VELL
Daniel F. de Souza Vell ho ek lhan sobd protek mon'xachea jivitant chodd molacho. Vell amkam vikto gheunk poddonam. Vell amkam osoch melltta dekhun tacho ami naka zal'le toren vapor korun to ibaddunk favona. Karann, ibaddlolo Vell porot melltolo mhunn koslich khatri na. Mon'xachea jivitantlo dor ek dis Devan 24 voranchea vellan guntlolo asa. Hacho monis folladik ritin vapor korta kai? Hea prosnacho zobab mellounk ami dusreanchea jivitacher nodor marpachi goroz nam. Amchea chaltea jivitant nodor marlear hea prosnacho zobab amkam soroll mellta. Sokallim utthchea khinna savn tem sanjer porot nhidonk vocho meren ami ho vell koso sartanv kai? Khorench ami ho vell kitem tori borem korunk vapurtanv kai vo osoch kainch korinastana hogddaitanv kai? Hevui prosnnachi zap dor ekleak amkam amcheach jivitantlean melltoli. Oxem mhonnttat: " Kam korpi mon'xak vell mellta titloi thoddo". Punn bekar vo allsaien jivit sarpi mon'xak Vell utracho orthuch khobor asonam, dekhun taka tachea jivitant vellachem mhotvuch kollonam. Vellachem mhotv somzota to monis ek goddi legit ibaddunk poddot zalear tacher don pavtti tori vichar kortolo. Vellachem mhotv somzota to monis eke muie bhaxen vavurta ani dor eke goddiecho faido aplea jivitant kaddta. Aichea somazacher ek chalti nodor firailear vellachem bhangar korpi ani tacho goborui korpi monis eksarke melltele. Amche modem zaite oxe asat ki tankam aplea hatant axil'lo vell hogddaun bospak kainch vegllem disonam. Tea vella modem kam korunk zata zalear legit tem korinastana ravpak tatunt tankam koslench vankddeponn bhogonam. Dusre vatten somazant oslei monis asat je raticho dis korun ani disachi rat korun pott-tiddkin vavrun aplem ani aplea kuttumbachem udorposonn kortat. Oslea mon'xank dor ek disachi goddi khub mhotvachi ani dekhunuch hem sogllem zanno zaunui te vellacho purnn faido kaddttat. Sadoronnponnim polleunk gelear mon'xache kuddik visov zaich zai. Visov ghevopui khub gorjechem. Punn kitlo vell mhunn mon'xache kuddik visov zai asot? 24 voranchea disant monis tantlim 12 voram fokot kainch korinastana nhidun sarta zalear, hea visovak orth asa oxem tuka dista? Mhojean koslich otitai korinastana mhonnunk zata ki ho monis aplem jivit hogdddaita, apleakuch fottoita mhollearui fott zavchinam. Mon'xachem mon ani kudd ekameka kodden satvikponnan zoddlelim aspachi goroz. Hancho dogaincho sombond visvaxi tosoch somjikaecho asunk favo. Thodde favtt mon'xachi kudd visov gheunk sodta punn mon aplem kam chaluch dovrunk anvddeta ani he toren mona ani kuddi modem ek torecho vegllochar utpon zaunk xokta. Oxem ghoddunk favonam. Monachi vadd zaunk ami zata titlo amcho sohokar diunk zai ani osle poristhitint kuddik zoit melloun ghevpak soeg diunk zainam. Ek gozal ghott monant dovrunk zai: 'Ek kam zor amche kuddicher kosloi vaitt porinnam korta ani dusre bazun visov zor amchea monacher add ieta zalear hacho amkam kosloch faido mellchonam.' Monxache nhidek ani visovak ek xim'-mer asta. Punn teo donui xime bhair pavtat tedna monis allxi ani be-upeogi zaunk pavpachi xoketai vaddta. Anik ek vaitt sonvoim ji sadharonn mon'xa sovem disun ieta ti mhollear aiz korpachem kam monis faleam korchem oxem mhonnun aiz korinastana dovorta. Tem kam' korpak apleak aiz asa to vell faleamchea disa mellttolo vo nam hem to nokllo. Osli chal allxi mon'xa sovem disun ieta. Dekhun faleam korchem asa tem kam', aizuch korchem ani aiz korchem asa tem kam atanch korchem, oslo nirnnoi mon'xan gheunk favo. 'Time and Tide wait for no man' he inglez mhonn 'nnecho orth mon'xak spoxttritin somzol'lo zalear vellacho vapor koso korcho hem monis zanno zatlo aslo. Punn durdoivan, vellacho vapor koxe toren korcho ani tacho faido koso kaddcho hem monis zaite favtti xikunk chukta. 'Vell mon 'xak ravonam, punn zaite favtti mon'xak aplim chintnam xat'ti pavoupak ani sopnam sakar korpak vellachi vatt polleun ravchi poddtta'. Vellak ravpacho tujer prosong ievcho nhoi, hech nodrentlean monantle he don vichar tuje mukhar manddleat te thoddo vellant vell kaddun monant gholloi. Vellacho sarko vapor korun tujem jivit bhangarachea dhageanim nettoi. Disantlean apleak mellta titleai vellacho faido kadd ani dovache thembe (drops of dew) pannache tenkxer suddsuddit nachtat toxe, tujem jivit vellachea gopant khuxalponnim aiz ani sodankal nachum. Nach'chench! -- No virus found in this outgoing message. Checked by AVG Anti-Virus. Version: 7.0.344 / Virus Database: 267.10.25/102 - Release Date: 9/14/05
