Vareavelea Sunknneank Visov Ghevnk Zhaddam Nant? Junachea mhoineant Poornima (full-moon) vo Omas-achea disa hindu ostoreo - zannche ghorkar jive astat - tankam bhoilaiki ani boro fuddar magun Vat Savitri palltat. Hea disa, hindu bailen sokallche tond duin tea uprant donparchea vellar nitoll udkan nhavun zonn eklean Vat Vriksha (Banyan tree) vo voddachea zhaddaxim vochun udkacho ghontt ghevn Vat Savitrichi puja korcheli asta. Voddachea zhaddak sutli banddun fulam ani tandlanchi bhettovnni korun bhurgeank ani ghorkarak borem jivit anvddetat. Upas samballun chovttea disa chondr devak (monn god) udok bhettovun Vat Savitrik argam ditat. Sorginchea Bapan. sonvsar rochtanam mon’xakullacho jiv togpak khatir gorjecheo vostu varo, udok, rukh-zhaddam rochleant. Varea ani udka porim zhaddam-i bhi bhouch unchlem kam’ kortat. Mon’xanchea jivitak zhaddam khub gorjechim ani zhaddam xivai mon’xank jieupacho jinnecho orthuch nam zata aslo. Zhaddam soimbik bhuim vangoddachi (natural landscape) ek ghantt, kiteak tanchea vorvim hova (weather) kosmullchem addvarta. Zhaddam, jiv-prannik ani mon’xak prannvayu (oxygen) dita ani vattavoronnann carbon dioxide unnem korta. Tech porim zomnnicho thapomann (temperature) zay titlem samballpak adhar zata. Zhaddamchem rukhodd (wood) amchim ghoram nettoitat ani soboitat. Dekunuch mon’xak jieunk ani borem bholaikechem jivit jietolo zalear rukh-zhaddam odik ani odik ami rovpachi nibel goroz. Punn…. Udorgottichea nanvan, mhagelem bhangara sarkelem Goyem aiz zhaddam vinem vinglem zalam. Rukh-zhaddanim ani dongurlelim bhorlelem mhagalem Goyem vikallea poriavonnan (environmental) ghuspollun fuglam. Eka khallar panchvi (greenery) bhorlelem mhagelem Goyem atam konkritanim nettoilam. Ani poisulean (migrant) jiv tokun jivak irloso visov ghevnk sodtelim vareavelim sobit sunknnim Goyant zhaddam nam ti pollevn ran khateak (forest department) xirap ghalun dusrea zagear pollun geleant. Portuguesa khallar amkam hukumxay khanvchim poddleli punn mhagelea panchvi Goy-ak mat tannim bhurxello hat launk nam. Firgeamnim (Purtegezanim) haddil’lim vo vomplelim kaim foll-zhaddanchim aiz meren follam (fruits) khattat. Ani tim choddan chodd hindu bhousonkhea (majority) asul’lea ganvanim distat. Portugez des-bhoktt toxech tanche niz suttke zuzareanche Goyant asul’leo murti (monument) ami moddleo punn, tannim rompil’lim zhaddam mat azun amchea vangnant distat. Kiteak……..? Him zhaddam amchea chaltea jivitachi kallzi ghetat nhoi? Oi! Dor ek dhorman zhaddacho upeg kela ani kortat. Zhadd naslem zalear Kristi dhormank orth aslo? Khoinchea zhaddar Svami Kristak khillailolo? Hem amkam mothvachem nhoi punn amchea hatant rukhoddacho (lankddacho) khuris dista teddnam ami amchea bhavartan tea rukhoddacho umo ghetat ani amcho bhavart ghott dovortat. Thoddea zhaddamcho jiv vorsanchim vorsam togtta. Povitr Pustokant Jeriko nograntlean Jezu vecho aslo. Angan mottvo aslolo Zakev, Jezuk pollevnk rumbddichea zhaddar choddlolo. Tem zhadd ajun thoim asa mhunn Jeruzaleak povitr nogrant (holy land) yatrikar vo bhett kortele sangtat. Voddachem zhadd hindu dhormant ek orthabhorit xikonn dita. Zhaddak jiv asa mhunn sotmandtat. Magnnim ani dusreo bhetto vodd-zhaddaxim dovortanam jivitan vodd-zhadda itlem aplea ghorkarak jivit magttat (vodd-zhadd 250 tem 300 vorsam togtta) ani apnnacher randponn yevnchem nhoi mhunn hindu bailanchim magnnim astat. Amchea purvozanim roilelim ani rukh-zhaddamnim bhorlelim bhat-bhensam duddu melltat mhunn porkeank vikun kaddlim ani tannim koslech zhaddamche churchure korinastanam mega project vo vorixtt imaroti bandpache prokolp ube kele. Zhaddank lagun amchem Goyem mellea vattovoronann (atmosphere) bhorlam. Az ani fuddarak amkam nitoll varo huskarunk mellonam ani mellchonam. Urlele rukh-zhaddam fottkire udorgottik lagun katrit ravlear mhaka dista zoxem amcheo udkacheo baim duxit (polluted) zavn xud’dh (pure) udok piepak mineral water bottle hanchi goroz zalea tech toren thoddea vorsanim nitoll varo huskavpak oxygen bottle vikott ghevnk poddot mhunn bhirant asa. Lino B. Dourado
