SOTHAK ZUZPI BHAGIVONT JUANV BATIST Herod razachea kallar Judeia ganvant Zakarias navancho ek padri jietalo ani tachi potin Elizabet; ti vanxtti asli. Tim dogaim zanntte piraier pavlelint. Ek dis Zakarias-ak anj Gabriel disti poddlo ani tannem taka mhull’llem: “Zakarias, tuji bail Elizabet tuka ek put diteli ani tum taka Juanv nanv ghaltolo.” Thoddeach kallan tachi bail gorbest zali. Elizabet sovea mhoinear astannam anj Gabriel tiche bapul-bhoinnink, Moriek, disti poddlo ani tannem tika Devachi evzonn porgottli - ki ti Dev Spirit Santache kurpen Devachea putachi avoi zavchi asa. Tea fuddem tannem tika oxem sanglem: “Tuji bapul-bhoinn, Elizabetui mhatare piraer gorbest zalea; tika ek put zolmotolo. Lok tika vanxttem mhunn pachartalet punn ti atam sovea mhoinear asa.” Moriek, Elizabetichea gorbesponnancho sondes melltanch ti dhanvim-dhavim Judeiachea dongrar Elizabetik bhettonk geli. Moriechea gorbestponnanchi bori khobor aikotanch Elizabetichea kusveant ballkan uddki marli ani tinnem thottakun oxem mhull’llem: “Soglleam ostoream poros tum sodov ani sodov tuje kuxichem foll. Mojea Svamiche avoin kiteak mhaka bhett korunk zai? Hem polle, tuzo boro sondes mhojea kanar sadovtanch mhojea kusveant aslelea ballkan khoxechi uddki marli.” Povitr Pustok sangta ki bhagivont Juanv Batist ek boreantlo boro abru-manacho mukheli ani vatt dakoinnar mhunnon. To sothak zogoddpi aslo. Farizevank ani Sadusisank lok bhietalo ani akantalo punn Juanv tanchi legun sobhemazar ttikka martalo. Juanvan razak pasun soddunk nam jednam to Herodias, aplea bhavache, Filip hache baile lagim produarponnanchem jivit jietalo. Juanvan Herod-ak mhull’llem: “Tuvem tujea bhavache baile sangata jieop kaidexir nhoi.” Hem aikon Herodias ragan bhorli ani tinnem nichev kelo taka jivo marunk punn oxem korunk tiche lagim ghoddonaslem, karann Herod Juanvacho bhokt zavn aslo ani to nitt munis dekun to taka asro ditalo. Herod hachea zolm disa tannem aplea ixttank ek vhodd jevonn toiear kelem. Herodias hachi dhuv sobhemazar ievn nachli. Tika pollovn Herod bhov khoxi zalo ani tannem dhuvek mhull’llem: “Tuka zai tem mhojea lagim mag ani hanv tem tuka ditolom.” Oxem mhunnon tannem taka soput dilo: “Hanv tuka magta tem ditolom; mhoje rajvoddkechem ord legun.” Dhuv bhair geli ani aple avoik vicharlem: “Maim, hanv kitem mhunn tache lagim magoum?” Tinnem zabap dilo: “Juanv Batistachi tokli mag.” Dhuv tabortop razaxim portun eili ani oxem magnnem kelem: “Eke boxen ghalun tum mhaka veginch Juanv Batistachi tokli di!” Teach vogtar razan aplea eklea xipaiak hukum dilo Juanvchi tokli kapun haddunk. Xipai bondkhonnddent ghelo ani Juanvchi tokli katorli. Uprant tannem ti tokli eke boxen ghalun Herodias hache dhuvek haddun dili ani dhuven ti voron aple avoik dili. Goenchi porza ‘Juanvche khoxechi uddki’ baim-anim, tolleanim ani vhallanim uddkeo marun somorpitat. Punn Juanvcho to ekuch dekh gheum sarko nomuno naslo; taka anikui xegunn aslet. Bhienastannam soth uloileleak Juanv Batist apli jinn luskonn zalo. Hem voros amche Goenche Archediosin tornatteank bhettoilam. Bhagivont Juanv Batistachi dekh ghevn amche tornatte mukhia sothak zuzonk toiear asonk zai. Amkam sadea-sidha mukhelianchi goroz. Nhoi Judasa porim dogolbaji korun ani poixeank lobdon porjecho ghat ghetat tosleanchi. Bhezuddaiek patt korun sothak fuddo kortat tosle fuddari ani mukheli amkam zai. Bhagivont Juanv Batist oronneant jietalo; dekun to apnnankuch ‘oronneantlo tallo’ mhunnttalo. Tachi dekh ghevn ami tache porim lhanvikaien cholumiea. Bhagivont Juanv Batist Devachea nanvan lokak bautism ditalo; tannem Jezukui bautism dila. Punn to itlo khalto aslo ki Jezuchea ieanneanchi khobor kortannam to lokak oxem sangtalo: “Hanv konnuch num; mhojea pattlean ieumcho asa to itlo vhodd ki tacheam vhannanchi vadi pasun soddunk mhaka favonam.” Aiz-kal amchea modhem suberbai vaddot veta. Bhagivont Juanvchea pavllanim cholon ani tachea nomuneanchi dekh ghevn ami tache porim khalte zavnk vavrumiea. Hea sokoilo vers gavn Bhagivont Juanv Batistachi porob somorpumiea: Bhokta Juanv, patron tum amcho Onodan bhorlelea, sorginchea Vinoti kor tum, magon Jezu lagim Patlav tuzo, korunk ami. VIVA SAN JUANV! Moi-mogan, Domnic Fernandes Gaumvaddy, Anjuna _________________________________________________________________ More than messages–check out the rest of the Windows Live™. http://www.microsoft.com/india/windows/windowslive/