Mhontlem Mhaka Laglem Taka Jeddna dog zann uloitat teddna, dusrea vattevelean vetolo vattsuro fatrak aptun zomnir poddlo ani teach khinnan gozali martole dogui hansle zalear, apunn khala poddlo mhunn hansleat, oxem sokoil poddlolea mon’xacho somoz zata. Khorem mhonllear, tanchea modim uloitana hanspachi gozal aili ani te hansle. Oxem zaitea pavtti khub zannank ghoddtta. Chukik hanslear, thoddeank borem disona ani gorom toklecho monis aslear, kestanvancher pasun poddta. Kal Son’varak sokallchea adesak, hanv kens marunk Kuwait City-n ghel’lom. Kens marun zatoch mhozo nosto, barberik tenkun asloli khannavoll Bollywood-an bhitor sorlom, ani konn naslolea zagear vochun boslom. Mhoji avddichi puri-mix-bajek, order dili. Bosantlo fon vaztolo bhair kaddun konnacho fon aila to polletana, konn tori mhojea samkarachea koddilir bosla mhunn mhaka zannvolem. “Hello”, fon kellolea mhojea ixtt Qubertinho-ank hanvem voddkilo. Mhoji hajri khoim laglea ti, taka kollunk zai asli “Kens marunk ailolom. Murgab Bollywodd-an nosteak boslam. Yeta zalear order kensil korun tuka ravtam” Tannem nosto kelo mhunn mhaka sanglem ani ek lhanxem kam’ korunk mhojea lagim poratlem. “Tuka nam mhonnonk zata? Kam’ zalem mhunn somoz”, ani mhozo fon bond korun bolsan lot’tana…. “Hey khodd’dea, nosto korunk aila?” Mhojea samkarak boslolo monis okosmat ekdam challvolun poddlo ani mhaka zapoitolea mhojea ixttak ragabhorit zaun mhonnlem “Tuzo pai khodd’do, tuji maim khodd’di, tuji bhoinn khodd’di, tuzo bhav khodd’do, tum khodd’do…ani” “Irmanv xant, xant…Xant zav. Tannem tuka khodd’do mhonnonk nam. To oxech toren khodd’do mhonnon, mhaka zapoita. Tum kiteak bexttoch challvolun poddlo? Tujea toklek tor, bhorpur kens asat” “Kens khoinche? He kens?”, toklek aslolem wig kaddun fuddarak toyar zavpi MOPA nisoll airport dakoilo ani fuddem uloilo. “Mhaka lok khodd’do mhunnon chavoitat mhunn, hanv atam wig ghalun bhonvtam, tori astona khodd’do…” “Punn hanvem tuka mhonnonk nam ani dusrem mhonllear hanv tuka vollkona porian”, mhojea ixttan taka sanglem. “Ok, ok. I am sorry”, noklli kesnvalean apli chuk vollkoli. Mhojea ixttan-ui puri-mix-bhajek order dili. Ani ami ordirichi vatt polloit astana mhozo ganv-bhanv Menino khannavollichem dar ugddun bhitor sortolo hanvem pollelo. Hanv tachi sonvoim zanam aslom. Sodanch tannem mhaka ‘Lapitt’ mhonnon voddkicho. Punn halinchea disamni tannem khodd’do addnanv (surname) lailolem. Tannem mhaka zap korchea poilim hanvunch koddevelo utthlo ani tachem nanv ghenvchea adinch tannem mhonnlem. “Hey-i Lapitt khodd’dea” “Tuzo pai khodd’do, tuji maim khodd’di, tuji bhoin khodd’di, tuzo bhav khodd’do, tum..”, Menino-ank bott dakoit khodd’do mhontlear chalvotoleachi karandai aikun, mhojea ganv-bhavachea toklek tiddok choddli ani tannem fattim fuddem pollenastana ekuch zompoi kensank marun bosun aslolea kodelivelo ukollpacho tozvit kortana, tagelo purai matheacho rov tachea hatant ailo. Ganv-bhavachea angar ragacho kantto full’lolo to wig-sak polloun poskotea pori jiron ghelo. Taka dislem purai kens umtayle. To akantlo. Kuddir bhirant bosli. Ani taka kolltoch te noklli kens mhunn, taka hanschem vo roddchem, hem gomonam zalem. Lino B. Dourado
