Mulakat
Albert Cabral
Choddxea Kuveitt-chea tiatr-pollennaramni, tachem nanv aikolam punn,
tiatr-machier taka pollevnk nam. Halinchea tempar Konknni tiatramni gavpa
mollar, to bhouch famad zalolo ek gavpi. Tachem prosid’dh zalolem ani 1994 Kala
Akademi Tiatr Spordhen poilem inam’ favlolem ‘Welcome to AIDS Family’ kantara
vorvim, tannem Goembhor nanv zoddlam. Gelea 7 vorsam segid Comedian Domnic
hanchea tiatr-pongddant to nhesta. Setembrache 18ver 2009, sanjechea 4:30
voramcher, Al-Marsha Hawally A/C Shobhaghorant KGTS ghoddun haddtole vorixtt
songit khariavollint poilech pavtti Kuveitt-che Konknni rong-machier disti
poddtolo. Ani to zaun asa, Goycho namnecho kantorist ani partist, Alberto
Cabral.
Goa-world.com protonoddin, fonavelean ghetloli ek dhanvtti mulakat, amchea
vachpeank ditat. Tea poilim, Goa-World.com-Team-ichea nanvan, Tiatrist Alberto
Cabral-k boro yevkar divn, sogllo yex anvddela.
Tacho zolm Mayachea 28ver 1962 vorsa Dona Paula, Tisvaddi, Goy zalo. Tachea
bapaichem nanv Jose ani avoychem Maria Concescao Cabral. Konknni tiatr-palkar
tacho poilo proves Cumbarzuem-cho Estev Matus-achea Ghoracho Vantto hea
tiatrant, 11 vorsanche bhurgea piryar zala. Uprant khasa tiatr boroun-digdorxit
korun ganvant ani her Goychea ganvamni palkar haddleat. Az meren kitle tiatr
rong-machier dakhoileat ani famad zalolea tiatrachim nanvam, Goa-world.com-an
vicharlem teddnam, tannem soroll sanglem.
“Sumar dha-ek tiatr boroun digdorxit keleat Rogot, Inam, Odruxtt, Lharam, Gulam
he mhoje ganvant ani her Goychea ganvamni ghazlole tiatr zalear, 1991 vorsant
Kala Akademi Tiatr Spordhen Nit Konn Kortolo? Hea mhojea tiatrak 3rem inam’
lablam. Ani tech tiatran tea vorsak, hanv ek boro kolakar mhunn inam’ jikhlam.”
-Konknni rong-machier vevsayik mollar konn-konnachea tiatranim tum nhesla?
“Sorgest C. Alvares, Wilmix-Sharon, C D’Silva, Mariano Fernandes, A. M. Araujo,
Alvito Araujo, J. L. D’Mello hanchea tiatramni nheslam, ani gelea segid 7
vorsam Com. Domnic hanchea pongddak nhestam.
-Khaxea tuvem kitlim kantaram ghoddleant ani kesettir, CD-ir ani VCD gaileant?
“Kitlim kantaram goddleant tanchi yad sarki nam, punn sumar 45 odhik hanvem ani
dusrea tiatrist goddpeanchim kantaram kesett, CD-ir gaileant ani hatuntlem
poilem inam’ jikhlolem mhojem kantar Welcome to AIDS Family zaun asa. VCD-ir
gaitolom distam”
-Tuvem kitleo gitancheo kesetti, CD kaddleat?
“Devachim Rochnna, hi mhoji ekuch CD bhair sorlea ani fuddarak kaddpache
toyearen asam”
-KGTS vorixtt songit khariavollint tuzo aspav asa. Tum fokot solo gaitolo vo
anink konnachea sangatak tujim gitam asat?
“Don solo Jivit ek Sopon, Ekvott Nam ani Kuveittche famad gaiok ani KGTS
vangddi bab Micky Fernandes hache sangata Kaido ek duo gaitolom”
-Poilech pavtti Kuveitt-chea Konknni rong-machier tum distolo. Ho xrestt
(credit) konnank veta? Mhonnchem , konnache upkar tum attoita?
“Dubhav viret bab Domnic Araujo ani Micky Fernandes-anche upkaranchea rinant
hanv sodanch urtolom”
-Sodeak Goyant lokache avddiche vo proud pullers kantoristanchim nanvam divchi?
“Fancis de Tuem ani Marcus Vaz, Goychea tiatr-pollennarank dipkhaitat.
Dekhunuch, dor ek tiatr-digdorspi tanchea darachea umbrear, dor sokallim
distat”
-Kuveitt-chea tiatristank ani tiatr pollennerank tuzo sondhex.
“Poilea svater tiatristam modim ekvott ani somzikai asunk nibel gorjechem.
Ekvott ani somzikai zaun asa hatier dor ek tiatristak, ek famil koxi jiyepak.
There is a black sheep in every family. Ani tiatrist somudayen, unem nant. Punn
vechik putache (prodigal son) bhaxen chuki visrun, mae-mogachea vegent tankam
bhogsun, porot svat dilear, tiatristponnacheo ani tiatracheo dorzo vaddtoleo.
Kuveitt-chea tiatr-pollennarank sangpachem mhollear, hea pordesi desant, amche
Goykar tiatrist bhav-bhoinnam, amche Konknni avoy-basecho bhavto unch ubartat.
Tancho tiatr mollavelo vavr, vakhandcho”
