------------------------------------------------------------------------ * G * O * A * N * E * T **** C * L * A * S * S * I * F * I * E * D * S * ------------------------------------------------------------------------ Enjoy your holiday in Goa. Stay at THE GARCA BRANCA from November to May There is no better, value for money, guest house. Confirm your bookings early or miss-out
Visit http://www.garcabranca.com for details/booking/confirmation. ------------------------------------------------------------------------ Konknni speech of Pratap Naik, S.J. at the Save Goa Rally held at Lohia Grounds, Margao, Goa on 10 March 2007 at 5 p.m. The meeting was addressed by a number of activists and representatives of like minded organisations who care for Goa. Ixttamno, Hanv rajkaronni nhoi va khoincheach pokxacho vangddi va kam'gar nhoi. Hanv koincheach pokxak tenko diunk az hanga yeunk na. Hanv ek Jezvit padri. Pattlea 25 vorsam pasun Porvore aschea Jezvitanchea Thomas Stephens Konknni Kendrant Konknnichem kam' kortam. Lokachi magnni gheun tumche mukhar ulounk hanv hanga ubo asam. 20 vorsam pattim sastti thaun hozaramni lok Ponnje azad moidanar ailo. Tanchi magnni ekuch asli: Konknni Gõychi rajbhas zaunk zay. Tankam tednam dislem apunn vachta, boroita ani vapurta ti Romi lipientli Konknni rajbhas zatoli. Punn tea vellar Devonagori vadeamni Konknni porjek fottoili. Romi lipiechea bollar Nagori lipientli Konknni tannim rajbhas korun ghetli ani Gõyant khoinchoch Gõykar aplea ghorant uloina te Moratthik rajbhas kaideant gorje bhair manacho zago dilo. Moratthik tannim virod kelo na. Tancho virod fokot Romi lipiek aslo ani azun asa. Dekhun tannim Romi lipiek Rajbhas kaideant zago diunk na. Kiteak te zannant Romi lipiek rajbhas kaideant soman dorzo dilo zalear Nagori lipientli Konknni somptoli. Gõyant amchim Hindu bhavbhoinni Konknni uloitat. Punn tim Konknni choddxi boroinant, vachinant ani xikonant. Bhaxechea andolona vellar Moddganvchea Florian Vazak ani Agxechea 6 zonn bhavank aplo jiv diuncho poddlo. Tanchem rogot azun bob marun mhonnta Romi lipientle Konknnik nit zay. Gõyant Gõykarponn urunk amkam Konknni zay ani Konknni urunk amkam Romi lipi zay. Muttbhor lokan vaporchi Nagori lipientli Konknni Gõyche porjechea matear xenni korun thaplea. Khorem sangchem zalear ti konnakuch naka. Sorkari poixeanchea soracher Nagorintli Konknni zogta. Sor kaddlo zalear ti morta. Zoxi rukak bendor lagta ani ruk marun uddoita toxi Nagori lipi, Konknnik lagloli bendor. He lipien Konknni lokacho ekvott ghoddoilo na, na mhonn Gõykarancho-i ekvott bandun haddunk tika zalem na. Fokot rajbhaxechea nanvan sorkarche poixe khaunk mellche ani apnnak Konknniche manache zage mellche hea ud'dexan te Nagorichem ghumott boddoytat. Sorkarache poixe bon'd zalear Nagori lipientli Konknni upaxim mortoli. Romi lipientli Konknni itlim vorsam lokachea bollar vaddlea. Bhonkchea sunneak hadda kuddko uddoilo mhonntoch tem hadda kuddko gheta ani aplem tondd dhampta. Nagorivale ani atancho sorkar hench Romi lipi magtoleank korunk sodtat. Itle dis ami fottovle. He fuddem amkam fottounk konnakuch zaunchem na. Ami magtat man, respet ani amcho hok. Amchi magnni ekuch: Romi lipiek Rajbhas kaideant soman dorzo diyat. Amkam sorkarachi va konnachich bhik naka. Aicho ho mellavo ani amcho avaz aikun atancho sorkar ghoddie 8-10 disam bhitor Romi lipiek bhik ghalunk "Ordinance" kaddun amkam fottounk xokta. Amkam atam tanche bhikechi goroz na. Ami Romi lipiecho mud'do ani Gõyak lagtat te her vixoy venchnnukek ravunk sodtat tanche mukhar dovorum-ia. Rajbhas kaideant Romi lipiek soman dorzo ditoleanv mhonn sobhe mazar bhas ditoleank ani aplea manifesto hantum ghalun ditoleankuch ami amdar mhonn vinchun kaddum-ia ani itlim vorsam amkam fottoiloleank ghora bosoum-ia. Kiteak te thokleat. Tankam visovachi goroz asa. Lokache Romi lipiechi magnni xarti pavounk tanchean zalem na. He fuddem tancher patyeunk zaunchem na. Amchem kam' fuddem vhorunk amkam Gõycho, Konknnicho ani porjecho khoro mog aspi nove amdar zay. Bailank ani tornatteank he pavttim ami ek son'd diunk zay. Hangasor ekttaim zal'lim ami sogllim Romi lipiek tenko divpi. Amcho avaz akhkhem Gõybhor hea disamni gazunk zay. Dekhun hanv tumkam vichartam: Tumkam Konknni zay? Tumkam Konknni borounk romi lipi zay? Donui hat ubarun mhonnat: Amkam zay, amkam zay Amchi Konknni amkam zay. Amkam zay, amkam zay Romi lipi amkam zay. Xevttak Nagorivaleank eka gitantlean amchi ek xiddkavnni dium-ia: Nagri mhojea mama Ani hanv sangtam tuka Romivaleam vangdda tuzo Khell manddum naka. Nagri mama ailo Romi naka mhonnunk laglo Romivaleamni dhorun taka Gõyam bhair dhaddlo. Zoi Konknni, Zoi Romi lipi. Pratap Naik, S.J. Thomas Stephens Konknni Kendr 10 March 2007