DR. RAVINDRA KELEKAR: KONKNNICHI JYOT PALOVLI
Padma Bhushan ani Dnyanpitth Puroskar zoitvont Dr. Ravindrabab Kelekar
oksomat 27 Agost 2010 disa ho sonvsar soddun gelo ani Konknni monis
dukhant poddle. To ek raxttriya panvddeavele borovpi ani Konknni khatir
soglle somman mellovpi aslo. Mhunn taka Konknni yugnayak, Konknni Ratn
mhunn birud dilam.
Eke bhaxen (language) apli protixtta ani unchain her bhasam borabor
mellounk zai ti Konknni bhaxek mellovpak Ravindrababcho molacho vantto
asa. To fokot borovpi naslo, tor to ek vicharvont ani zhuzari vrut’ticho
monis aslo. Mornnachea thoddea disaam adim legit 85 vorsanche pirayecher
tachi bud’dh tharear asli ani to progott vichar manddtalo hem tannem 31
July 2010 disa Dnyanpitth puroskar svikartana dakhoilem. Taka puroskar
bhettounk ailoleo Loksobha Speaker Xmt. Meera Kumar hinnem tachea
vicharanchi dokhol ghetli ani tachea adhunik vicharam kodden sohomoti
dakhoili.
Ravindrababan sadeantlo sado sahitya puroskar dhorun sogllea Bharotiy
bhasanchea mollar vhoddantlo vhodd puroskar jikhun Konknni bhaxechem
vhoddponn sid’dh korun dakhoilem. Zaite bhovman ani somazjik vavrant
tannem protixttay melloilea. Oxa hea mhan mon’xak ami tokli bhagoitat.
Tacho sahitya provas khub vhodd. Tannem Konknnint toxench Moratthi,
Gujarati, Hindi bhaxentui boroilem. Taka Konknni, Moratthi, Hindi,
Gujarati, Bengali hea Bharotiy bhasam xivai English, French, Portuguese
heo pordesi bhaso bhes boreo kolltaleo. To Gandhicho bhokt aslo.
Kakasaheb Kalelkar hanche vorvim to Mahatma Gandhi meren pavlo ani
raxttriy vichar xrenni kodden tannemnatem zoddlem. Voyachea 84vea vorsak
tannem Tolstoy (Tolstoyachi jinn ani vichar) hem voicharik pustok boroun
apunn kitlea okhondd tasancho borovpi hem dakhoun dilem.
Borovpant satotyo dovrunk zai hem tornatteank ek udahoronn ghalun dilem.
Hache voilean tachi protibha ani bhaxevoilem probhutv disun yeta. Chodd
mhotvachem mhollear tannem Konknniche Romi lipint legitsahitya nirmilem.
1971 vorsa boroiloli
“Tulsi” hi novlika tannech 1995 vorsa Romi lipint utraili. Tacho
potrkaritentlo vavr titloch mhotvacho.
Tachea likhnnechi nond ghetastana lokxant dovorchem poddtole ki to fokot
sorjonxil borovpi naslo, tor tannem voicharik pustokam boroilim,
lipiatoram kelim, onnkar kele, sonkolon kelem ani sompadon kelem,
Konknnik provasvornnonam dilim. Tannem 50 voir pustokam boroilim. Tachea
Himalayant hea provas vornnon pustokak 1977 vorsak poilo Sahitya Akademi
Puroskar favo zalo. Konknni Bhasha Mandal puroskar, Kala
Akademi Puroskar, Padma Bhushan ani Dnyanpuitth Puroskar hea puroskaram
borabor taka ‘Ami tankam mon’xant haddle’ hea onnkar pustokak 1990
vorsak Sahitya Akademicho onnkar puroskar favo zalo. Hea sogllea
tureamni Ravidnrababa borabor Konknnik girest korun soddli. Mhunn tache
fattlean ubi asloli Konknni pillgi taka solam korta ani to rogtan
konnachoch soiro nastana tachea khatir dukam golloita. Eke mulakhotint
taka prosn kelo “Ravindrabab, aizver tunvem kitlim pustokam boroileant?”
