Davea HatacheaTalltar Povitr Prosad Ghetanam...
Tea disa Misak vochunk mhaka vell zal’lo. Vegim-vegim Igorjent bhitor sorunk hanvem davo pãy ukhol’lo to fattim ghenv, mhozo uzvo pãy fuddem kaddun igorjent bhitor sorlom. Achar mandpi? Nam! “Lognacho ekvott zoddunk tumchi khuxi dekun, ekamekacho uzvo hat dhorat.” Povitr logn-sonvskar zoddunk igorjent ailolea vhokol-novreak ek lhanxi, punn kazari jivitachi moladik suchovnni Padri-bab korta. Ani zoddpem, Padri-babacho hukum’ mandun ekamekacho uzvo hat dhortat. Punn tich zoddi igorjent bhitor sortanam, uzvo pãy ghalun bhitor sorchem, hem mat Padri-bab sangonam kivam tannem vhokol-novreak fors korunk zainam. Khuincho pãy poilim dovrun dev-mondirant proves korcho tem, zonn ekleacher tharlolem asta. Igorjent kivam konnachea-i ghorak bhett kortanam uzvea pãyan bhitor sorpachi sonvoim mhaka lhanponnim thaun asa. Hindu ghorabeantli ostori, logna disa ghorkarachea ghorant bhitor sortanam uzvo pãy fuddem kaddun bhitor sorta. Uzvo pãy ghalun bhitor sorchem mhollear tinnem noxib haddlem vo Lakxmi bhitor ailolea porim ghorantlea lokak ani odik korun sasuk dista. Ani chukun ti davo pãy ghalun bhitor sorli tor, ghorkarachea ghorabeacher odruxtt haddlem koxem zata. Ghora-pay mornnache toddir asa mhonn putak logn korop. Ani sun ghorant bhitor sortanch to somplo zalear ticho guneanv korop. Hem sarkem asa? Kosli-i vost dusreak ditanam amchea uzvea hatamni ditanv, ani rit-rovis samballpi apnnachea uzvea hatan ghetat. Odik korun poixe ditanam davea hatant aslear uzvea hatan ditat. Dusreak hat divpachi chal (handshake) ami uzvea hatan kortanv. Uzvo hat koslea-i kamant gul’l (busy) vo mhello aslo zalear, “ragar zaum naka-i” vo “please don’t mind” oxem mhonnun davea hatacho vapor khuxie bhair zata. Tem mat ami monak laun ghenanv. Sokallchim uttche uttun Santa Khursachi kuru uzvea hatan poili kaddun anik ek uzvaddit dis dilo mhonn ami Rochnarak dhin’vastanv. Urlolim kamam amchea uzvea hatan suru zatat, punn amcho davo hat soimbachi goroz zata tea zagear vapor zata dekun, to hat hollxigavnno oxem amchem chintop asa. Dekun, sobhemazar davea hatacho chodd-so ami vapor korinanv. Ani tea disa hanv taktiken igorjent bhitor sorunk mhozo davo pãy igorjechea panvddear dovorchea vellaruch, sintid uddlolea mhojea mendvak khinnam bhitor zag zali, ani hanvem pãy soroll bodlun mhozo uzvo pãy mukhar ghalolo to konn eklean mhaka polleun kaddlo. Mis somptoch tannem mhaka darvontteaxim dhorun, mhaka porsnancher prosn korun mhozo bezo tannem kenchoylo. Thoddeank dusro monis kitem ani koso vagta tem poddlolem asta. Hanv somzotalom fokot bail-monis chullbullit(inquisitive) asta kai mhonn, punn dadlo-i bariksannin polleunk unno nasta. “Igorjent bhitor sorunk tunvem poilo davo pãy ukhol’lolo to okosmat fattim gheun tunvem uzvo pãy panvddear dovorlo...” Tannem vicharlem. “Devachem ghor. Uzvea pãyan mondirant bhitor sorlear magnneak foll mellta”, haka fokot sado zobab diun hanv mekllo zatolom oxem mhaka dislolem, punn tacho dusro prosn aikun atam mhojie toklier thomlo marlolea porim zalo. “Davo pãy ghalun bhitor sorlear Dev magnnim aikonam?” “Polle ixtta, davo pãy kivam uzvo pãy dovrun hanv igorjent bhitor sortam ti bariksann tuka zali mhonn vichartam. Mhaka vicharunk naka aslem, punn tunvem mhojea nakak dhorun tondd ugtem kelam. “Koxem re papia?” “Krist Prosad ghenvk tum mhojea fuddem ubo aslo.” “Hoi” “Povitr Komunyanv tujea davea hatar ghevn, uprant uzvea hatan tonddant ghalo. Jiber kiteak ghenvk nam?” “Povitr ost jiber vo hatar gheum yeta, zonn ekleachie khuxie promannem. Arkidiosezin dilolea kaidean, hanv sarko asam” “Arkidiosezin dil’lo dusro kaido tujie nodrek dislo nam?” “Sanglear gomtolem nhoi" “Tuzo uzvo hat davea hatacher dovrun, Povitr ost chimttient dhorum yeta, ani tujie jiber dovrunk zata. Oxem korunk tujean zatanam, hollxig puspachea hatachea talltar Krist Prosad kiteak gheta-i?" "Uzvea hatachie chimttien Komunyanv xevunk zata mhonn mhaka khobor nasli." "Kosli khobor asta tuka? Igorjent uzvo vo davo pãy ghalolea lokak polleun tinttear vochun khobro ani chakattam marpachi. Chol voch ani dusrie khepek hanvem sanglam toxem kor." Lino B. Dourado Vhoilo lekh 'Goans-Making a Difference', Edition II hea pustokar chappun haddla.
