Follam-Torkari Zhadd Piki Khavnchi Bhurgeaponnanile dis te. Keddna kai porikxa sopun Durbhat (Ponda) mamagher vochun distalem. April-Maiachea mhoineant ambe, pon’nos, kaju, chun’na, zamblam, ani ier jinsavar follam pikavoll mamachea ghora pattlean aslelea dongrar fulltali.
Suttea disanim mamachea ghora xivai dusrea soireamgher hanv vochom naslom. Xamaim, mhoji khub apurbai kori ani toxem korunk karan aslem. Ratchem jevonn jevlea uprant tika dumttechi vidi zai asli ani ti, nitoll pon’nosachea panacher mast korun hanv, tika ditalom. Xamaim amchi zanntti kori ponn kuddin ghottmutt asleli. Sokallchi utthun aplea natrank kailolleo, tandllanchi bhakri rogddear vhattun chae sangata kaunk ditali. Utodd’ddechea, Fondemchea toxench Mumbaichea mavxeghelim bhurghim Abril-Mai mhoineant mamaghelea ghorant zoma zatalim. Mamaghelem ghor mhonnchem mavche-bhav-bhoinnancho mhellavo koxo aslo Malcurado, Fernandino, bharik motte jinsavar ambea zhaddam mamaghelea ghora bhatant vo dongorar aslelim. Soglle ambea zhaddam giraikak laitalo ani fokot Malcurado ambea zhadd giraikak dinastana amcho Lawry mama aplea bhoinichea bhurgeank samballun dovortalo. Mhaka tor ambe khub ruchtale ani kednai xamaink nidhecho dollo laglolo astana tichea hunxea ponddak dovorleli chavi kaddun luhu ambe pikunk ghalele kuddint gusun pott funtosor ambe khatalom. Mhaka ambe kavpachem pixem asa mhonn, mamachea xezareak ravtelem sumar tis vorsachem kazar zavnk naslelem biatulak khobor asli. Tem kuddint khub mottem ani tachem hodd’ddem fugrem koxem aslem. Tangerui ambea zhaddam aslim. Tem mhoji khub apurbai kori. Tedna hanv ikra vorsamcho lhan por aslom. Tannem, apleachea ghora mhaka vhorun ambe kavnk divnche asle. Keddnai-keddnai mhaka ghott vegent vornun apurbaien mhoje kens poxeun mhonnttalem, “baba Lino, tuka zai title ambe kha ham?” Iskolachi sutti khobar zaunk atth dis asa mhollear mhoji avoi mamagher ietali. Tedna hanvem somzunk zai aslem Junacho mhoinno tenklo ani pattir pustokachem bag marun porot iskolache bank tapoicho vell pavlo mhonn. Sanjechea 3.30 vaztam busik vochunk avoichea sangata bhair sortalom. Teach vellar mamagelea xezarchem avnkar mana, ‘musurad’ ambeanchi teli ghevn ailem. Teli mhojea hatant dili. Adeus korpak apurbaen mhaka vegent ghetlo ani tichea xatier mhoji tokli chittkovleli astana, telient aslele ‘musurad’ ambeanchi iad aili ani hanvem tika mhonnlem, “tuje ambe ekdom motte ani mov asat.” Tea vellar mhoje avoik, kitem vaitt dislem tem mhaka khobor nam, "malsuad cheddo" oxem tinnem mhonnlem ani mhojea kannank chimto vo vou ghalun mamaghelea ghorache sopann (stairs) dhenvoun bosi meren vodit vhelo. Eka vorsak mhoje avoin mhaka mamagher dadhunk na. Tea vorsak hanvem Metrik (tednachi XI-vi) vorgant proves kelolo. Hanvem ghorach ravchem ani obhexeacher odik bhor ghalcho oxem mhoje avoik dislem. Amchea xezareak ravpi Aida, tanchea ghorchea xetan Abril-Mai mhoinean khub jinsa torecho bhaji-palo, torkari, nirvoleo-mirsango rompe, piava-pat, konngam, ollsande, chinrge, uddid, kallngam, vaingim adi..adi roitalem. Ekdom khoxti cheddum (hard working girl) mhonn mhoji avoi tachi khup maea khori. Ani tenvum-i mhoje avoik ekdom borem kortalem. Aida-chi avoi, tem nnov vorsamchem astanam sompleli ani hench karan mhoje avoi ani Aida-chem natem (relation) avoi-dhuve xarkelem asunk. Xetan rompleli tazi (fresh) torkari mhojea avoik dilea bhogor tem ravo naslem. Aida, Nuvem-eantle Carmel College-int dusrem voros science vorgant xiktalem. Vaddeant dusrim cheddvam aslim ponn Aida-k sor korpa xarkelem ekui naslem ani hakach lagon hanvem Aida-cheo moskoreo kelear mhoje avoik rag ietalo. Ek dis sanjechea so vaztam bolkamvant bosun mhoje obeas kortalom. Mhoji avoi mhoje khuxikuch supan aslele tandun asulltali. Sodam porim Aida xetantlem voir sorlem ani tachea hatant don vaingim asun amchea ghora samkara tamblem. “Timai koxi asa ghe,” tannem mhoje avoichi khobor gheli ani mhojea fuddean ievn tonddak pollet vicharlem, “Lino, him poi don pullpullit vaingim asat. Tuka zai kavpak?” Ani hanvem tika soroll sanglem. "Hanv kaddlelim kainam, laglelim khatam" Tea vellar mhoje avoik, kitem vaitt dislem tem mhaka khobor nam. Tinnem ragan "malsuad cheddo" mhonnlem ani asulltele tandvamchem sup mhoje tokler tho..oo khorun marlem. Lino B. Dourado http://www.goa-world.com/goa/poems http://www.mail-archive.com/cgi-bin/htsearch?config=gulf-goans_yahoogroups_com&restrict=&exclude=&words=Lino+B.+Dourado __________________________________________________ Do You Yahoo!? Tired of spam? Yahoo! Mail has the best spam protection around http://mail.yahoo.com