*Felix Dias-achi Prenna divpi yexosvi kanni*
*Fausto V. Da Costa* Junachie 6ver, 2021, Mumbointlean ek bhou dukhest khobor aili. Mumbointlie David & Company-cho sthapnnar ani dhoni, Felix John Dias (1936-2021), auchit hea sonvsarak ontorlo. Monantuch mhunnlem, “…anik ek Mumbointli Gõykar sonstha kosoll’lli!”. Oxio ek-ek korun Mumbointlio mhan Gõykar veokti sorot astat ani tanchea zagear novio sonstha-sarkio veokti nirmann zainaslolean Mumbointlem Gõykarponn osokt zait veta. Magir, oslio veokti ghoddoitat kai ghoddon yetat ho prosn amchem mon ghansaita. Hio mhan veokti amkam prernna diunk komi poddttat kai? Vo ami tanchea jivitantlean prernna mellounk komi poddttat kai? Dor ekleak, dor ekleachem. Felix Dias, hachi murti lhan asli tori tachem kar’ya ani kirti mhan hem konnacheanuch nakarunk zainam. Ek sado ani bhiddest (*unassuming*) monis to. Aplea okhondd vaura udexim apleak, aplea kuttumbak ani aplea somazak khub kitem mellounk pavlolo. Tachi kotha ek ‘rags to riches’ kanni mhollear otitai zaunchi nam, punn alaiti nhoi bogor aplea koxtti vaurantlean, zo tannem morover kelo. Tori tannem aplem sadeponn ani lhanvikai mat sodanch sambhauli. Jivitachea rostear upraslolia add-melliank dhittayen fuddo korun tannem apli yexosvi kanni ghoddoun haddli. Tacho bapui vortolo ek artivont resperachi nhesonn xinvpi dorji ani famad tiatrist Bombaincho, Miss Julie. Aplea bapaichea paulamni cholonk Felix-ak naka aslem ani ghorchi poristhiti bhou goribkayechi aslolean, 12 vorsancho astanam Kandolle, Gõy aplem ghor-dar ani avoi-bhavddank soddun Felix, Bombaim ailo ani kam’ ani xikop sangatak korun tannem 1953 vorsa *Engineering College*-int xikpa khatir melloilolo proves soddun, aplo khasgi dhondo suru kelo, pustokam ani ‘stationery’ chhappacho. Felix 18 vorsancho astanam tacho bapui somplo. Taka anik dog lhan bhavddam aslolean tanchi zobabdari Felix-achea khandar poddli. Avoik Gõychea ghoracho sambhall korunk dovrun tannem aplea bhavddank xikxon diunche khatir Bombaint haddlim. 1960 vorsa tannem ‘David & Co.’ ho chhapkhanno suru kelo ani urlolo magir itihas. Kazarachim karddam chhaptoleank ‘David & Company’ xivai anik kitlim-i karddam korpianchim nanvam sangot zalearui akhrek giraikak zai fokot ‘David & Co.’, nhoich fokot Gõykarank ani kristanvank bogor Parsi, Gujrati, Moratthi ani Monglluri lokank legit. David & Co-chim kazaram karddam Afrikek, Australiak, Inglanddak ani Germany-k legit pavtat. David & Co.-che zaite fantte Mumboint tannem ubharle ani Gõyantui hi komponi vistarli, ji tacho bhav choloita. Xivai, ‘White Rose’ hem kazarachim nhesnnam ani her kazarachio vostu toyar kortolem xop tannem Dhobitalao, Mumboint sthaplem. Felix Dias ek yexosvi dhondekar hem amkam mhotvachem aslem tori tachem khaxeleponn mhollear Gõychea somaza khatir ani khas korun Konknni bhaxe khatir tannem kel’lo vaur. Ani hea tachea vaura vixim zaiteank ghoddye khobor aschinam. Konknnni potrank, masikank ani Konknni dobaje ghoddun haddunk Felix-baban sodanch aite-monan adhar ani sohokar dila. Oslea kamamni tachi modot magonk yetoleank tannem kednanch ritea hatamni portunk nant. Amchean kednanch visronk zainam, jednam ‘The Goa Times’ satalleacho karbhari, Fortunato Fernandes somplo tednam hea satalleachem bhou purvilem chhappachem mexin fokot Fortunatakuch cholounk yetalem. Tednam ami Felix Dias-ak ‘The Goa Times’ chhapunk magnni keli ani tannem aite-monan amchi magnni svikarli ani mhunnlem, “Hanv vhoddlo monis zaunk pavla to ‘Goa Times’ chhapkhanneak ani Fortunatak lagun. Survatek mhoje koddem chhapkhanno naslo tednam hanga hanv regist chhapun ghetalom ani mhojea lhan xopar vhoron viktalom. Hacho mhaka vhodd upkar asa.” Uprant ‘The Goa Times’ bond poddosor tannem vella-vellar hem satallem chhapun dilem. Mumboint Gõykaranchio sonstha asat tankam Felix Dias-an sodanch aplea sohokaracho palov dila, zanv The Goan Institute, Society of Our Lady of Piety, Konkani Bhasha Mandal, Goan Sports Association (GSA), The Goan Hindu Association, Goan Review Art Foundation (GRAF), adi. GSA-cho khub kallak to odheokx aslo. Anik xevttak tachem vhoddantlem vhodd kar’ya mhollear Gõykaranche Kudd ( *Club*), je ghoravale (*landlord*) kuddvaleank fottoun ani ordea mollak aplea tabeant korunk sodtale tednam te kudd rakhche ani sambhallche mhonn Felix-baban mhotvachem yogdan dilam. Aplea probhavi somporka udexim tannem ‘Federation of Goans Clubs’ sthapun tache vorvim soglleam kuddancho ekvott ghoddun haddun kaim kudd ghorvaleachie bokik poddpache vattaile. Hea mhan Mumboichea Gõykarak adeus kortanam tachea otmeak sorginchem sukh ami aunddetanv ani tachie dukhest potinik, putank ani dhuvank amchi khalti buzvonn ditanv. Tachea jivitantlean fuddlie Gõykar pillgiek prernna mellom mhonn magtanv.