All the way from Kuwait Hea disanim oHeraldo potracher, jahariti panar nodor marlear all the way…nove tiatramche anus (add) vachunk melltat. Ani chalu mhoineant, Kuwait-che bhouch famad tiatrist Marcus Vaz ani Comedian Philip, A. M. Pacheco-n boroun digdorsxil’lo "Tukach Rautali" tiatrant nhestele zalear 'Hitman of Konkani Stage' Sylvester Vaz, Tony Dias-an boroun digdorxil’lea "Argam Tuka Dhonia" tiatran nhespache asat. Mhaka poilim distalem fokot Kuwait-antuch aslelea tiatristank 'demand' asta kai mhonn. Ponn mhojem gonit matxe chuklam. "Mogachi Maim" Joaquim Jack hannem boroun digdorxil’lea tiatran all the way from U.K., kitlinch podam (titles) gheun aslolo Peter Bernett (Pedro Gorro Foreigner) British T.V. & Stage Star, Singer mhonn, poilech khepek ek vidhexi kollakar Konknni machier Konknnileant don gitam gaita ani gitachim nanvam asat "Sobit Goa" ani "Ieo Moga Ieo". Tiatr mollar ani ek birlo.
Hanvuim-i bhi tiartristam bhaxen unno na. Mhaka-i demand asa. Kuwait sakun sutten ghora pavttam thoinch astam. Amchea, toxench xezarchea vaddeantlo lok mhojea ghoradodde ievn upotti ghaltat, ponn prosidh’dh tiatristam bhaxen all the way…. mhonn paperancher anus mat ienant. Adle bhaxen, ganvant Saibinnichi ladain mhonnpak vo gavpak atamchea kallar monis nant vo asat te-i bhi ladainenk vochonant. Xezarchea ghorant ladain aslear, thodde pavtti baddeache vo duddu farik khorun mon’xank haddun ladain korchi poddta khoim ani hanv all the way from Kuwait funkott ladain gazoitam. Voileo jahariti vachtokoch mhaka ek iad zali. Fattlea Dezembrant, Gomant Vidya Niketan vosrean Comedian Domnic-achea ‘Uzvaddant Kallok’ tiatran, all the way…… Konknni machievelo 'super star' don hit kantaram gaitolo mhonn, tea disachea –oHeraldo- potracher anus vachlo. To 'super star' mhoje-i avddicho axil’lean mhoje sundorek ghevn tea tiatrak hajir zaunchem dislem. Ponn tiketteo, amchea sodhamchea bosker mellcheo nant mhonn mhoje sundorek husko zalolo. Tika husko zaunchem karan mhonnttlear, konnamchoi tiatr to zaum, hanv adim-fuddench (in advance) GVN hollantlea 'row' N boska 12 ani 13 sugur korun dovortam. Nim’nnem vellar sodhanchea bosker tiketteo mellcheo nant, hem tor zalench, ponn Moddganv hollaxim vochun funkottchi pavtt poddot mhonn, hanvem Comedian Domnica-k fon ghatlo. Sangpachem mhollear, Domnic bab, mhoje sundorechea bhavache bailecho bhav. Mhonnchem, mhojea mevnneacho mevnno. GVN hollamxim pavttokoch tachea mobilar fon khorpak, tannem mhaka chuchoilem. Hollaxim, lokachi gordi. Proves daracher ‘house-full’ mhonn toktto distalo. Tiketteo nasun lok niraxi. Mhojer akhant. Domnic babak fon ghatlo. "Hello, ami pavleant...." amchich vatt polloun aslelea bhaxen mhojea tonddantlim utram sompchea adinch to amchea fuddeant ubho zalo. Don tiketteo hatant ghatleo. Tukach mhonn sangtam, tannem tikettinche poixem mat ghevnk nant. Hollant bhitor sorlim. Row F, 7 ani 8 boskancher vhochun amchem kule chitkaitanam hollantli bizli palovli ani tiatr suru zalo Tiatracho dusro dekhavo somptokoch fuddlem git gavpeak, muzgannim sur dilolo titloch. Gavpi machier dixtti poddchea adinch, songit surachearuch vosreantlea prekxokanim talliancho ani fevnnechea avazan GVN vosro ghonghonlailo. (Oslem keddnai TV-ir polletam, ponn tea disa Konknni machier LIVE polletalom) Hodd’ddear, donui hat ekttaim zhoddun apli man bhagoun, prekxokank nomoskar korit machier proves vo entry marleli titlich, porthean talliancho pavs ani fevnneo. Lok, dhean divn Super star-achem orthaborit kantar ogeaponnan aikotalo. Vosro xant aslolo. Ponn okosmat amchea pattlean dogam bailancheo luhan ghozali challu zaleleo teo mhojea kanar sadhoupak lagleo. "Tum tak ollkota?" Saxttichea ucharant (accent) poili bail uloili. "Vollko nastana konn asa? Super star mhonnttat taka." Dusri bail vo poile bailechea ixttinnin sanglem. "Haem (vach:hanvem) tegelo choila," borech umedin poile bailen mhonnlem "Kitem uloita gho? Tum zanaim, to konn to?" "Zann gho hanv. To Kuwait asta. Thoimsor tegelo chovpak Kuwaitche panch dinar gheta. Sumar Indieche 780 rupia zatat. Na tor, muj barbor intervalak bhitor green room-an ieo ani tum teko ichar" "Mhaka tujem sotmadunk bhouch moskil lagta," avaz ambot korit ixttin uloili "Kitem choilam, tem choilam mhonn sangpachem. Mak’ kiteak fott sangonk zai?" Ixttinn soglich bejear zaun vicharta. “Ponn keddna?” "Ghelea vorsak" "Khoimsor" "Kuwaitchea tiatra mattvant" "Loka samkara?" "Oi" "Koso" "Tacho bhair sorlo tedna" “Kitem" "Tegelo tiatr!! Devan Dilem Devcharan Vhelem" "Tiatr choila gho!" Ixttinnicho jiv susegad zalo ani tinnem fuddem mhonnlem “Hanv sarkinch akhantlim, Mhaka dislem……….” "Ago, tumchim tonddam bond zatlim vo na?" Konnem eklean tanchea pattlean thavn mottean avaz kelo. Lino B. Dourado http://www.goa-world.com/goa/poems http://www.mail-archive.com/cgi-bin/htsearch?config=gulf-goans_yahoogroups_com&restrict=&exclude=&words=Lino+B.+Dourado __________________________________________________ Do You Yahoo!? Tired of spam? Yahoo! Mail has the best spam protection around http://mail.yahoo.com