Dusrem Voros Somptana... GULAB-acho sthapnnar Sompadpi Pri. Freddy J. Da Costa tacho bhagidar Konknni sevok Felicio bab Cardoso ani tancho ixtt bab Frank Pires sangatak Haveri hanga marekar obsoegak sampddon hea sonvsarak adeus korun gelear don vorsam sortat. Hea somoiar tancho ugddas korun tanchea otmeank xanti magum-ia. "Zo konn apleak visorta tacho ugddas lok korta" oxem mhonnttat tem aichea kallar sot thorta oxem mhaka zalear disona. Fr. Freddy ani Feliciobab hanchea mornna vorvim Gulab masik onath zalam. Tanchea mornna udexim Konknni chollvollik vhodd luksonn zalam. Tanchea mornna udexim Konknni bhaxek, chollvollik ani somazak zal'lem luksonn bhorun haddpak chodd muskil. Aiz Konknni mollar vostele poristhitint tanchi chodd goroz asli, hem konnui man'eo kortolo, punn... Tanchea jivitantlean prernna melloun, ani tanchea dhieiamni cholun, tannim ordhkutto dovorlolo vavr purnn korunk ami khoreamnich vaurleat kai? Vo amchea faidea khatir Konknni mollaili tanchi xikovnn ani mettam urfattim dakhounk proitn keleat kai?! Konknni somazant te kitea khatir jiele ani koslo sondex diunk vaurle tem spoxtt zaunche khatir ani tancho Konknni mollailo sondex aiche Konknni pillgek nitt pavche khatir tanchim kaim adlim borovpam Gulab-ar uzvaddaunk ami nirnnoi ghetla. Fulam Khursachem Dev-mondir Monis sonvsarant aplea okhondd vavra dvarim dusream khatir kitem korunk ievjita tem to aplea mornnant aplea vangdda gheun vochona, bogor dusreamni vaprunk tem hangach dovrun veta. Fr. Freddyn Bambollechea Fulam Khursak bandlelem dev-mondir hachi ek govai zaun asa. Hea dev-mondira vorvim bhavarteank magnnem korpak addos mellcho mellun, kaim zonnank pottacho-i alaxiro tatuntlean mell'lla ani mellta. Oslo vavr korpak dhaddos aschi goroz ani oslem dhaddos Pri. Freddy sovem aslem. Nam tor oslim dev-mondiram anik khub zolmant ietlim aslim. Hatant ghetlolo vavr zababdaren ani sompurnnaien xarti pavopachi Fr. Freddyk kopxi asli. Zoxem Arsebisp Manest Felipe Neri Ferrao sodanch ugddas korta, "Fr. Freddy ekech pavtti zaitim kamam hatant ghetalo ani tim sogott kamam sompurnnaien xarti pavovpachi taka protibha (talent) asli." New Age Printers Chhapkhano Fr. Freddycho 'New Age Printers' ho chhapkhano tachea vixex vavrachi anik ek dhaddosachi govai zaun asa. Na zalear oxe khaxele padrinche kivam dhormik sonsthanche khub chhapkhane asunk zai asle nhoi?... Rinnam kaddun ani bholaikechi sud'dam beporva korun, rat vo dis mhonnonastana vavron, tannem ho iedo vhoddlo chhapkhano sthapon korun tatuntlean khub zonnank pottacho asro dilo ani sangatak tatuntlean chhapon ietelea materiala vorvim Konknni bhaxechi ani Kristanv dhormachi porgottni keli. Hea tachea kar'eachi khub kritik zali ani abru choramni obhait man ubovpacho iotnui kelo. Hea zhuzantui tannem EKLEAN fuddo kelo; konnench taka kosloch tenko diunk nam. Kritik korteleank ani man-abru chorteleank dhaddos asonam. Oslim kamam biukutteanchim zaun asat. Aplo dhormik vavr korcho korun tannem, jinnent bilkul visov ani vixranti ghenastana, ho chhapkhano choloilo ani vosoilo. Hacho tache bholaikecher bhoinkor porinnam' zalo. Ten'na tachi bholaiki chike gombhir zal'lean ani mornnacher khontt marun porot ail'lean fuddara vixim tannem matso niall kelo dista. Faleam apnnak kitem-i zalem zalear hea chhap-kaneachem kitem? Ten'na tannem ho chhapkhano Goenche diosezik divpachi apli itsa ten'nachea Arsebispak Manest Raul Gonsalves hankam kolloili ani ho chhapkhano diosezichea tabeant korpa sombondhim offer dilem. Diosezin