Kimsam Porian Mogak Axetat “Ago udd, udd. Anopheles, tuzo jiv zai zalear uddun voch” “Kitem zalam re. Itli taket kiteak?” Zollarek vo kimsank marpachem vokhodd xinvraitoleak pollevn, ek daddlo zollar (male mosquito) bail zollarek (female mosquito) vego-veg to zago soddun vochunk xiddkavnni ditalo. Taleigao-che don vadde, Bor Bhat ani Vhoddlem Bhat zollarank ekdom rovnneche (breeding) zage nond zaleat. Thoinsorli zollar mornnank pavoita tosli plasmodium parasite hi ek vikali pidda posraita ani lokache bholaikecher ani jivacher chodduch bhirant haddtta mhunn Ponnjent ravpi Dr. Madhav Wagle hannem usko porgottaila. Zori zollarechem noxtt khobar korunk vo tabo dovorunk Munsupaliti, Panchayat ani Bholaike Khatem zata titlea vegim upai ghena zalear Gõyant ‘malaria’ mornancho ankddo vaddtolo hi ek gombhir xiddkavnni dilea. Aplo jiv vattovpak, thoddi zollar vo kimsam vokhodd martelea zageavelim jiv aslear bhik magin, oxe toren pollun vetalim. Tatuntlim don zollari jiv vattoupache boballar astana, bail zollar asli ti vochun eka mon’xacher bosli. Tednam, ticho daddlo sangati aroddlo. “ Ago Anopheles, taka chabu naka,” “Kiteak? Tuzo soiro lagta kitem?” Bail zollaren vicharlem “Takach lagun amchi sonsot Taleigoa ganvant jiyeta.” Ani ekuch zompoi marun daddlo zollaren aple sangati bail zollarek chabunk boslelea mon’xaveli poisaili ani dogaim vochun eka santtun aslelea udkan boslim. “DDT vokhddanchi ‘insecticides spray’ marun amchi sonsot nopoit kortat. Ani bolkavant ubo ravun to mouza polleta. Mhaka rag ailo. Dekhunuch, hanv taka chabunk gelim. Punn tuvem chabunk diunk na. To konn? Ani tum taka koso vollkota?” “Vollkota? Taleigao-cho badshah to. Gõycho Montri aslo tednam, tannenuch Gõyant vhodd-vhodd imaroti zavncheo mhunn vorixtt prokolp (project) ube kele. Udorgottichea nanvan pachvi rongi Gõy aslem tem konkritache korchelem khatir Gõychi zomin bhailea dhonddekarank vikpak suru keli. Oxe toren vorixtt imaroti bandpache prokolp suru zale. Ani te banddpak, Gõyant kamdar lok naslelean bhaile lokak vo hangasorlo lok somzotole bhasen ‘ghantti’ lokak haddcho poddlo. Ani ho Orisa, Jharkhand, Kholapur prantanlo kamdar lok Gõyant yetanam malaria zavpa sarkelim ‘dhenge’, ‘chikungunya’ duensam bandkapam zatelea zagear (construction sites) odik promonnan gheun ailo. Amchi zollaranchi sonsot vhaddounk adhar kortelea Babuk, natak korunk sodta tum? Dekhunuch, taka chabpak hanvem tuka monam kelem.” “Mhaka khoim khobor? To amcho sorvonddar mhunn? “ “Itlean somplem na. Ponnje lagsor aslelea ganvanim 85 tok’ke malaria duens bhailea kamdarachea vorvim posorta mhunn halinch Gõychea disaleancher avaz zala. Kuddiche sabar bhag piddear zaun ‘plasmodium vivax’ hea malaria duensan sompunk Siolechi tornni ostori poili asa khoim. Bihar-cho 18 vorsancho tornatto Sunil Kumar ‘plasmodium vivax’-cho dusro malaria boli poddlo mhunn Gõychi Voizki Kolej hospital khobor dita. Candolim tem Baga dorya dheger ravpi lokak amchi sonsot sotaita mhunn netan khobro bhair sortat. Moddganv Hospicio hospitalant OPD-int disantlean xeboreamni Arlem, Aquem, Davorlim, Colva, Benaulim, Pedda, Betul, Cuncolim ganvcho lok ilaz ghetamna 10 tem 15 malaria piddeche ‘positive’ boli (victim) astat. Bildingam bandpam choltele Moddganv xarant, Kansavlle ganvant amchi zollar sonsot itli choddlea, thoinsorlo lok sanjechi 5 horancher ghoranchim daram-zonnelam damptta khoim…….” “Punn, Gõyche Amdar-Montri duent poddonant kitem?” Daddlo zollar uloitamna modench bail zollaren tondd ghalun vicharlem. “Tankam koslem duens zatelem? Tankam fokot ekuch duens asa. Ani tem mhonnlear Gõyche porjechi tizori riti korchi. Tanche ghoranim ‘mosquito coils’ zolltat zalear tanchea bhurgeank ani kamdarank amche ghansantle samballunk ‘mosquito nets’ ghalun nidhoitat.” “Sarkem tanchem.” Bail zollaren mhonnlem “Oxem kiteak mhonnta tum? Daddlea zollaren vicharlem “Zori amche ‘malaria’ piddent Amdar-Montri mele zalear? Tanchim bhurgim melim zalear? Jem meren Gõyant dovdir haddtele jive astele te meren amche zollarinchem raj choltelem nhoi? Porja melear zata. Amdar-Montri jive urlear puro. Ho poi. Taka vollkota tum?” bail zollaren vicharlem “Konn to?” “ Nanvacho boro ugddas na, punn to zaun asa The National Vector Borne Diseases Control Programme cell of the DoHS (Directorate of Health Services)” “Ago, itlem lamb korun kitem sangta? Motthvea utramnim sang nhoi?” “Udkantlean zatele jontucher tabo dovorpi vhodle dotor bab te. Mhonnchem, amche zollar sonsot natak korunk bore upai sodun kaddpi.” “Kitem? Ekuch pavtti tacher bosun chabcho taka?” Daddlea zollaren vicharlem “Aga, mhojea ixtta. Tuje lagim kitem zata? Malaria pidda eka mon’xa koddsun dusrea mon’xak fokot Anopheles bail zollaren diunk zata. Ani ti hanv. Ha, ha….Punn ekuch ha, ha… ekuch tujean diunk ieta tem, jedna mhaka pidda lagtta tedna ti bori korunk tujean zata…….” “Kosli pidda?” “Loveria.” Lino B. Dourado
