Natalanchi Porob - Ek Uzvaddachi Porob Tomazinho Cardozo Candolim, Goy
Aichea kallar Natalanchi porob somorombhop mhunttlear mojea korop oso ek fottkiro somoz zalolo asa. Amchea tornnateam bhitor tor ho somoz khub okhondd asa. Zaite avoi ani bapui hea noxttea somozak aplo adhar dita ani aplea bhurgeank bori dekh diunche suvater vaitt dekh dita mhunttlear fott zanvchina. Natalanche porberchea niban ami kitem kitem kortanv ani korinanv tacher ilo niall korum-ia. Natalanchi porob lagim pavta pavta amchi toyari suru zata. Ghorak 'paint' korop ani sundor sozavott korun ghor chokchokit kortanv. Nove kopdde xinvtanv vo vikte ghetanv. Adhunik 'fashion'-ak sobta tosle kopdde ami vinchun kaddtanv. Natalam somoyar ek gotto kortanv ani tantun ballka Jezuchi murthi ani her murtheo dovrun ek dekhavo toyar kortanv. Kaim tornatte dhanvte firte dekhave rochun gotteachi sozavott sarki mon' bhuloiti korun uddoita. Natalancho torekvar kunsvar toyar kortanv. Ghorant korunk vell na zalear to kunsvar ami bazarantlo vikto ghetanv. Kunsvara xivai Natalanchi porob sobona oxem amkam dista. Itleanuch somponk na Natalanchi porob dadhosponnachi porob zaunk zai mhunn ami dukrachem, kombllechem, gayechem ani bokddeachem mas haddun ruchik jevonn toyar kortanv. Hea jevnnant odhik ruch haddche khatir soro zose porim fenni, whisky, brandy, beer adi piyelea xivai porbechea jevnnant matui umedh yena mhunnpak ami fattim ravona. Natalanche ratrik eka dansak vochop hachii toyari ami adim fuddench kortanv. Natalanche porbek adim fuddench ami itli toyari kortanv hi sonvoim bhes bori asa hantun matui dubhav na punn hi toyari mhunttlear ami amchem purnn mon' fokt sonvsarik vostuncher ghaltanv. Natalanche porbe khatir ami mat punni othmik toyari kortanv kai? Zoxe porim Natamchea somoyar amchem jivit ami bhailea dekhaveamni nettoitanv tech porim amchem othmik jivit nivoll ani nittoll korpak hi porob ami vaprunk naka asli? Amchi dhormik jinn Jezuche xikvonne vorvim odhik girest korunk naka asli? Aichea kallar amchea jivitan othmik toyarechi odik goroz asa punn kotta hi mhotvachi toyari korunk amkam vell na nhoi mhunn umedhui na, hi ghoddni khub dukhachi asa. Dubhav nastana he porbe somoyar sukh, sontos ani moj'jea aschich punn tech borobor Natal porbecho orth monant haddun amchea jivitan sudharnna korunk proitn korop odhik gorjechem asa. Natalanchi porob mhunttlear ballka Jezuchea zolmanchi porob. Eka gorvanchea gotteant tannem zolm ghetlo. Tacho zolm eka ekdom' gorib gorabheant zolmololea bhurgeacho ugddas korta. Goribantlo gorib bhurgo poriant gorvanchea gotteant zolmolo amkam aikonk yena punn sonvsarachea sorvonddaran, Jezun eka gotteant zolm ghetlo. Jezucho zolm osurokxa (insecurity) dakoll korta. Aichea kallarui mon'xakull toslech bhirantin ani osurokxen jiyeta mhunn amchea dolleam somor jivem chitr dovorta. Jezucho zolm mhunttlear goribi ani osurokxa ji amchea somazan asa ticho nomuno zaun asa. Aiz kitlo lok hea sonvsarant goribkayen jiyena zait? Disak ek poriant jevonn jevnastana dis sarinant zait? Aiz hea sonvsarant kitlo lok atankvadi ani her dusrea noxttea somajik dusmanak lagon bhirantin dis sarina zait? Natalanchi porob somorombhtana ami hea noxib futtkea lokanch ugddas kortanv kai? Tanchea dukhan bhagidar zaunk ami proitn kortanv kai? Heach kornneamni Natal porbecho khoro orth liplolo asa. Natalanchi porob mhunttlear uzvaddachi porob mhunn ami mandtanv. Jezuchea zolma vorvim mon'xakull kallukantlem uzvaddan ailem. Punn ho uzvadd akhea mon'xakullacher porzollta kai? Na! Kiteak uzvadd nas korun kallokhachi rajvott haddunk proitn korpi zaite monis asat. Ho kallokh mhunttlear kitem? Amche kuttumb aiz ekvottit na, disan dis odhik ani odhik kuttumb futt'ttat. Ghorabeanchi durdoxea zata ti ami polletanv. Goribi disandis vaddta ani xikxonnacho labh soglleank mellona. Fott ani onit odhik ani odhik posorta ani sadhea mon'xak nit mellona. Zaticheo, dhormancheo ani bhasancheo vontthi ubharun ami hea somazache kuddkean kuddke keleat ani eka mekak dharun nodren ami pollounk lagleat. Broxttachar ami amchea jivitacho bhag mhunn mandhunk lagleat, adi., adi. Sudhorlolo mhunnttanv to ho amcho adhunik sonvsar aiz anek toranchea kallokhan gusmott'tta. Taka uzvaddan haddpachi taktichi goroz asa. Ho uzvadd ami haddunk xokot kai? Jerul! Amcheamni kallokh nas korun somajan uzvadd haddunk proitn korum yeta zori tor poile suvater ami Natalanchi porob mhunttlear sotachi, nitichi ani eksarkeponnachi porob mhunn mandhtanv zalear ani teach monan ti monoitanv zalear. Natalanche porbecho hoch khoro orth zaun asa.