud Souzalin (Judas), adi. Ho tiatr lok itle barkaen polletalo ki tiatr choltannam konnuch ek zag kaddinaslo; zonn eklo aplea dollean tel ghalun apli dixtt machiecher laun dakoileli ghoddnim polletalo. Sogott lok ho tiatr polloun ghora voitannam Souzalinamchi ispa bhair voddvik kortalo ani tosle tiatr bogor bogor zaunk zai oxem mhunntalo. Souzalinachea oslo boroinnar ani director amkam mellonk bhou kottin. Tacho moladik vavr amchean kednanch visronk nozo ani khorench J.P. Souzalin mhuttlear tiatr pollennaram modem sodanch naum tachem gazo. Oi, tachech baxen Devan amkam anik eok dusro boroinnar ani director uprant favo kelo – Prem Kumar. Hovui director aple tiatr “scene” ghalun soboitalo ani tache tiatr polletannam amkam Souzalin-acho ugddas ietalo.
Tor mogall vachpeani, maka vhodd gorb bhogta amchea Goemkarank sangon diunk ki jem kitem amchea somplelea J.P. Souzalin-an sumar cheallis vorsam adim amche machier dakoilelem tench aiz Mel Gibson-an “The Passion of Christ” hea cholchitran dakoilam. Zoxe hem cholchitr polloun lok roddta ani zaitea zannanim aplem jivit boldilam toxench amchea Goeant sumar cheallis vorsam adim ghoddlelem!
Nimannem sangop mhuttlear nhoich Mel Gibson-ache osle ikmotiche Goemkar amche modem adim aslet punn azunui assat. Punn, zoxi mhunni assa “Moth aslear poth nam” tech porim amkam konnamchoch adhar nam. Amkam favo to adhar meulear mojean khatren mhunnonk zata ki Goemkarank lagtolo konnunch aschonam mhunnon.
Tor vachpeani, “Kristachem Paxaum” (Passion of the Christ) amchea Goeant ek novi ghoddni nhoi; ami ti polloun ani korun eilear xekdde bolanddlet. Sogott zannant Korezmancho kall amchea Goeant Devachea koxttank bhettoilolo assa mhunnon. Azun amcho Goemcho lok, dadle toxeoch bailo, Korezmant uphas kortat. Zaitech amche Goemkar dadle Korezmantle 40 dis soro pienant. Amchea igorzanim azun passun dhor eka Korezmanchea Aitara Pass (Passion Play) zatat. Hea Pass-ank azun passun adlech porim lok ajir zata. Adlea tempar dhor eka Pass-ak eok boro sermaum sangpi padri vo pregardor haddtalet. Sovo ani Satvo Pass nhoich bhou vhodd dukache punn vhodd dakounneche. Amche Anjunche igorjen ekdom boreo, sadea munxea poros vhoddleo, Devacheo imaji assat. Sangtat tea pormonnem, heo imaji khuim tea tempar Italiak than haddleleo. Anjuna Sovo Pass Munglaracho zata. Hea Passak Jezu khandar khuris gheun voita ti dakounn kortat.
Adim Sovea ani Satvea Pass-achem pursaum igorzechea adrar than bhair sortalem ani tem Lulu-chea ghoraxim davean portotalem; uprant tem Braganzachea ani Aurelianachea ghora fuddleantlean vochon xetan deumtalem (atam tea xetan ghoram bandleant); upant Sant Sebastiao vaddeache doddechean vochon, Dr. Afonsachea ghora khuxichean rostear bhair sortalem. Tea uprant ubea rostean vochon cimiteri pattlean than igorjechea adrar bhitor sortalem. Sovea Passak, Jezu khursar khandar gheun cimiteri laguim pautanch ami Saibinn Maink khandar gheun bhair sortalet ani justuch cimiterixim tikttear Saibinn Maimchi ani Jezuchi bhett kortalet ani uprant Jezuchea pattlean Saibinnink gheun choltalet. Aum Saibinimche ordicho “Irmaum” asson sodanch Jezuchea nam zalear Saibinimchea machilak khand martalom. Tea tempar, Sovea ani Satvea Pass-achea pursavant lok hathan kontam gheun ters rozar korit ani magnnim gunngunnait pursaumachi vatt choltalo.
Sovea ani Satvea Passak don sermaum astalet – bhailo ani bhitorlo sermaum. Satvea Passa dissui sovea Passak kaddlelea porinch pursaum igorjen than bhair sortalem ani adrar bhitor ietalem. Satvea Passacho dis eok kherit dis zaun astalo. Tea dissa soglo varo Devache kurpen and bollan bhorla distalo. Tossoch suria aplim kirnam zobordostin bhuimcher xeuttitalo ani tea kirnamchi khorai angan gustokuch amkam gomon ietalem ki tea dissa suria boroch taplolo assa mhunnon.
