Tuka zanno zanvk zay? 'Air-Condition'-achi 'luxury' bhogpi kidd Bonaventure D'Pietro (Vavraddeancho Ixtt-an boroita)
Gormecho kall suru zalo mhonntoch, sonvsarantli choddant-chodd sonkhea babddi gorment fugar zata, je Arbi desamnim chakreo kortale, tannim babddeamnim kosleam trasanche dis kaddleat teo khobro te sangtat tem aikun kuddicho kantto ubo zata. Gormek lagun tanchea angantleam uzo bhair sortalo. Konn-konn ugddas korun sangtat, te datt bonus (blankets) utkant fugoitale, ani aplea angar ghalun nhidtale. Oxem korituch zalear, akh'kho dis kam' korun thoklea kuddik visov divnk, ratchea vellar tankam matso dollo lagtalo. Tech porim hinvancheami disamnim thon'ddi pois korunk koslo-nam-koslo upai korcho poddtalo. Devak argam, Gulfantle te dis atam nopoit zale. Atam sogleam kocherimnim, karkhanneamnim, ani thoddeancheam ghoramnim 'air-condition'-am asat. Punn amchea modem oxi ek kidd (insect) asa, to nhoich gormechea kallant 'air-condition'-acho suseg bhogta, pun hinvachea kallarui aplea kuddik favo ti gormi dita. Ti kidd konn ti ti zannoi? Ti kidd mhonnlear, amche mhonvanche mus (honey bes). Ami zanno, ek mhinvanchi polli (beehive) toyar korrunk 50 hozaram voir mus ekech dakttexe pollient zoma zatat. Vo dusream utramnim, amchean mhonnonk zata, mhonv toyar korrun 50 hozaram voir musancho vavr asta. Ani te 50 hozaram voir mus, tea daktteachxea zageant ekttaim zanv apleo chollvolli choloitat. Te bhair sortat, bhitor vetat. He porim aplem mhonv toyar korpacho avvr te thambonastanam kortat. Mhonntoch, gormecheam disamnim tankam jerul thondd ani ugtea vareachi goroz. Punn Devan tanchea soimbantlean tankam oslem ek dennem dilam, ki te ap-aplim pakulam varo nirmann zata. Ani tea varean tankam goroz ti xitollkai mellta. Hi thonddai tanchea ghontterant utpon'n korunk oxem sangtat, ek-ek mus khoim eka sekenddak 200 pavti odik aplim pakulam (wings) haloita. Ani dusrem ojapanchem tem hem, tinch pakulam tannim hinvanchea vo thon'ddiecheam disamnim haloilim zalear, tanchea ghontterant tankam goroz ti gormi utpon'n zata. Heam mhonvancheam musam sombondan ami anik ek ghozal aikotanv. Aplo koxtti vavr sompoitoch, aplea vavrachem foll khoxem xantponnan aple 'air-condition' polasint bosun te mus mhonv chinvtat. Tednam konnem-i tankam chavoile vo tanche vattek gelo zalear, tea aplea dusmanak, (ho dusman mhonnlear chodd-so monis ani varear bhonvpi ghonn - eagle) tantuntli bail-mus tea aplea dusmanache pattik lagun aplem kuns tachea kuddint bhorxita. Punn, hem kam'kelea uprant, ti bail-mus chodd vogot jivi uronam, rokkdich morun veta. _____________________________ vjp