Please abide by 'dress code' Kuddichem prodorxonn (exhibition) korpi sarkelea angvostrancher bondi poddlelean aijkal Aitarachea Misant choddxim tornattim igorjent disonant.
Cheddvamchim mottvim kolsanvam, dimbie voir itlem mottvim skirt-am, ugtte goleache polke (blouses) ani ttight fitt T-shirts nhesnnank lagun, igorjek vochpi zannttea bhavartanchim ani kherit bhaxen tornattea cheddeachim monam, Misachea magnneacher thironant. Mumbaiche Arkidiocezichea Kardinal Ivan Dias-an povitr zagear kuddichem prodoxonn kortelea zagor (vulgar) angvostracher koddok avazan suchnapotr (circular) uzvaddak haddlelean nhoi Mumbaimnt, punn akhkhea Goeant Igorjechea vhoddilanim mottea proman mannsugechea nhesnnacho dress code aplea firgozkaramchea (parishioners) nodrek haddla ani amche ixtt Lapit; hanchea ganvchea Padre Vigaran to poilo chalik laila. Lapita-chea ganvchea igorjent dor Aitarak don Misam astat. Poilem Mis sokallchea so vaztam. Hea Misak, vauraddi lok subeij dista ani jea loka thaim borim kimtichim angvostram nant tovui lok poilea Misant vantto gheta. Dusrem Mis atth vaztam. Adim hea Misant tornatteancho aspav subeij astalo. Novi-novi modi nhessun chedde-cheddvam igorjek distalim, punn halichea disanim igorjent ievnchim, gaiob zaleant. Are khoim gelo? Na re thoim? Lapit-ache bail nhannient thavn boballtali, punn Lapit, bolkamvant bosun xezarchea Cazmiracheo gozaleo aikotalo. Ietam, ietam, bailek zap dili ani Casmirok bori rat magun, mukhlem dar bondd korun bailexim ghelo. Kiteak ulo kori? Tannem bailek vicharlem. Kitlo vell re tuka? Thondd laglem mhaka. Nhannient ietanam tuvalo haddcheak visorlim. Choll vegim, tuvalo matxe haddun di. Lapit nidhche khuddant gelo. Kativelo tuvalo hatant kaddtana, tannem bailechi nightie polleli. Lagim aslea mezar kator disli. Mhaka hangasoruch sukoitolo? Kitem korta re bhitor? Tuvalo haddunk gellea monxacho potttoch na tem pollevn, Lapitachi bail porot ekdam boballli. Ailom, ailom. Kativelo tuvalo vhorun baile koden divn to vochunk kori, titlean tinnem vicharlem Keddov konna thaim uloitalo?. Socorin timaimlo natu, Cazmir ailolo. Don Aitar zale, igorjichea gaion mondollant (choirs group) disona to. Toch nhoi, ganvantle dusrim tornattim chedde-cheddvam, Aitarachea Misan bhag ghetlolim disonant ani tachem kharan mhollear igorjek ietana mannsugen nhesun iepacher, amchea Padri Vigaran avaz uthailelean Aitarachea misak vochonaslelea patkeak hem sogllem koxem kollta? Amchem ghor igorjek tekhun asa. Vigaracho sermanv mika velean niddlea kodden kanar bosta. Bolkavantuch bosun fashion show-ak ailelim models dolle bhor pollevnk melltalim. Tannim Aitarachea Misak ievnchem bond kelelean, hanvem sokallchea dha horam uprant utthpachem dorlam. Him tornattim kitem somzotat? Aitarachem Mis ek fashion parade mhonn? Fatt ugtti aslelim angvostram ghalun igorjent ietat ani tanchea fattlean ubhe aslelea dadleamchea monant lingi chintnam gusmolun tanchem Mis piddear kortat. Dekhunuch ho tugelo ghov Aitatachea Misak vochona. Puro, puro. Chodd uloilo. Sonvara ratim, borench xekoilear dusrea sokallim koxo utthunk zatlem? Ostoreanim hat kapim T-shirts ani bhitorlea cheddechi dheg diso pasun ttight kolsanvam nheslelim pollevn, mhojea oslea bhavarteamchem monant vaitt chintnam ietatuch. Chintnachea patkak boli zavncho nhoi mhunn, hanv sumanantle heram disanim igorjek vetam. Mhojem Mis, Jezu Kristachea povitr ieneamcho dobajo mhonn somzotam. "Vegllea-vegllea dobajeam khatir vegllim vegllim angvostram astat. Parttiek ghalelim hodddim ugttim angvostram igorjen sobhonant. Piknikek nhestele kopdde dukhest zagear upkaronant. Khellachim angvostram offisant nhesso nant. Ghorant nheslelim ratchim angvostram bhair sokallchea passoiek chollonant, Lapitachi bail aple lamb kens pustanam ghombirponnin ghorkara thaim uloitali Ordem hor odik zalem kens pusunk laglear. Kitle pavtti tuka suchoilem te mottve korunk. Tras zatat. Kens mhoje tokler asat. Tuka tras kosle? Hanv zanam tuka koslo vell zata to. Konnem sanglam mhojea morean ubo ravunk? Choll, tuje peg kor. Tea mhonnosor mhoje angar kopdde choddoun jevnachi toeari kortam Lapit kuznant gusun freezinli thond Bislery soda mezar dovorta. Glassant double peg Royal Stag whiskey vottoita. Opener ghevn soda ugoddchea vellaruch, L-A-P-I-T, nidhchea khuddintlean ek zobordosten marleli killoch tachea kanar sadovtta. Tanchea kazari jivitant Lapitachea bailen keddnach apurbaechea nanv-an (pet name) taka ulo marunk naslo. Punn aiz poilech khepek tichea mostokantlo bhezo konnem tori kenchchun kaddlelea porim dislem. Lapitache bailen ghoddghoddea avaza sarkeli killoch marleli tedna, ghorantleo vostu bhuimkamp zalle vorim hallleo. Hi zobordost killoch khitea khatir ti, Lapit bhes bori zanam aslo. Tannem fuddlea tuvanank fuddo korcho aslo, tea mhonnosor glassan votoilole double peg ghott-ghott korun tallea sokoll denvoile. Nhannientli bhair sortana ghuttlailo tuvalo toxoch angar asun ti kuddantli bhair aili ani tachea morean ievn aplea hatant asleleo nightie-o dakhoun, korkoch tallean vicharlem. Hem tuvem kitem kelam? Tuka hea nigtichim kosli addkoll zali? Are mhojea ghorkara, ek tori katorchi asli, punn tuvem mhojeo panchui lamb aslelo nightie-o katrun mottveo keleat. Kiteak??? Thoddea vella adhim tuvem sanglam. Vegllea-vegllea dobajean khatir vegllim vegllim angvostram astat mhonn. Hanvem chintlem bed-ir hea lamb nightimche tras nakat mhonn tea khatir dimbie itlea voir katrun mottveo keleat. Kopalak hat marit tinnem mhonnlem Tujim lapitponnam keddnam meren somptelim? Lino B. Dourado http://www.goa-world.com/goa/poems http://www.mail-archive.com/cgi-bin/htsearch?config=gulf-goans_yahoogroups_com&restrict=&exclude=&words=Lino+B.+Dourado __________________________________________________ Do You Yahoo!? Tired of spam? Yahoo! Mail has the best spam protection around http://mail.yahoo.com