ten'na te vixim kainch interest dakhoili nam. Uprant novean tannem rat-dis vavron ho chhapkhano, Maiache 17ver 2004 aplea dogam sangateam borobor tea marekar obsoegak sampddon Devadhin zai meren, choloilo. Chhapkhano Dioseziche Adhin Tachea mornna uprant tachi itsa puri korchea hetun ami ho chhapkhano diosezik divpachi amchi ievzonn Arsebisp Manest Felipe Neri Ferrao hankam kolloili. Hea chhapkhanea sombondhim Fr. Freddyn testament vo 'will' oxem kainch korun dovrunk naslelem. Punn khubdam tannem ho chhapkhano Goenche diosezik divpa vixim itsa dakhoil'li dekun ami - tache avoin ani bhavnddamni - ho nirnnoi ghetlo. Arsebispak amchi ievzonn kolloitoch ho chhapkhano diosezichea tabeant korpacheo rattavolli suru zaleo. Title mhunnosor 'Deed of Succession' hachea khala ho chhapkhano amche avoichea nanvar ailo. Ho chhapkhano diosezichea tabeant korpache rattavollik besumar kall lagtolo hem monant dovrun ani cholte poristhitir ho chhapkhano (running press) tanche adhin korcho hetu, tech borobor tea chhapkhaneachea kamgarancheo nokreo ani udorposonn, hancho vichear korun, sumar ek voros voir ami ho chhapkhano kamgaranchea adharan choloilo. Diosezui zalear amchich, punn ami aplech mhunn diosezin manop hem tancher tharlolem asa. 2005-tlea Junant to chhapkhano diosezin cholounk suru kelem. Uprant urleleo rattavolli sompoun solamotin ho cholto chhapkhano Goenche dioseziche adhin korun Fr. Freddychem hem sopon sakar kelem. Chhapkhaneache fuddle bagent Fr. Freddychea omor ugddasak tacho ek putllo (bust) ami, tache familin, ubho kela. Hea vavrant dioseziche votin misoll aslelea protinidhimni - Vigar Jeral manest Fr. Jose Remedios Fernandes, Fr. Victor Rodrigues ani Fr. Adrian Furtado hanche koddlean amkam mell'llelea sohokara khatir ami dhin'vaxi. Chhapkhaneantlean Kimot Ani 'Trust' Hea chhapkhaneachem bhettvonne khatir (gifting) valuation korun tea molantli 25 ttok'ke kimot ami sorgest Fr. Freddychea ugddasak 'Trust' sthapon korpak ghetle. Zori hea chhapkhaneacho - zomin, imarot, iontram, kompiuttor, bos adi dhorun - bazari mol vo 'market value' khub ogllo zatlo punn, bhettov-nnechea panvddear valuation korun ani tacher jem rinn kaddlolem tache je hopte baki asat te (loan liability) kaddun, valuation-achi kimot aili 65 lakh rupia. Hea duddvanchea chovantteantle her liability/payments aslole te kaddun diosezi koddlean amkam 14,73,500 (chovda lakh sot'tor ani tin hozar painxim rupia) mell'lle. Tatuntlean ami "Fr. Freddy J. Da Costa Memorial Trust" ho somajik ani sahitik Public Trust sthapon kela. Hea Trust-ache Trustees zaun asat - Fr. Manuel Gomes, Prof. S M Borges, sorvshri Uday Bhembre, Soter Barreto, Fabian G. Da Costa, Marcos Gonsalves ani Fausto V. Da Costa. GULAB-a Sombondhim Svotacho chhapkhano nastana Gulab cholovpak muskil zatlem hem mhaka pottlelean chhapkhanea vangdda Gulab masikui diosezik divpacho nirnnoi ami poilim ghetlolo ani hi ievzonn kaim otti ghalun diosezi somor dovorloli. Punn kaim karonnank lagon, chhapkhanea vangdda Gulab divpachem mett ami fattim ghetlem. He vixim odhik mahiti dusre khepek ken'nai hanv diin. Mhunnttoch Gulab-a sangata Gulab-achi aspot mhunn ek kompiuttor, ek scanner, ek printer tosoch pornno Sumo ani skuttor amchea tabeant ghetlim. Punn vortoman-potranchem registration bodol korpachea formalidadink kaim vell lagtolo, hem monant dovrun Gulab-acho pot'to toxench chhapop ani her vevhar, Gulab 25vea vorsant bhitor sorosor, mhonnje Dezembr 2006 meren, New Age Printers hangach dovorpak koblat keli. Sangpachem