Povitr Zageachi Povitrtai sambhallat
Borovpi: Daniel F. de Souza.
Mon’xak hea sonvsarant jieunk tin vostunchi
chodd goroz: Jevonn, ravonk ghor ani aple kuddichi moriad dhamp’pak
kopdde. Heo tinui vostu ek sarkeo gorjecheo. Hanche modhem kopddeam udexim
tor nhoich ami amchi vinglli kudd dhamptanv ani ti nettoitanv punn amchi
moriad sambhallttanv. Mhunnttoch he kopdde je ami vapurtanv te magir
somazache nodrent moriadiche rit-mannsugeche asunk chodd goroz.
Be-moriadit nhesop kelear ani somazant dha zannam modhem befikirin
bhonvlear tuka respet-man mellona, punn portench zalear tuzo abru varear
ubhta.
Halinch jedna Mumboicho Arsebisp Kardial Ivan Dias
hannem Mumboint aitarachea misak ieteleank tanchea nhespa vhoir kaim nem’
kaide ghale tedna hacho dogd amchea Goeantui posorlo ani soglleanche
kan-dolle chotur zale; hatunt mat dubhav nam. Oxem panvl marun Arsebisp
Kardial Saib oxem sangunk sodhina ki lokan igorjent ietana adle bhoxen
kant (veil) ghalun ani mathem-kan dhampun igorjent ieunchem mhunn. Punn
igorjent misak ietana moriadichi nhesonn angak ghalun Dev mondirant proves
korcho mhunn. Karonn Dev mondir, zaum magir tem igorz vo kopel, ek
kheritponnim povitr oso zago ani tea zageachi povitrtai nhoich kornneamni
bogor nhesnna vorvim legun sambhallunk chodd mhotvachem ani gorjechem.
Mhaka zalear mhoje nodrent oxem dista ki jem panvl
aiz Mumboiche diosezichea vhoddilamni ubharlam toslench panvl amche
Goenche diosezichea vhoddilamni-i marchi chodd goroz mhunn. Karonn aiz,
barik polleunk gelear, amchea Goeantui igorjent misak nhespacher disan-dis
ostomtechem varem marun amchi nhesonn komi ani komi zait gelea. Aicheo
modi aileat teo ‘bhov thoddem lipoitat, punn chodd dakhoitat’ ani zaitea
amchea tornatteam cheddvank, toxench kazari bailank legun, ghodie oxem
dista ki jitlim tim aplea nhespantlean ogllem dakhoitat titlim tim odhik
fashionable zatat mhunn! Ho tancho chukicho somoz. Ani chodd lojechi gozal
mhollear amchim kaim cheddvam bailo heo modi korun Dev mondir ek dansacho
vosro zal’lea porim loz-pez soddun apleak zai toxim nheson hanga proves
kortat ani dusreanchem-i mis pidd’ddear kortat mhonnnlear hanv otitai
korcho nam.
Aiz TV, Internett ani her sompork sadhonam ani
madheomam udexim sorv sadharonn mon’xachi modi korpachi laiki ani humed
khub zagrut zalea ani hache udexim heo noveo modi soglleam vattharamni
posorleat mhonnlear chuk zanvchi nam. Aiz amche ganv odik korun je doria
deger asat te (coastal areas) adlea porim udorgot naslole ganv urunk nant,
punn te soglle semi-urban vatthar zaleat ani lhan-xarancho akar (small
towns) ghetla. Mhunnttoch ostomtek zolmon ietat teo modi amchea ganvantlea
paiam vattamni pavunk chodd vell lagona. Ani ganvamni pavleo
mhunnttoch teo modi rokhddeoch amchea Dev mondiramni aitarachea misak
proves korinastana-i bi ravonant!.
Mon’xa lagim unch molache ani nove modinche
kopdde aslech mhunn zaina. He kopdde khoim, koslea okajavank nhesche,
kosle modichem nhesun apli rit-mannsug ani moriad somazache nodre mhukar
koxe toren rakhunk zai ti zannvai ani chintop te kopdde vapurtoleank asunk
chodd goroz. Hi zannvai zor nam zalear gaddva ani mon’xa modhim koslich
ontor aschi nam. Sangunk vaittt dista, punn sangchench poddtta; karonn aiz
amche chedde cheddvam casual wear zoxe porim Dennim Jeans ani T-Shirts ani
Sleeveless Tops ghalun aitarachea misak Dev mondirant ietat. Itlench nhoi
zaitim cheddvam bailo, off-shoulder nhespam nhesun ani noodles-am itlo
barik potto (strap) aslolo vistid ghalun Dev mondirant ieun zaiteanchem
mis legun pidd’ddear kortat. Tor hem sogllem polleun ogich bospachem?
