Lage Raho Roseferns Bhai!! Bara mozlachem bildinga lagsor, ti mottorantli denvli. Lift-ixim pavosor mottor cholovpi, tika pollet asta. Lift-in bhitor sorta ani chovtea mozlar vo floor-ar vochunk lift-icho butanv dampta. Begantlo mobile kaddun kaim ankdde chiddun, mhonnta. Irmanv, pavllim hanv. Tika pavounk ailolo bhav, bhoinnicho sondex melltanch thoimsorlo vheta. Darachi ghantti vazoita. Thoddo vell ravta. Porot ekdam ghantti vazoita. Punn, dar ugttem zaina. Hatachea ghoddialir nodor ghalta. Ratchim 11.55 vazlelim. Begantli chavi kaddun dar ugttem korun bhitor sortana sigrettichea dhunvracho vas tichea nakant bhorta. Bizli chalu korta. Hanga, thoim bhurgeanchim khellnni vo toys ximpodlele distat. Mezar aslele ashtray-n Marlboro sigretichim pontam ani tim soddun ghelleak ti ollkota. Ticho mendo tiddken usollta. Sorbhonvtolim nodor marta. Soreachi battli ani naka puro sor soro ghottun orddea sorean bhorlele panch glass, ustim aidona ani plates hanga-thoim distat. Mhonntoch, tichea fattlean ghorant, when the cats away mice start to play, ho khell zala. Tika visvas dorunk agvodd lagta. Hem Mhojem Ghor? Nhidchea kuddant vheta. Nnov vorsanchi dhuv nhident bormeta zalear don vorsanchea putak pamper ghalistana aplea pottar ghevn, tondd h-a-m korun bhurgeacho bapui sust nhidlolo dista. Putan, bapaichem pejam (pejama) mutan ollem kelam mhunn taka khoboruch nasta. Pottar nhidlelea putak tachea velo kaddun, tagelea nhidchea zagear ghalta, ani ghorkarachem muttan bhorlelem pejam kaddun ollea kuddkean tigelea sonvsarak kamara sakun pusta. Poilech khepek Kuwait-chea desant bab Roseferns hancho Goem bhor ghazlolo tiatr Hem Amchem Goem? Musolmanachea Ramadan-a (vorsantlean 30 dis upas) disanim, Hawally A/c vosreant kallchea Sukrarak (13-10-2006) machier haddlo. Sanjechea 6.18 suru zalolo tiatr ratchea 10.20 somplo. Ghora pavtta mhollear 11.55 zaleleim. Tichea ghorkarak tiatr avoddnant ani ti, Kuwait-an zatle tiatr aplea bhavachea kuttumba sangata chukoi nastana polleta. Ticho ghorkar bank-int nokri korta. Mhonntoch taka falleamchem poddun gelem na. Bank-ant nokri korteleank, Sonvarachi sutti asta. Dekhun tichea ghorkaran tachea ixttam sangta atthvodo vo weekend most pieun sarla. Nhannient vheche adim ievttin-tevttin ximpoddleleo vostu ektthaun, kainch zavnk naslele bhoxen ghor nitoll-nigutt korta. Udok nhaun ani angar nightie choddoun thoddo visov ghevncheak salantlea sofar bosta. Ghor nigutt kortana hem kagodd chukon koxem urlem? Tika khobor na. Thoddea vella adim pollevn aillea tiatrachem hand-bill Hem Amchem Goem? thoim sokoll aslelem dista. Hatant gheta. Ekdam bharik nodor tea hand-bill-ar marta ani mhonnta. Lage Raho Roseferns Bhai.(Carry on Roseferns) Thoddeach horanchi ghozal. Tiatr pollepa khatir ti ghorantli bhair asleli. Ghorkarak konnem fulloun popot kelo hi tika sarki khobor na. Punn ek mat ti zanna asta. Ho ixttancho mhellavo ghoddunk haddpak tichea ghorkaracho poilo hat na. Tache ixtt mhollear, ek Goenkar ani teg on-Goenkar (non-Goans). Goenkar ixttager party aslear, soro na. Kiteak, tachi bail charismatic. Punn ticho ghov dusreanger party-k vhetana poilim mottoriche steering apnnem dorchem ani party somplea uprant tagele bailen. Dusro, Bihari Hindu. Tanchea Rajeant, Kristi lokak tras. Madrincher akromonn, bolatkar, ani ulpaun jive martat. Tanche ghorant soro pieop mhonnchem ek pap