Nimannea Sukraradis sokallchi khursachi vatt somplea uprant ami sumar 25 zann pattim rautaleaum Devak khursar marpachi toeari korunk – fokot Saibinniche ordiche “Irmaum” aslelean hea kamant vantto gheunk zatalem. Devachi murti kallukantle kuddintli bhair kaddlea uprant ami tika dakunchea sorean dhutalet ani uprant kapsan pustalet. Tea uprant khuris dovorlelea zaguer than sokol kaddtalet ani to gheun modlea dharantlean igorjent bhitor sortalet. Ho khuris okondd asson boroch zodd assa; to sokol kaddpak ani vorpak 20 tori munis zai poddtat. Devak khursar marpachem soglem kam bhou mannsuguen ani uguichponnan korchem poddtalem - boball bilkul korunk zai naslo. He manddavollicho karbar tea tempar Dr. Olencio acho put kortalo. Devak khursar marun somplea uprant davea ani uzvea altara modem ek vhodd kallea rongacho porddo ubo kortalet. Hem soglem azuni amche igorjen ghoddta.
Tea tempar padri polputrar ubo ravon sermaum sangtalo. Nimannea Sukraradis, sermaum kabar zaumchea adim, padri aplea unch, khor tallean aroddon ani modlea altara vatten bott dakoun oxem mhunntalo: “HO POI ASSA TO JEZU KRIST ZO AMCHEA PATKAM PASSOT KHURSAR UMKOLLTA!” ani titlean to porddo ugtto zatalo ani lokachi nodor khursar umkolltea Jezucher ani khursa mullant ubi aslele tache avoicher poddtali. Tea vellar, unch aslelea donui bazunchea zonelanchea rongit arxeantlean (tinted glass) suriachim kirnam passar zaun Jezuchea mukamollar poddtannam Tachem rogtan buddlelem mukamoll pollounk anik bhou dukest distalem, ani igorjen bhorlelea lokacher ek zodd dukachem kup deumtalem. Hea vellar nodor marlear zaitea zannamchea dolleantlean dukam goll’lelim distalint. Titlench nhoi, barik kan dilear vhodd suskar soddun zaitea zannanim oxem mhuttlelem aikonk ietalem: “BOGOS SAIBA, KAKUT AMCHI KOR, CHUKLEAUM AMI!” Him utram aikotannam soglench ang xirxirtalem ani ek kherit bhirant kallzan utpon zatali. Dakttulim burguim tor sarkinch bietalint ani zonn eklo/eklem aple avoik ghott veng marun, avoi roddleli polloun chintunk poddtalint. Oi, tea thoddeach vellak soglich igroz Devachea koxttanchea paxaum-an budddtali. Bhailo sermaum kabar zalea uprant, Jezuchi kudd bhitor voron altarak aslelea kaxaum-an dovortalet ani tache voir ek molmolacho, golaum-an vindlolo kuddko ghaltalet. Uprant, sogott bhair aslolo lok bhitor vochon Jezuche kuddicho umaum ghetalet. Atam Anjunchi porza vaddlea. Tea passot porumchea vorsa Nimannea Sukrachi sogli manddavoll bhair adrar keleli. Toxench pursaum atam adra bhitoruch kaddtat.
Nimannea Sukraradis soglem devosponn kabar zata mhuttlear borich ratr zatali - sumar att, sadde-att voram vaztalint. Hea dissa poixilo lok, zoxe porim Kaisuacho, Danddeavoilo, Praievoilo, adi, sokallim igorjek ietalo ani ratrik ghora portotalo. Zorui tea tempar amchea ganvant bizli nasli torui punn ami igorje than ghora portotannam chondrim aplo rosroxit uzvadd rostear xiumraitalo jeant rostear aslele barik fator passun nodrek disti poddtalet ani augoddae vinnem rostean cholonk zatalem. Oi, tea dissa ani ratri soglem soimbuch vegllem zatalem, karann tea tempar lokacho bhavart ekdom thir also. Atam amcho bhavart dhil poddla, punn amkam zai zalear amchean to mozbut korunk zata. Americachea lokachoi bhavart dhil poddlolo punn to novean jivo zalo Setembrache 11ver, 2001 vorsa, jednam tancheo bhou famad don New York xaracheo zoumddeo torri bomb ghalun bhosm korun uddoileot!
Korezmanchea survatak avem soglea Goenkarank bhagivont Korezmancho kall aumdelelo ani atam portun tech baptin magon ho mozo nog kabar kortam. Hea boroupan kitench voir sokol zalam zalear aum vachpeam laguim adim fuddench bogsonnem magtam. Deu borem korum ani Devacho axirvad sodankal amcher sogleancher assom.
Moi-mogan, Domnic Fernandes Anjuna/Dhahran, KSA
_________________________________________________________________
Protect your PC - get McAfee.com VirusScan Online http://clinic.mcafee.com/clinic/ibuy/campaign.asp?cid=3963
##########################################################################
# Send submissions for Goanet to [EMAIL PROTECTED] # # PLEASE remember to stay on-topic (related to Goa), and avoid top-posts #
# More details on Goanet at http://joingoanet.shorturl.com/ # # Please keep your discussion/tone polite, to reflect respect to others #
##########################################################################