Dubhava viret zaitea igorzamni, altarar ravun amchea padrimni hea modim
vhoir xittkavnni dil’li zaite fautt kannancher poddlea. Punn durdoivan,
hacher durlokx gelam ani soglleamni kan bhere keleat. Karonn sorv
sadharonn mon’xak, selective hearing (apnnak zai tench vinchun kaddun
aikop) ho ek gunn asta, ani hea selective hearing-acho gunn ami zaite
fautt goirfaideak vaporla. Dekun hacher unchlea zagear savn chabuk marunk
zai.
Aiz amchea Goeant kaim corporate ofisamni legun
tharavik Dress Code (nhespache nem’) asat. Ani kamdaramni kaichekai nhesun
ani Jeans ghalun dor disa kamank ieunk zaina. Jeans ani Casuals fokot
son’varachim nhesunk maneotai asa. Tor oslo Dress Code amchea diosezichea
vhoddilamni amchea Dev mondiramni kiteak lagu korunk zaina? Zata ani to
korcho. ‘A stitch in time saves nine’ he Inglez mhonn’nnechi hea vellar
mhaka iad zata. Uprant xinnon faido nam.
Zaite kodden amchea igorzamni resperak amcheo hoklo
ani hoklecheo dheddio modi kortat tem polloilear tim resperak nhoi punn
Fashion Parade-ik’ aileant kai dista. Konnem tori mhaka fattim ek dam
sanglolem (khoincho ganv to hea vellar boro ugddas zaina, punn Goeantuch
ghoddleli khobor): Eke hoklen khoim resperak ghatil’lo vistid (gown) voir
itlo ugto aslo (revealing) ki resper kortelea padrin misar ani koblat
uchchartana, anik kosloch upai nasun, nhovreacho coat kaddun tichea angar
ghalo. Osli vagnnuk Dev mondirant kortoch soglleank ti ek vhodd sotavnni
zaunk pavta. Dekun oslea vagnnukancher bondi haddunk goroz. Jedna
kazarache toearek hokle-novreak igorjent apoitat tedna, her xikovnnea
sangata, resperachea misak nhespacher kaim nem’-kaide ani rit-rovisechi
xikounn hea zoddpeank diunchi goroz asa. Nam zalear ho sogllo ‘Fashion
Show’ chaluch urtolo ani ek dis amcho Kristi somaz hatabhair pavtolo.
Amchea tornatteank Dev mondirant misak ietana modi
ani nhespa vhoir kosle nem’-kaide rakhche hacher nhoich amchea dhormik
fuddeareamni igorzamni favo ti xikounn diunk goroz punn amchea Goeant
Diosezichim iskolam ani Unch-madheomik iskolam asat tatunt ‘Value
Education’ ditana, hi xittkavnni dilear vaittak poddchi nam. Punn khoim
tori he dixentlean survat zavpak zai.
Zaiteo amcheo xarantleo ani her vattharantleo igorzo
asat zoim aitarche kaim bhonvddekar legun misak ietat; tankam igorjent
nhespache moriadi voir ek kollovnni korun ani ticho Inglez ani Hindi
bhaxen onnkar korun bhair vonttir toktto marcho.
Kall bodol’la ani xikpa vorvim mon’xachea gineanar
uzvadd poddla, dekun modi korpachi ani ostomtechi vagnnuk apnnavpachi
khumkhumi Goenchea tornnatteam modim mottea promannan aiz dixtti poddtta.
Oslem varem amchea sobhonvtim posortana tem varem amche sonvskrutaiek ek
motto dhok’ko divpacheo khunno legun disunk lagleat. He dixen kaim karvai
korina zalear, ek dis Dev modirant ietat tim magnnem korunk nhoi bogor
thoim vochun aplea novea kopddeanchem ani ostomtechea bemoriadik modinchem
prodorxon korunk mhunn amchea tornatteanchea monant vankddo somoz zait
mhunn mhojem mon mhaka tonchta. Dekun sobhemazar mhoje vichar Gulabachea
paklleancher xinvraitam.
GULAB-achea boreaponnan (Agost 2005 ank)
(Courtesy - Gulab August 2005 issue)