khoim. Dusreachea ghorant hem pap lagu zaina kai? Tisro ixtt Andra. Vasku ani Zuari nogrant he lokanchi vadd 85 tokke dupet zalea ani Goenkar xennla. Chouto Mallu (Kererkar). Goem ordem zopt kelam ani fuddlea vechnnukecho nikall. Kerelachea lokacho sorkar!!! Sodeak Sancoale-chi panchayat on-Goenkar vo Belganvkar cholloitat. Bhitorlo bedi ani bhailo chor, oxem kitem tori Goenkar ixttan kelam mhunn atam tika khori khatri zata. Illechea vella modim nigutt dovorlelem ghor mhellem kelem zalear Goeam lottun ietle bhailo lok, Goenchem kitem kortat kai? Tichea jivar akant ieta. Hem Amchem Goem? bab Roseferns-an Goenkarank ek mhotvacho sondex divn zagrutt kela. Goeant bhaile lok vixex korun Kashmiri, Lamani hannim, Goenkaranchea oskotaecho goir-faido kaddla. Ami visvaxan vichun kaddlele montri, amdar aplea apsvarta khatir bhaile lokak ration kardam divn amche dhortorereche malok korun sodla. Videxeank Goenchi zomin vikop. On-Goenkarank praiancher vo doria tenkhun ganvchea sarpanch ani amdaramchea adharan panch nokreti hotelam bandunk zage divop. Sorkari nokri bhaile lokank. Goemkaranchem Goem anik urchem na. Bhoim asa. Hem sogott Roseferns bab Goenchi poristithi hata bhair panvchea adim susegad Goenkaran utthche asa mhunn aplea tiatra udexim zagrut korta. Punn apsavrti Goenkar mhotvache prosnacher avaz utthovcha bodlak orth naslelim (Konknni lipi, IFFI, garbabe, itiadi.) kizilam ghevn bosla. Amcheo sobit doria vello gungea ogddannim, xidullki (prostitution) bhurgeam lingi (child sex) ugtteaponnim cholta mhunn sonvsarak fankarlam. Lage Raho Munnabhai, hem hindi cholchitr akkhea Bharotan netan cholta. Hea filmacho bhouch prochar zala. Ani amchem ekuch Goenchem satollem, MUNNA babak muklea panar xabaski dita. Gandhijichim totvam aslolem film hem. Brittixachea chopkeantlean Bharotachi suttka Gandhijicha Satyagrohachea khatiruch zalea mhunn kaim rajki monxanim (tevui-i zalear choddan-chodd broxttochar korpi) hem film pollevn kora meklli (tax free) kelam. Itlean somplem na, tench satolem dusrea sumanache ogrlekh-an (editorial) Zoi! Zoi Gandhigiri! ek umedicho prokas fankorun akkhea desak Lage Raho Munnabhai he cholchiran dipkaila mhunn, bodaen sangta. Cholchitracho sondex bhes boro asa tori to vevharant ghalpak sokea asa? Oxem mu ga? Digdorspi Rajkumar Hirani, Lage Raho Munnabhai film-a velean Gandhigiri vo amchea Bharotache Bapuji-chi philosophy sangta zalear digdorspi Roseferns Hem Amchem Goem? tiatra udexim Goenkarank zagrut zavncho kall ailo mhunn xiddkavnni dita. Goenchim vortomanpotram, masikam, Munnabhai-k zoi-zoi nare gazoichea bodla amchem Goem infernachea darar pavchelem vell ailo mhonn, Goenchea potrannim hea tiatra vixim boball korun Goenche porjek kiteak zagruk keli na kai? Ho vichar Hem Amchem Goem? tiatr pollevn hollantle bhair sortana tiatr pollennanranchea mon korzunk laglem astelem. Atam tori susegad Goenkar nhidentle utthele kai? Lino B. Dourado
http://www.goa-world.com/goa/poems http://www.mail-archive.com/cgi-bin/htsearch?config=gulf-goans_yahoogroups_com&restrict=&exclude=&words=Lino+B.+Dourado __________________________________________________ Do You Yahoo!? Tired of spam? Yahoo! Mail has the best spam protection around http://mail.yahoo.com _______________________________________________ Goanet mailing list Goanet@lists.goanet.org http://lists.goanet.org/listinfo.cgi/goanet-goanet.org
