Goyant, Langur Makddanchi GorozLino B. Dourado Zon’voram modim makodd onek torechea mon’xache jivitan bhouch upeogi pranni zaun asa. Sunim ani mazram porim makodd-ui mon’xancho oporbayechem zon’var aslolean, taka-i lok postat. Thoddea Hindu lokak promukh yexvari vost (prominent divine entity) makodd zaun asa. Hanuman, ho makdda rupacho dev, hindu dhorman mellta. Makodd vorixtt toreachea kaman moniskullak adharacho zala. Jun 14vi, 1949 vorsant, Amerikechea V2 rocketantlean ontroll sodbhovndden (space exploration) makodd Albert II poilo zaun aslo. Xemboram odhik ekuch jat-prokarachi pranni (species) vixim xikop korchea khatir, sonvsari vhodd proigxalleo (laboratories) makddank samballtat zalear, thodde makodd ek vhodd noxtt vo pest zalam. Pikavollichea tempar follam ani orov-goteacho makodd khub ibadd kortat, ani oslea vellar tankam poisaivunk armam-gulliancho upeog korcho poddta. Punn halinchea khallar udorgottichea nanvan ranam-dongramvelim zhaddam khatrun makddamlo zago nagddo kela ani dekhunuch dongravele makodd xaramni distat.
Aiz savn Delhi rajdanin, Commonwealth Games 2010, suru zatat. Commonwealth ganv ani her moidana vixim potrancher torekvar khobro ami vachleat ani Commonwealth 2010 ghoddun haddpi somitichi koddok ttika marun TV media fottingponnacho uzo vonkit ravlea. Cholpacho paim-pul (pedestrian bridge) moddlo, vonnot koslun poddli, khellkodeanchea rumani sorop disle, kimsanche tras ani sabar gorjebhair khobro noikari (negative) nodren TV khobrekarammni prokasleo. Punn oikari (positive) ulovpak poilim konnakuch kaposdidad nasli. Atam mat Delhi xaracho chomotkar zala mhunn TV chanollam dadhosponn dakoitat. Hem cholta mhonnosor makddanchem novem kestanv ubem zalam ani tache vixim dhol-tas vazounk lagleat. Commonwealth khell choltolea vattarant khubuch mosti makodd asat. Te makodd khell pollennarank ani toxench khellant bhag ghetoleank tras ditole mhunn oddmas kela. Piddapidd ditolea unnem jatichea makddank poisanvunk gobra rongache kallea tonndache langur makddank toyar kheleat. Xarant bhonvpi heddge makddanchea fattik lagtole ani tankam xarantle pois dhanvdavun Commonwealth khellache zage surokxit dovortole. Amchea sobit Gõyant makodd asat. Te fokot dogurlea vattaramni distat. Follam pikechea vellar te khub tras ditat. Ambe, ponos, kellim ani popaye rompi moddun ani follam chorun khattat ani tachevon dupett ibadd kortat. Ani, onek toreche Ponnje rajdannin makodd ravtat. Te nhoinch fokot dogurlo vattar, punn akhench Gõy padd kortat. Porvorim polasin tancho mellavo zata ani Gõy koxem pokurchem tache voir nettan bhasabhas kortat. Eka zagear kainch mellpachi axea na zatoch te rokhddech Delhi-che unnem jatichea makddam bhaxen dusrea zhaddar udki ghetat. Ranam-dongor khapun makddank svat unni poddlea ani te ganvan lottun yetat. Tech toren Gõyam luttun-luttun thodde Porvorinchea makddank Gõy lhan koxem dislam ani tech khatir Konnod pratantle Konknni ulovpi lokakche ganv chorpak thoim udki ghevnk sodtat. Thodde makodd vikallea vokddanchea (drugs) dhonddean bhorsoleat ani apleach tokle vhoir mornnanchi torsad humkalaun dovorlea. Thoddeamni bhaile vikott makodd haddun aple jatiche motdarsonghan vote banks koxe samballeat. Disandis he makodd, topeam porim rong bodolltat. Atam ami Gõykaramni Langur makddam porim koddok zaunchem asa. Fuddle vechnnukek Porvorim polasintle broxttochar makddank poisanvunk atam thavn ami ekvottan toyari korunk zai. Choranchea hatantleant lastolem Goem hea pavtti tanche hatant portean soddun dilem zalear, ami infernant udki ghetlea vorim zatolem. Margai, kunn, choreo, vikallim vokhddam, bholatkar, lutt, fottingponn, broxttochar, atankvad poisavunk, dorek Gõykaran Langur makodd zaun Porvorinchea makddank budd xikounk zai. Gõychem boreponnanchem chaddor ghaltoleank amcho tenko divn, Gõychem nixonntton kortolea makddank Porvorim ghorache roste sodamkhall bond korche upai tujea ani mhojea hatant asat. Utthat. Zagrut zaiat. Na tor Gandichea hozar nottak pollevn tumchem povitr mot boxttayvun, tech makddanchim xempddi tambddi mhunn nachat!!!!!