mhollear Jun 2005 savn, podorcho chhapkhano naslolean, Gulab novean dusreanchea chhapkhaneantlean (New Age Printers) chhap'pache poristhitir cholta ani hea vavrak amkam New Age Printers hankam dor proti fattlean oglle-unne 16 rupia farik korche poddttat. Gulab-ache vikrentlean, 'distribution'-acho khorch ani dolalanchem 'commission' kaddun, amkam dor proti fattlean sumar 10 rupia mellttat. Mhonnje 16 rupiamni prot gheun ami ti 10 rupiank viktat. Gulab bhair chhaplelean tras zatale ani te tras hatallchea hetun New Age Printers chhapkhano sthapon zalo, hache vixim sorgest Fr. Freddyn khubdam spoxtt kelam. Mhunnttoch hea chhap-khaneantlean Gulab-ak Dez. 2006 meren ani uprantui kitem tori somzun ghevop vo 'consideration' mellchem, hem tor chhapkhaneachea karbhareanchea udar monacher tharlolem asa, ani he vixim kitleo-i otti ghalop xok'eo vo upegachem nam oxem amkam dislem. Hi amchi opekxa hispabhair chodd asli kai ? Hem aste aste amkam kolltta ani kall hacho purnn zabab ditolo. Hem sogott ami amchea atm-gourova khatir (self-glorification) boroilam oxem nhoi, bogor kaim lokanchea toxench kaim padrinchea-i tonddantlean kaim lottkeo gozali amchea kanar poddleat tancho khulaso korunk ani jon'tekui hea vevharachi nitt khobor mellchi he hetun boroilam. GULAB Konnem Sambhallcho? Osle poristhitint Gulab koso sambhallcho ani jivont dovorcho tem dor eka Konknni mogeacher thorlolem asa. Amche votin ami kedoi porvot choddonk raji asat, punn tumcho sohokar mell'llearuch amkam hea vavrant ies mellom ieta. Gulab-achi aichi poristhiti kitem-kat asa, jairatim votten Gulab kitlo rosrosta, tem ami foddun sangchi goroz nam, tem sogott vachpeank udka itlem nivoll dison ietach. Anik Ek Vors Somptana... Gulab-achem sompadokponn mhojea hatant gheun anik ek voros soron vetana Gulab-achi Sompadpok Somiti - Prof. S. M. Borges, Soter Barreto ani Marcos Gonsalves hanche upkar atthoitam. Gulab-achi dor ek paklli sundor korpak te pott'tiddken vaurleat. Dor mhoineak avddichi ani mahiti divpi xins kotha toiar korpak Marcosbaban khub tokos ghetla. Gulab cholovpa khatir Prof. S M Borges hannim mhaka dil'lea iogdana khatir hanv tache upkar atthoin title komi mhollear otitai zaum nozo. Tachea ni-svarthi sohokarak lagun Gulab cholovpak mhaka sfurti mell'llea. Hea don vorsam modim tache koddlean hanv khub xiklam-i bi. Tachea sobhavak lagon tachea vangdda vavronk umed ieta. Tachi ut'tom' sohokar divpi vrut'ti mhaka naka legit zalear Gulab-a khatir dor mhoineak Goem voddun vhorta. Tech porim Soterbabancho sohokar ani noitik fattboll, 'moral support' mhaka sodanch gavla. Nozo astanaim Gulab-achea vavrak hat ghalpak te fattim ravonant. Tech porim Gulab-acher borovpeancho upott sohokar mhaka labhla. Vella-vellar aplim moladik borovpam patthovn tannim Gulab-acheo paklleo sobhoileat ani sozoileat. New Age Printers hancho hanv upkari, Gulab vellar chhapun diunk te vavurlelea pasot. Tumkam sorvank dev borem korum. Gulab-ar jairati divpeank vixex korun amcho Bahrain-cho protinidhi Xri G R Crasto, zaka Gulab-achi khub fikir asa ani zo ni-svarthiponnim apli seva dita, taka amche dhinvas. Ani nimannem punn komi nhoi - Gulab vachpeanche hanv kheritponnim abhar mandtam, kiteak tumi zaun asat karonn ami Gulab uzvaddak haddunk. Gulab vachit ravat ani tumchem ugtem mot kolloiat, je vorvim Gulab odhik pormollit korum ieta. Somestank Dev Borem Korum.
_____________________________________________ Do not post admin requests to the list. Goanet mailing list (Goanet@goanet.org)