Borem Dislear Boball Khorcho Nhoi “Arre vachlam tumi? Khoim asat re?” “Age, hanga asat muge bolkavant . Kitem vachlam kai mhonntali?” “Veta thoimsor vareant produxon zaun ani sigaram fuskaun zaitea lokak svas ghevpache tras zatat ani pidda ani mornnam zatat. Haka lagun Vixv Bholaike Songhottnnen lokachea horddeacho topas korunk laila.” “Khoinchem potr sangta ge tem?” “Sunaprant.” “Tankam khobor na ge? Tugelea horddeachi niamit (daily) hanv topasnni korta mhonn.” “Hinch bhurxeaponna asat tumchea thaim. Ollxig uloitana loz disna tumkam? Poir hanvem tumkam yad kel’li. Mhagele dhavea thana (breast) soklla matxe dhukavoll yeta mhonn. Veta thoim kankr piddecheo khobro. Ponnje vochun, horddeachi topasnni kelear bori nhi?” “Matxe dukhavoll aili zalear Ponnjent vo hospitalant dhanv marcheli kiteak goroz ge?” Dukhavoll zaite toren yevnk xoktta.” “Tumkam chodd khobor? Dotorponnachem keddna meren xikop kelam tumi?” “Mon’xak mhonntat tem challtea duensanchem thodde bhou giniyan (knowledge) asunk zai. Dotoruch mhunn zavchi goroz na. Mhaka polleat. Thonddi zali mhonntoch, Curti-Fonddem Sahakari Spice Farm hanga sakun haddil’li borixi xudh kaju feni ratcho ghonnttam ani dusrea disa mhagelea horddeantli thonddi gaib zata.” “Tumi itlench korchem. Mhagelem kagall (complain) aikun ghenant tumi. Chodd zalem mhonntoch uprant hanga thoim dhanv Precaution is better than cure, mhonntat nhi re?” “Oi? Toxem zalear aik. Horddeachi dukhavoll zali mhonntoch kallzacho atak ailo oxem khub lok somzotat. Horddeant dukhavoll zavpachi zaite torechim nimitam astat. Horddeachi dukhavoll jivak asvasthitai (discomfort) korta. Teddnam hem kiteak lagun zata te zannam zavpachi chodd goroz. Favo titlem kallzak rogott ani hova (oxygen) pavona teddna kallzacher pez yeta. Somoz, tum chott’ti (steep) vo dongurlear aslelea mondirant vochunk choddtta. Teddnam tugelo jiv kansar zata. Hea vellar kallzachem ailem hem somoz chukichem. Dusrim duensam horddeak dukhavoll ditat ani tim mhonnlear Asthma, pneumonia, jirvonn bori na zalear, potacho ulcer, figddachem duens (gallstones), godda-muttachem duens. Punn him duensam tuka nant nhi ghe?” “Naslear kitem zalem? Okosmat horddeant dukhavoll ailear teddnam konnank ulo marum?” “Emergency Management and Research Institute (EMRI) Gõychea sorkarachea adharan porjeche seve khatir funkot ambulance ghaddiocheo vevostha dovorlea. Akantkallcho (emergency) 108 ankddear fon korun ambulance apouchem. Thodde pavtti, horddeachi dukh tugelea osleanchi jib subeij boddboddli zalarui zata khoim” “Puro, puro. Chodd uloile. Ostoreanchea horddeachi dukh somzotelea porim uloitat tumi. Keddna tori tumi………….?” “Age…….mukhar uloinakat. Tea vorsachi ghozal ti. Mhagelea mauxi bhoinniche ghora kodden kabaddi khell khelltalim ami. Mhagelea chovrosan tum ail’li teddna mhaka dodge korun addvean bhair sorunk kortana mhagelo hat tugelea xater chukonn apttovlolo. Teddnam tunvem mhojer bhirant ghalun mhonnlele” “Kitem mhonnlelem?” “Mhageli Aiik sangtelim. Ani hanvem bhiyun naka mhonnlelem tem az meren tech horddear apttovtam.” “Mhaka disil’lem tumi muddom kel’lem mhonn. Mhaka khoim khobor tugelo chukon hat lagil’lo mhu? “Ani tea uprant khub pavtti logn zal’le ostoreanche horddear chukonn mhagelo hat lagla. Punn tuje bhaxen tannim keddnach mhonnlelem na..” “Kitem mhonnonk na tannim?” “Hanv mhagelea ghovak sangtelim” Lino B. Dourado
