Aga Mhojea Render Mama Chodd Ga Maddari Ghorant bhitor sorun nitt almarixim vochun feni-echi botl kaddli ani glasan, sumar orddo pav otoun ghotta ghott tallea sokoll pavoilo. Ho tacho sobhov dakholl kori, ghora bhair gel'le kodden konn tori tachea thaim gorje bhair subeij uloilo. Piedade Agapito Miranda, renderponnacho dhondo cholloitalo. Tachea, manddanche soreak khub giraik astalem. Tacho soro dusrea rendram porim don numbrancho vo nousagoracho aso naslo. Dev bhiranticho monis aslelean sur-en dusro vostu mixoll kori naslo. Tacho soro marog astalo tori astana tachem giraik vaddot vetalem. Tacho soro lakddanchea ujeacher ani matiechea aidonnaleant purvozam porim sizovun kaddtalo. Konnakui tacho soro zai zalear ek mhoinom adim order divnchi astali. Piedadichea soreachi tust khorelele (genuine) madd pietele giraik vale kortalem. Choddan chodd tachem giraik tarvar, London, Gulf-an nokri kortelea Goenkaranchem astalem. Maddanchea soreachem mhotv somzota tannim tachea ghorache umbre zoroiche asle. Tea vatarantlo fokot tacho soro xuddh vo pure aslo. Piedade, sanjechea sat horar, soreacho kollxo (18 botlincho) aple saikolir bosoun Ubo dando vaddeant ravpi Camil, hachea ghora gelolo. Camil-ak imtto London-kar mhollear nhoinch sorbhonvtim aslolo ganvcho lok ollkotalo punn nigtench zolman ailolem ballok porian to sapuch imtto mhunn zanna zatoch odik mottean roddunk lagtalem. Kitem zalem? Camil-an hevui kepek poixeam kodden imtteaponnam kelim kitem? Piedade dusro orddo pav glasan otoitana, bhailen zap ghalun vicharlem. Koslea monxache giraik? Ghelea vorsa tuka xiddkailelem tachem giraik mhaka naka mhunn. Hanvem kitem mhunn korchem? Tachi bhoinn poratunk lagli. Char pavtti tori Camil-an tika fonar ugddas kelo khuim. Tedna tunvem sangchem nhoi? Nitt ani nitoll soro pietolo zalear tichea bhavan duddu-i bhi bore nitt mezunk zai mhunn? Hanv konnam thaim odik ghenna. Ierangelea sorea bhoxen mhojea sorean mhell asona hech khatir mhojem giraik hanv sangta te duddu divnchem divn mhaka 200/300 rupia bokxis ani bhurgeank mhunn foren chokleti, maggi, cheez-sarddinanchim latam ani ier vostu dilea viret ravonant. Punn ho imtto London-kar? Xi ollxig Soglle eksarke asonant. To toxem korta mhunn England-ak aslele sogllech imtte nhoi. Aik Sakru. Hanv imandarin mhojem kam' kortam. Konnui to zaum. Mhojea sorea vixim vaitt uloilo zaler mhaka rag ieta. Tannem kitem mhonnlem? Ghorkaracho choddlolo rag Sakruk gomlo ani tinnem vicharlem. Arre Piedade, chodd mure tuje duddu. Nousagoracho bha soro nhoi mure ho? Tea vellar mhaka itli tiddokh marli, soreacho kollxo tachea paean-chim foddun dislo. Punn Devak vaitt dista aslem. Kiteak mhojem on'n tem (daily bread). Mhojem pott tem. Mhojo dhondo to, ani toxem korop mhonnchem mhojea totvancher (principles) hanv add veta aslom. To kitem somzola? Eka kallar Goeant rendranche vevsahek (profession) unchlea zagear aslem tem aiz denvot gelam. Fuddarak ho vavr korpache render asche nant ani oslea imtteank boro manddancho soro mellcho na. Malkiread.... xi,xi tondak utram ietat Choll visor tem atam. Tujea angar udok ghal. Tachea pikasavan, nak sokoilem subeij zata tujem. Ghara ietna vatter Duming-achi bail Ana Francisca mevleli. Tinnem ugddas kela, Duming khoim fuddlea mhoineant Setembrant, Kuwait sakun Goeam pavtta. Mhojea sorea xivai dusro soro ghonttna to. Bore bhoxen aik. Bhitorlea kuddan kollxo asa to hanvem special Toronto, Canada-k aslelea Silviano Barbosa-k mhunn toiar kelolo. Tannem aplea mavxea bhoinnik komputteracher chitt pattoun dilea, Dezembrant Goeam pavtta mhunn sangun.Taka dovorlolo kollxo Duming-ak ditolom. Khub udar to. Igorjek, ganvchea klubak, donation divnk sodanch fuddem. Tacho bapui porian mhojea bapai koddsun soro getalo khuim. Kuwait sakun ietna, tuka, mhaka, bhurgeank kosli na tor kosli vostu Duming haddtta mhunn hea nodren hanv uloinam. Tacho sobhov vegloch. Punn, ho to imtto . Puro nhoi atam. Angar udok ghalun ieo. Tea mhonnosor jevnnachi toiari kortam. Ani ek ugddas kortam tuka. Amchea Kristi Povitr Pustok-ar zannvaiecheo mhonnnneo asat. Eklo udarponnant duddu vanttta tachi girestkai vadtta. Dusro imtteponnam korta torui to goribuch urta. Mhaka kopachem laglem mhunnxi. Borem tor udok nhanvunk vhetam Jevlea uprant thoddo vell TV-cho program pollevncho asta. Punn tachem mon bhouch kachabull zalelean TV-chea karriavollicher tacho sintid naslo. Oslo somoi ieta tedna eka bhurgea porim tache bailen taka somzaun, nhidche kudddin vorcho poddtta. Ani aiche ratrik tosloch prosong nirmann zallo asa. Sakru, tachea ugttea hodddear apli tokli dovorta. Tache donui hat aple xattier vornun ti mhonnta, hanv sangunk visorlim. Sokallim hanvem vis novim dampn'nim ani ek dudinem vikot ghetleant. Dudinem mhollear, ghelea char dis ghorchem dudinem mellem aslem tem aiz nitoll zalam. Hanv cholllim nhidunk. Maddar choddun, kedei vellar chev ghalunk zata. Lino B. Dourado
http://www.goa-world.com/goa/poems http://www.mail-archive.com/cgi-bin/htsearch?config=gulf-goans_yahoogroups_com&restrict=&exclude=&words=Lino+B.+Dourado __________________________________________________ Do You Yahoo!? Tired of spam? Yahoo! Mail has the best spam protection around http://mail.yahoo.com _______________________________________________ Goanet mailing list Goanet@lists.goanet.org http://lists.goanet.org/listinfo.cgi/goanet-goanet.org
