Favo Tea Vellar Favo Teo Vostu Oh timai, Lino na ghe ghorant?
Xezarchem Perpet, mhojea itlench nnov vorsam piraechem aslem. Mhoje avoik ulo marit-marit ghorant bhitor sorlem. Tacho avaz aikun hanv fattlea dharantlean dhaum marunk khori tedna, mhojea hatantlo boll kala poddlo ani tap-tap korun tachea morean pavlo. Mhojea ixttam vangdda khellpa vellaruch Perpet mhaka soddunk ietalem. Khorem mhollear tachea bharim khellunk mhaka bilkull avodd naslem. Tem fokot bavlim, teddy bears, ani ier dusri khellnni (toys) ghenv khelltalem. Mhojo khell nokoreanim, gonz-barannim, godddde-milanim, chor-pulis, fottboll, saikoll ani ier sabar khell asle . (Punn atam hanv, fokot 'bed'-minton khelltam. Hea khellant fokot don khellkoddi kit-kit karandai nastana khelltat dekhun.) Perpetacho bapui ek tarvotti aslo. To aple ektech apurbaeche dhuvek khellnni haddtalo. Mhojea xivai dusrea bhurgeam sangata Perpetak khellunk daddi naslo. Tem amchea ghora khellunk ieta tedna foren (foreign) chokleti, undean ghalun kraft cheese, ani dureo kavpacheo vostu mhaka ghevn ailea xivai ravo naslem. Ani tea disa khubuch ruchichem biskutichem pakit mhojea hantant ditanam mhonnlem. "Lino, hem poi 'new dolly' haddlam. Ami dogaim Maim-Pai khell khellum-ia mhu re?" "Maim," tea vellar Perpeta vangdda khellunk naka aslelean hanvem bextench mhoje avoin mhaka ulo marlelea porim zap dili. Ghoddie chukun kitem tori posrear vochunk ieo mhunn sangteli hi opexa dhorun hanv kuznant ghelom. Rogddear bosun masalo vanttele avoik hanvem vicharlem. "Tumvem, mhaka ulo marlolo ghe?" "Na re baba," ani mhoje fatta-fatt ailelea Perpetachea hatant novi bavli pollevn vicharlem, "daddy-n novem 'dolly' haddlam bae? Mukhlean bosun khellat." "Choll re. Vell kiteak piddear korta? Maim-Pai khellum-ia," bolkavant pavttokoch Perpetan mhonnlem. Tiddken bhitor thavn xendri ani don uxhim (pillows) haddun zomnir pavtolim ani eka uxhear mhoji tokli dovorun mhonnlem, tujea baby-k moddem dor ani tuvuim-i nhide. "Sarkoch lolo Pai mure tum? Baby-k udok nhannoi nastana nhidunk ghaltat?" Lolo mhonnttlelean mhaka tachi tidok marleli kori ponn mhojo rag tea vellar dhakoupa sarkelo naslo. Kiteak tannem dilelem biskutichem pakit mhojea hatantuch aslem. Tacher taplo zalear diloleo vostu portean magpi cheddum tem. Xendrevelo utthlom. Biskitechem pakit ugttem kelem. Don chear tonddan lotlea uprant vicharlem "Hanvem korchem kitem?" Mhojea vicharak zap di nastana box-antlem dolly-k bhair kaddlem. Tache moche-mei, kopdde asle te kaddun nagddem kelem.. Dolly-k ubem dovorlear dolle ugtte kortalem. Addvem ghalit dolle damptalem. Moddem chiddddulear mummy mhonnttalem. Tonddanli bocal vo chium kaddlear dolly roddtalem. Dusrea box-antlean dhaktuli bucket, tambio, tuvallo, caixa do sabão (soap case) frasco de alimentação (feeding bottle) dantoni, arso ani ier dusreo vostu bhair kaddleo. Dolly-k aplea paimear ghalun mhojea toddak pollet uloilem "Are lolea kitem choitta? Tambio ghevn baldentlem udok nhannoi mure? Chodd vell ang ugttem urlear baby-k thonddi zatli." "Kortam-kortam tum vhoddli Maim zalelea porim uloitai," thambeanim udok rokoilea porim kortana hanvem mhonnlem "Ekttench apurbaechem cheddum. Tuvallo di. Cheddvak thonndi lagteli." Tannem tuvalo ghevn dolly-k guttlailem. Portean soglleo vostu choddoileo . Dolly-k kakeant ghetlem ani feeding bottle ghenv dhud dilele baxen kelem. "Alumin, tambem porni aidonn-n-n... Alumin, tambem porni aidonn-n-n," oxo ekuch suracho sad ghalit ek on-Goenkar (ghatin) bail, rund pantuleant jinsavar aluminum-chim aidona mhatear asun chollot amchea ghorachea dixen ievnk lagli. Tichea kakeant aslelea lugtachea pisvent ek bhurghem aslem tem thambun-thambun roddtalem. Ti ghantin bail, amchea ghora samkara aslealea ambea zhadda khuxik bosli. Tichem por odik roddunk laglem. Aidonacho pantlo soklla dovorlo. Tinnem aplo polko ubarlo ani uzvo thana (breast) bhurgeachea tonddan ditana gagro sarkelo saddicheo palov bhurgeachea tokler udoilo. Roddtelem bhalok ogem zalem. Perpet tikach polleunk ullem. Tachem mon khoim tori xennlelem. Taka bhannar haddunk havem tachea hatak zhottko dilo. Tem nhidentlem zagem zalelea porim utthlem ani dolly-chea tonddan asleli chium kaddli. Dolly-chea roddnem suru zalem. Sogleo toys bolkavantuch soddun Perpet-an aplea ghora vochunk humbrea bhair paim ghatlo tedna hanvem vicharlem. "Tum khoim vetai? Tujem 'baby' roddtta. Kosli dharun avoi tum?" "Mummy thaim vicharunk vetam" "Kitem vicharunk?" "Mhojeo dudhdacheo pottio keddna ietlo kai mhonn." Lino B. Dourado http://www.goa-world.com/goa/poems http://www.mail-archive.com/cgi-bin/htsearch?config=gulf-goans_yahoogroups_com&restrict=&exclude=&words=Lino+B.+Dourado __________________________________________________ Do You Yahoo!? Tired of spam? Yahoo! Mail has the best spam protection around http://mail.yahoo.com