Tannem zap
dili “Mhakach khobor na hanvem kitlim pustokam boroileant tim.” Hem
amkam dakhoita ki tannem sahitya rochlem tem hous mhunn nhoim tor aple
vichar dusreak diunk zai mhunn.
Xennoy Gõybab ani Mons. Sebastiao Rudolf Dalgado hanche fattlean
Ravindrababachem nanv yeta. Tannem aplem purai jivit Gõyam khatir ani
Konknni khatir orponn kelem mhollear otitay zaunchina. To Gõy suttke
loddeant aslo. To Opinion Poll loddeant aslo. Konknni hi svotontr bhas
mhunn pottoun divpak to vavurlo. Konknni Gõychi rajbhas korunk tannem
margdorxon kelem. Gõy rajya zavpak tannem yogdhan dilem. Konknni 8ve
vollerint ghalunk tannem margdorxon kelem. Mhunn taka Konknni
chollvollicho Pitamah mhunnlo.
Oxa hea thor mon’xachea mornnan Konknni mon’xak ostveosth korun uddoila.
Amcheant astana tachi jitli dokhol gheunk na tea poros chodd dokhol hea
fuddem gheunchi poddtoli. Kiteak tachem boroop mhollear protek Gõykarak
ani Konknni mon’xak somrud’deche vatter vhorpi ek provah asa. Tannem
Konknni monis ghoddoile. Jedna Konknni kodden kainch naslem tednam
tannim Konnni sahitya rochpachem dhaddos kelem. Lipivada kodden to
gombhirtayen polloitalo ani aple likhnnentlean to margdorxon
korit astalo. Mhunn Konknnichea sogllea lipintlea borovpeank tacho obhiman.
“Sahityachi hanvem kednam mon rizvonnecho vavr manlo na. hanvem taka
jivit ghoddovpi ek yatra manla. Upasna korunk zai ti jivitachi, oxem
sodam manit ani mhunnit ailam. Sahitya hem jivitachem ek upfoll – ek
bi-product hech nodren tache kodden sodam pollet ailam. Mhunn
mhojeantlea kolakarak hanvem mhojeantlean sahityakaracho dhoni zaunk
dilo na, sevokuch dovorlo. Sahityakar ho vicharvontuch asunk zai, khasa
chintpi ani duseankui chintunk lavpi asunk zai. ‘sangpa sarkem’ kitem
tori asunk, magir tem boroum ti kotha, novolkotha, nattok, nibond,
kovita vo dusrea khoincheay rupan, oxem mhunnit ailam.” Ravindrababalea
vicharancho ek trailor.
Ravindrabab Kelekaracho zolm 07 March 1925 disa Kunkolle zalo. Uprant
jivitacho zaito provas korit to Priol hanga sthayik zalo. 85 vorsancho
jivitkall sompoun to Moddganvchea Apollo Hospitalant xantponni ho
sonvsar soddun gelo ani Konknnichi jyot palovli. Mhaka zaite pavtt tachi
bhett ghevpachi sond mell’li ani tachea ghora koddenui vochun tacho
axirvad ghaupak noxib lable mhunn hanv noxibvont mhunn somzotam.
Ravindrababak mhojea kallzantlean nomon ani argam.
Borovpi: Vincy Quadros
Vice President
Goa Konkani Akademi (Govt. of Goa)
address: "Snows Krupa", Arlem, Raia, Salcete, Goa, India.
Mobile: +91 9822587498
Posted by Goa-World.COM
Pictures used: Net Resources/goa-world.com archives.
http://ravindrakelekar.blogspot.com/2010/08/dr-ravindra-kelekar-konknnichi-jyot.html
* * * * * * * * * * * * * * * * * * * * * * * * * * * * * * *
Goa-launch of the well-received *Into The Diaspora
Wilderness* by Selma Carvalho on Aug 29, 2010 (Sunday) at 11
am at Ravindra Bhavan, Margao. Meet the author, buy a signed
copy (only Rs 295 in Goa till stock lasts).
http://selmacarvalho.squarespace.com/